៨ ចំណុច កុំមើលស្រាលឲ្យសោះ បើមិនចង់ជួបបញ្ហា ពេលបើកឡានទៅផ្លូវឆ្ងាយ

2018-04-13 02:13:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃសៅរ៍សប្ដាហ៍នេះ ជាពេលដែលប្រជាជនខ្មែរទូទាំងប្រទេស ប្រារព្ធអបអរពិធីបុណ្យចូលឆ្នាំខ្មែរ។ ក្នុងពេលជាមួយគ្នានេះ ប្រិយមិត្តរបស់ Sabay មួយចំនួនបានរៀបចំសម្ភារៈនានា សម្រាប់ការធ្វើដំណើរទៅកាន់ស្រុកកំណើត ឬតាមទីរមណីយដ្ឋានដែលនៅក្រៅរាជធានីបាត់ទៅហើយ ដែលភាគច្រើននឹងប្រើប្រាស់រថយន្តផ្ទាល់ខ្លួនតែម្ដង។ ដូចនេះ Sabay សូមលើកយកការត្រួតពិនិត្យរថយន្តទាំង ៨ចំណុច ដែលប្រិយមិត្តគ្រប់រូបគួរដឹងមុនពេលចេញដំណើរ៖

១. ឆែកមើលកម្រិតទឹក និងប្រេងម៉ាស៊ីន

ត្រូវឆែកមើលពីកម្រិត ប្រេងម៉ាស៊ីន ប្រេងហ្រ្វាំង ប្រេងចង្កូត ប្រេងប្រអប់លេខ ឲ្យវានៅកម្រិតដ៏ត្រឹមត្រូវមួយ។ ចំណែកឯទឹក ត្រូវពិនិត្យមើល ធុងទឹក និងទឹកសម្រាប់លាងកញ្ចក់ជាដើម។

២. ឆែកមើលសម្ពាធខ្យល់ក្នុងកង់

មិនត្រឹមតែមើលកង់ទាំង ៤ទេ សូម្បីតែកង់សាគួរក៏ត្រូវមើលដែរ ជៀសវាងនាំការលំបាកច្រើនដំណាក់កាល។ យល់ល្អ គួរបន្ធូរខ្យល់ចេញខ្លះឲ្យនៅក្រោមកម្រិតស្តង់ដារ ព្រោះពេលធ្វើរត់ឆ្ងាយទៅ កង់រថយន្តនឹងឡើងក្ដៅ ធ្វើឲ្យមាឌខ្យល់ក្នុងកង់រីក ដែលអាចបណ្ដាលឲ្យផ្ទុះបានបើសិនជាសប់តឹងពេក។

៣. ប្ដូរប្រេងម៉ាស៊ីនចោលតែម្ដង

ប្រសិនបើរថយន្តអ្នកជិតដល់ពេលដែលប្ដូរប្រេងម៉ាស៊ីនហើយ (ឧទាហរណ៍ ថាសល់ ២០០គម ទៀត) អ្នកគួរតែប្ដូរវាចោលតែម្ដងទៅ ដោយហេតុថា ប្រេងម៉ាស៊ីនចាស់មានកំណច្រើនជាហេតុធ្វើឲ្យវាមិនអាចផ្ដល់ជាតិរំអិល ដល់ម៉ាស៊ីនដូចកាលទើបដូរថ្មីទេ។ ម៉្យាងទៀត ការប្ដូរប្រេងម៉ាស៊ីនថ្មី ក៏អាចជួយសន្សំសំចៃឥន្ធនៈ របស់អ្នកបានច្រើនដែរ។

៤. ឆែកមើលក្រឡាសំបកកង់រថយន្ត

អ្នកអាចប្រើចុងឧបករណ៍វាស់សម្ពាធរថយន្ត ដើម្បីមើលកម្រាស់ក្រឡាកង់ថានៅសល់ជ្រៅកម្រិតណា។ បើគ្មានឧបករណ៍នោះទេ អ្នកអាចប្រើកាក់ធម្មតាបាន។ កម្រាស់កង់ទាបបំផុតដែលអាចធ្វើដំណើរបានគឺ ១.៦ មម តែយល់ល្អបើកង់អ្នកសល់ក្រឡាត្រឹម ២.៥ មម ហើយអ្នកគួរតែប្ដូរកង់ចេញឲ្យហើយទៅ ព្រោះវាអាចផ្ទុះបែកពេលធ្វើដំណើរផ្លូវឆ្ងាយបង្កជាគ្រោះថ្នាក់ផ្សងៗ។

៥. មើលសំបុកខ្យល់ (អ៊ែរ) រថយន្ត

អ្នកគួរធ្វើការលាងសម្អាត ឬប្ដូរសំបុកខ្យល់ថ្មី ដោយសារតែសំបុកខ្យល់ដែលថ្មី ឬលាងសម្អាតហើយ អាចត្រងខ្យល់ចូលក្នុងម៉ាស៊ីនបានស្អាតជាងមុនជាហេតុធ្វើឲ្យ ម៉ាស៊ីនអ្នកស្ទុះ និងមិនសូវស៊ីសាំង។ មួយវិញទៀត បើសិនជាអ្នកចូលចិត្តប្រើម៉ាស៊ីនត្រជាក់ដោយបឺតខ្យល់ពីខាងក្រៅ អ្នកក៏គួរតែលាងសម្អាតតម្រងខ្យល់ម៉ាស៊ីនត្រជាក់នោះ ឬប្ដូរចោលដូចគ្នាដើម្បីឲ្យម៉ាស៊ីនត្រជាក់អ្នកដំណើរការស្រួលជាងមុន។

៦. លាងសម្អាតរថយន្តរបស់អ្នក

ការធ្វើបែបនេះវាអាចជួយសម្អាតដល់កញ្ចក់ ដែលធ្វើឲ្យអ្នកមើលផ្លូវបានច្បាស់ជាងមុន។ ម៉្យាងទៀត វាក៏អាចសម្អាតចង្កៀងរបស់អ្នកឲ្យភ្លឺជាងមុនផងដែ។

៧. ពិនិត្យមើលចង្កៀងមុខក្រោយ

ត្រូវឆែកមើលថា ចង្កៀងមុខ ហ្វាកូត ភ្លើងស៊ីញ៉ូ មុខ ក្រោយ និងស្តុបក្រោយរបស់អ្នកនៅដំណើរការ។ បើសិនជាសង្ស័យថា អំពូលណាមួយមិនដំណើរការ អ្នកគួរតែ ប្ដូរវាចោលឲ្យហើយតែម្ដងទៅ។

៨. យកឧបករណ៍ចាំបាច់ដាក់តាមឃ្លុបរថយន្ត

កង់សាគួរ ដែកដូយ ស្នប់ ទួរណឺវិស សោសម្រាប់មួលខ្ចៅ សុទ្ធតែជារបស់ចាំបាច់ សម្រាប់រថយន្តរបស់អ្នក។ ម៉្យាងទៀត អ្នកក៏អាចច្រកទឹក ប្រើសម្រាប់បម្រុងក្នុងករណី ដែលធុងទឹកឡានអ្នកមានការលេចធ្លាយផងដែរ៕

ប្រភព៖ Wikihow ប្រែសម្រួល៖ ផាត សុវត្ថិ