“Avengers: Infinity War” រកចំណូលបាន ១ប៊ីលានដុល្លារត្រឹម១១ថ្ងៃ

2018-05-06 02:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលភាពយន្ត "Avengers: Infinity War” ទើបតែបំបែកកំណត់ត្រាថ្មីមួយទៀតហើយ ដោយបានក្លាយជាភាពយន្តដែលរកចំណូលបាន ១ប៊ីលានដុល្លារលឿនជាងគេនៅ Box Office ទូទាំងពិភពលោក យកឈ្នះកំណត់ត្រារបស់ភាពយន្ត "Star Wars: The Force Awakens”។

បើតាមការរាយការណ៍របស់ Deadline បានឲ្យដឹងថា ភាពយន្តនេះអាចរកបានចំណូល១ប៊ីលានដុល្លារក្នុងរយៈពេលតែ១១ថ្ងៃប៉ុណ្ណោះ ចំណែកឯ "The Force Awakens” ត្រូវការរយៈពេល១២ថ្ងៃកាលពីឆ្នាំ ២០១៥។ ភាពជោគជ័យរបស់ភាពយន្តនេះ បានធ្វើឲ្យផលិតកម្ម Disney រកចំណូលបាន ៣ប៊ីលានដុល្លារ បាត់ទៅហើយសម្រាប់ឆ្នាំ ២០១៨នេះ។ ប៉ុន្តែអ្វីដែលគួរឲ្យកត់សម្គាល់បំផុតនោះគឺ Avengers នឹងចាប់ដាក់បញ្ចាំងនៅប្រទេសចិនថ្ងៃទី ១១ខែឧសភានេះ ហើយនៅពេលដែលចាប់ផ្ដើមបញ្ចាំង ចំនួនទឹកប្រាក់នឹងកាន់តែកើនឡើងមិនធម្មតា។

ភាពយន្តនេះដែរក៏ដណ្ដើមដំណែងចំនួនប្រាក់ចំណូលសប្ដាហ៍ដំបូងពីរឿង "The Force Awakens” កាលពីសប្ដាហ៍មុន ដោយរកចំណូលបាន ២៥០លានដុល្លារ។ ភាពយន្ត "Black Panther” រកចំណូលបាន១ប៊ីលានដុល្លារ បន្ទាប់ពីដាក់បញ្ចាំងបាន៤សប្ដាហ៍កាលពីខែកុម្ភៈ៕

ប្រភព៖ The Verge ប្រែសម្រួល៖ ធារ៉ូ