មកដឹងលក្ខណៈពិសេសរបស់អង្គរក្សតាមការពារ គីម ជុងអ៊ុន ទាំង១២នាក់

2018-04-30 07:22:51
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គរក្សរបស់មេដឹកនាំកូរ៉េខាងជើង គីម ជុងអ៊ុន ដែលតែងស្លៀកពាក់ឈុតខោអាវធំពណ៌ខ្មៅ បានទាក់ទាញចំណាប់អារម្មណ៍មនុស្សជាច្រើន នាពេលកន្លងមក។

ស្របពេលដែលលោក គីម ជុងអ៊ុន កំពុងធ្វើដំណើរឆ្ពោះទៅព្រំដែនរវាងកូរ៉េទាំងពីរ កាលពីឆ្នាំ២០១៨ កងកម្លាំងសន្តិសុខទាំងនោះបានព័ទ្ធជុំវិញមេដឹកនាំរបស់ខ្លួន ជាទម្រង់អក្សរ V គួរឲ្យភ្ញាក់ផ្អើល។

រយៈពេលប៉ុន្មានម៉ោងក្រោយមក នៅពេលដែលជំនួបកំពូលពេលព្រឹកបានបញ្ចប់ ហើយលោក គីម ជុងអ៊ុន បានធ្វើដំណើរតាម រថយន្ត Mercedes-Benz មួយគ្រឿង នៅពេលនោះអង្គរក្សទាំង ១២ នាក់ បានរត់ត្រុកៗតាមរថយន្តផងដែរ ដោយផ្នែកម្ខាងនៃរថយន្តមាន ៥ នាក់ និង ២ នាក់ទៀតនៅពីក្រោយ។

ការការពារយ៉ាងប្រុងប្រយ័ត្ន និងម៉ត់ចត់នេះ បានធ្វើឲ្យមានការជជែកវែកញែកគ្នា ហើយវាគឺជាលើកដំបូងបង្អស់ដែលមេដឹកនាំកូរ៉េខាងជើង បង្ហាញឥទ្ធិពលរបស់ខ្លួនជាសាធារណៈបែបនេះ ខណៈមន្ត្រីសន្តិសុខកូរ៉េខាងត្បូងនិយាយថា វាក៏អាចជាការបង្ហាញពីអំណាចផងដែរ។

មន្ត្រីខាងលើបានបន្តថា «ទម្រង់ការពារអក្សរ V ជាធម្មតាត្រូវបានប្រើនៅពេលឆ្លងកាត់ហ្វូងមនុស្ស ប៉ុន្តែការបង្ហាញនាថ្ងៃសុក្រ ទំនងជាការបង្ហាញពីភាពល្អិតល្អន់របស់កូរ៉េខាងជើង»។

បើយោងតាមប្រភពព័ត៌មាន បានឲ្យដឹងថា អង្គរក្សទាំងនោះគឺជាយោធាជាន់ខ្ពស់របស់កូរ៉េខាងជើង។ ខណៈពលរដ្ឋកូរ៉េខាងជើងតម្រូវឲ្យបម្រើកងទ័ព រយៈពេល ១០ ឆ្នាំ អង្គរក្សរបស់លោក គីម ជុងអ៊ុន ត្រូវបម្រើយ៉ាងហោចណាស់ ១៣ ឆ្នាំ។

អ្នករត់ចេញពីកូរ៉េខាងជើងម្នាក់ បានប្រាប់ថា ពួកគេតម្រូវឲ្យមានការហ្វឹកហាត់យ៉ាងម៉ត់ចត់រយៈពេលច្រើនឆ្នាំ ដើម្បីក្លាយខ្លួនជាអង្គរក្សមេដឹកនាំ។ មិនតែប៉ុណ្ណោះ គ្មានភ្នាក់ងារពិសេសណាមួយអាចប្រៀបធៀបជាមួយអង្គរក្សរបស់លោក គីម ជុងអ៊ុន បានឡើយ។

រឹតតែភ្ញាក់ផ្អើលនោះគឺ ពួកគេភាគច្រើនមកពីគ្រួសារខ្ពង់ខ្ពស់ ខណៈការជ្រើសរើសត្រូវពិនិត្យមើលយ៉ាងទូលំទូលាយលើ ចរិតលក្ខណៈ និង មនោគមវិជ្ជារបស់ពួកគេម្នាក់ៗថែមទៀតផង៕