គួរស្រលាញ់! Taylor Swift ធ្វើឲ្យក្មេងស្រីអាយុ៨ឆ្នាំម្នាក់រំភើបខ្លាំងនៅមន្ទីរពេទ្យ

2018-05-06 08:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Taylor Swift បានចំណាយពេលវេលាផ្ទាល់ខ្លួន ដើម្បីទៅជួបអ្នកគាំទ្រដែលជាក្មេងស្រីម្នាក់ដែលបានស្នាក់នៅមន្ទីរពេទ្យ កាលពីថ្ងៃសៅរ៍ម្សិលមិញនេះ។

តារារូបនេះបានទៅកាន់មន្ទីរពេទ្យ Arizona Burn Center ដែលមានទីតាំងនៅ Phoenix រដ្ឋ Arizona ដើម្បីទៅមើលអ្នកគាំទ្រម្នាក់ឈ្មោះ Isabella McCune ដែលមិនអាចមានលទ្ធភាពទៅទស្សនា Taylor ប្រគំតន្ត្រីទេសចរណ៍ "Reputation Tour” បាននៅថ្ងៃទី៨ខែឧសភានេះ ដោយសារតែមានរបួសព្រោះរលាកភ្លើងក្នុងគ្រោះថ្នាក់មួយកាលពីខែមីនា។

បើយោងទៅតាមការរាយការណ៍ពីសារព័ត៌មាន AZ Central បានឲ្យដឹងថា ក្មេងស្រីអាយុ ៨ឆ្នាំ Isabella បានថតវីដេអូមួយផ្ញើទៅកាន់ Taylor កាលពីដើមសប្ដាហ៍ប្រាប់ថា នាងមិនអាចទៅទស្សនាការប្រគំតន្ត្រីនោះបានទេ ដោយសារតែនាងមិនទាន់ជាពីរបួសនិងត្រូវស្នាក់នៅមន្ទីរពេទ្យ។

នៅក្នុងវីដេអូនោះដែរ នាងក៏បានសុំឲ្យ Taylor មកមើលនាងផងដែរ ដោយបាននិយាយថា "ខ្ញុំបានឭថាអ្នកបានមកទីនេះ ហើយខ្ញុំចង់ទៅទស្សនាអ្នកប៉ុន្តែខ្ញុំមិនអាចទៅបាន អីចឹងប្រសិនជាអ្នកមកមើលខ្ញុំវិញម្ដង ពិតជាល្អ"។

ចៃដន្យអី Taylor ក៏មកសូរសុខទុក្ខនាងមែន។ Taylor បានធ្វើឲ្យក្មេងស្រីម្នាក់នេះរំភើបចិត្តជាខ្លាំង មិនត្រឹមតែប៉ុណ្ណោះក៏បានថតរូបជាមួយក្រុមគ្រូពេទ្យនៅទីនោះជាច្រើនប៉ុស្តិ៍ផងដែរ៕

ប្រភព៖ Eonline ប្រែសម្រួល៖ ធារ៉ូ