Gigi Hadid និងទស្សនាវដ្ដី Vogue អ៊ីតាលីត្រូវគេរិះគន់ខ្លាំងដោយសារមូលហេតុ១

2018-05-04 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាម៉ូដែល Gigi Hadid បានបង្ហាញខ្លួននៅគម្របទស្សនាវដ្ដី Vogue ប្រទេសអ៊ីតាលីប្រចាំខែនេះ។ តាមរយៈរូបដែលបានដាក់បង្ហាញតារារូបនេះ និងទស្សនាវដ្ដីត្រូវគេបានរិះគន់ចំៗ ដោយសារការប្រើកម្មវិធីកុំព្យូទ័រប្រែពណ៌សម្បុរពីសទៅជាពណ៌ត្នោត។

ថតដោយអ្នកជំនាញថតរូបលោក Steven Klein តារាម៉ូដែលវ័យ ២៣ឆ្នាំ បានបង្ហាញមុខនៅក្របទស្សនាវដ្ដីជាមួយតារាម៉ូដែល Justin Martin ដោយស្លៀកឈុតសម្លៀកបំពាក់ម៉ាក Sequin និងមកុដម៉ាក Dolce & Gabbana។

ទោះបីជាមានការតុបតែស្រស់ស្អាតនិងស្លៀកឈុតម៉ាកល្បីៗ ក៏ដោយក៏រូបនេះត្រូវគេរិះគន់យ៉ាងខ្លាំង ព្រោះតែ Gigi មានពណ៌សម្បុរខ្មៅស្ទើរចំណាំមិនបាន។ Gigi បានបង្ហោះរូបនេះនៅក្នុងបណ្ដាញសង្គម Instagram កាលពីថ្ងៃពុធនេះ ហើយក៏ត្រូវគេរិះគន់ចាប់ពីពេលនោះមក។

មានអ្នកប្រើប្រាស់ Instagram ម្នាក់បានសរសេរថា "អ្នកមើលទៅមិននឹងដូចខ្លួនឯងផង"។ ចំណែកឯម្នាក់ទៀតសរសេរថា "នេះគឺជារូប Gigi? ព្រោះមើលទៅនាងដូចជាត្រូវគេកាត់តនាង ដាក់ជាមួយស្រីម្នាក់ផ្សេងទៀតអីចឹង"។

ចំពោះអ្នកខ្លះទៀតបែរជា រិះគន់ទស្សនាវដ្ដី Vogue ប្រចាំប្រទេសអ៊ីតាលីដែលគួរជ្រើសរើសអ្នកផ្សេងជំនួស Gigi សម្រាប់គម្រោងរូបថតមួយនេះ៕

ប្រភព៖ Independent ប្រែសម្រួល៖ ធារ៉ូ