រឿងរបស់ម្ចាស់មេដាយមាសស៊ីហ្គេម នី សំណាង គ្រោងបញ្ចាំង ៦ប្រទេស

2018-06-01 03:50:39
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងដែលមានចំណងជើងថា « បោកចំបាប់ ក្ដីសង្ឃឹមចុងក្រោយ » នឹងចាក់បញ្ចាំងនៅតាមរោងកុននានាក្នុងរាជធានីភ្នំពេញនៅ១ឬ២ពីខែខាងមុខ ដែលរឿងនេះកីឡាការិនី នី សំណាង ម្ចាស់មេដាយមាសស៊ីហ្គេមកាលឆ្នាំ២០១៣ ជាតួឯក ហើយគ្រោងចាក់បញ្ចាំង ៦ ប្រទេសផ្សេងទៀតក្រោយបញ្ចាំងចប់នៅខ្មែរ។

ឯកឧត្ដម វ៉ាត់ ចំរើន និងលោក Manish Sharma

ឯកឧត្ដម វ៉ាត់ ចំរើន អគ្គលេខាធិការនៃគណៈកម្មការជាតិអូឡាំពិកកម្ពុជា (NOCC) បានឲ្យដឹងថា ខ្សែរឿងនេះគឺនិយាយពីខ្សែជីវិតពិតៗ របស់កីឡាការិនី នី សំណាង ។ ខ្សែភាពយន្តដែលនិយាយពីរឿងពិតរបស់កីឡាករ-កីឡាការិនីដូច្នេះ ទើបតែមានលើកដំបូងបំផុតនៅស្រុកខ្មែរ ហើយលោកក៏រំពឹងថា ពិតជាអាចទទួលបានការចាប់អារម្មណ៍។

លោក Manish Sharma ផលិតកររឿងខាងលើបានឲ្យដឹងថា ការផលិតរឿងនេះត្រូវចំណាយដើមទុនប្រមាណជាង ២៥ ម៉ឺនដុល្លារអាមេរិក ហើយគុណភាពរឿងវិញគឺទៅកែខៃដល់ប្រទេសម៉ិកស៊ីកូ។ រឿងនេះដែរគ្រោងយកទៅបញ្ចាំងដល់ ៦ ប្រទេសគឺ មីយ៉ាន់ម៉ា ថៃ ឡាវ សិង្ហបុរី ហុងកុង និងឥណ្ឌា ក្រោយចាក់បញ្ចាំងនៅកម្ពុជា។ ចំពោះពេលវេលាជាក់លាក់ចាក់បញ្ចាំងនៅខ្មែរគឺមិនទាន់ច្បាស់ ប៉ុន្តែអាច ១ ឬ ២ ខែទៀត។

ខ្សែភាពយន្តនេះមានរយៈពេល ២ ម៉ោង ២៥ នាទី ដែលនិយាយពីខ្សែជីវិតពិតរបស់ នី សំណាង ព្រមទាំងការចាប់ផ្ដើមហ្វឹកហាត់ចំបាប់ដំបូង រហូតដល់អាចប្រជែងមេដាយមាសក្នុងព្រឹត្តិការណ៍ស៊ីហ្គេមជូនកម្ពុជា។ ខ្សែរឿងនេះក៏បានបញ្ជាក់ពីអារម្មណ៍ និងការតស៊ូរបស់កីឡាការិនីរូបនេះ ព្រមទាំងការបង្ខំឲ្យហាត់កីឡាចំបាប់ទាំងខ្លួនមិនចង់ ពីសំណាក់ឪពុករបស់ខ្លួនជាដើម៕