៧ វិធីធានា Hacker អាចប្រើពេលរាប់ខែ បើចង់ហេកទិន្នន័យរបស់អ្នក

2018-06-04 06:58:19
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចេកវិទ្យា បានដើរតួនាទីសឹងតែគ្រប់ផ្នែកនៅក្នុងសម័យកាលបច្ចុប្បន្ននេះ មិនថាផ្នែកសុខាភិបាល ការអប់រំ និងការកម្សាន្ត។

យ៉ាងណាមិញ ដោយសារបច្ចេកវិទ្យាមានការរីកចម្រើនលឿនហួសស្មាន បង្កបញ្ហាចោទមួយចំនួនដូចជាបញ្ហាសុវត្ថិភាពក្នុងការប្រើប្រាស់អ៊ីនធឺណិត នៅតែជារឿងចម្បងដែលអ្នកប្រើប្រាស់គ្រប់រូបព្រួយបារម្ភខ្លាំង។ ក្នុងនោះការបែកធ្លាយព័ត៌មានឯកជន ដោយការលួចយកពីសំណាក់ Hacker កើតឡើងក្នុងច្រើនសណ្ឋាន អាចជាកម្រិតស្រាលដោយការលួចយក គណនីបណ្ដាញសង្គម ឬឈានដល់កម្រិតធ្ងន់ដោយការលួចយកគណនីធនាគារជាដើម។

វិធីការពារខាងក្រោមនេះអាចជាដំណោះស្រាយមួយចំនួន ការពារពីការលុកលុយរបស់ Hacker ទោះបីមិនអាចទប់ស្កាត់បានប្រសិទ្ធភាព ១០០ ភាគរយ៖

១. ប្រើប្រាស់លេខសម្ងាត់ពិបាកៗ

ការប្រើប្រាស់លេខសម្ងាត់គណនី ដែលមានលាយគ្នារវាងអក្សរ លេខ សញ្ញា ឬក៏ដាក់ជាតួអក្សរតាមភាសាទៀតនោះ ជាប្រភេទលេខសម្ងាត់ ដែលខ្លាំងបំផុត ដែល Hacker ត្រូវប្រើពេលរាប់ខែ ទៅរាប់ឆ្នាំ បើចង់លួចចូលក្នុងគណនីរបស់អ្នក។

២. ត្រូវយល់ដឹងពីបណ្ដាញសង្គមឲ្យបានច្បាស់

បណ្ដាញសង្គមដែលអ្នកប្រើប្រាស់សព្វថ្ងៃ គួរណាប្រើសម្រាប់ទំនាក់ទំនងជាមួយមិត្តភក្ដិ ក្រុមគ្រួសារ និងអ្នកស្គាល់គ្នាបានហើយ មិនគួរឲ្យមានជនប្លែកមុខនៅក្នុងនោះទេ។ ម៉្យាងទៀត អ្នកក៏គួរតែឧស្សាហ៍ឆែកមើលការកំណត់ផ្នែកសុវត្ថិភាពលើគណនីសង្គមជាទៀងទាត់។

៣. រក្សាសុវត្ថិភាពរបស់ទូរសព្ទដៃ

ពេលឮដល់ការ Hack ភ្លាមមនុស្សភាគច្រើនបានគិតដល់តែលើការប្រើប្រាស់កុំព្យូទ័រ ភ្លេចគិតពីទូរសព្ទដៃ។ ទូរសព្ទក៏អាចឆ្លងមេរោគបានដូចកុំព្យូទ័រ ហើយបើអ្នកមានព័ត៌មានសម្ងាត់នានានៅលើនោះ Hacker ក៏អាចលួចយកបានដូចគ្នា។ វិធីល្អ គឺអ្នកកុំដោនឡូតកម្មវិធីណាពីប្រភពមិនគួរឲ្យទុកចិត្ត ព្រោះវាអាចផ្ទុកមេរោគនៅក្នុងនោះក៏ថាបាន។ ម៉្យាងទៀត អ្នកគួរតែដំឡើងប្រព័ន្ធប្រតិបត្តិការក្នុងទូរសព្ទដៃទៅកាន់ជំនាន់ចុងក្រោយបំផុត ព្រោះវាការពារពីចន្លោះប្រហោង ដែលកើតឡើងក្នុងប្រព័ន្ធប្រតិបត្តិការជំនាន់ចាស់។

៤. ប្រើប្រាស់ការបម្លែងទិន្នន័យ

ចំពោះព័ត៌មានសម្ងាត់ខ្លាំងដូចជាលេខគណនី ព័ត៌មានពីថវិកាគួរតែត្រូវបានបម្លែង (Encrypted) កុំឲ្យ Hacker អាចមើលយល់នៅពេល Hack ចូលបាន។

៥. លាក់ព័ត៌មានផ្ទាល់ខ្លួនលើបណ្ដាញសង្គម

ព័ត៌មាននានាដូចជាលេខទូរសព្ទផ្ទាល់ខ្លួន និងរូបភាពនានាទាក់ទងនឹងព័ត៌មានផ្ទាល់ខ្លួន គឺជារឿងដែលមិនគួរឲ្យអ្នកដទៃមើលឃើញជាសាធារណៈទេ។ អ្នកត្រូវពិនិត្យមើលពីសុវត្ថិភាព នៃគេហទំព័រដែលអ្នកប្រុងនឹងឲ្យទិន្នន័យផ្ទាល់ខ្លួន ដូចជាព័ត៌មានពីកាតធនាគារជាដើម ថាតើវាគួរឲ្យទុកចិត្តឬអត់។

៦. អាប់ដេតកុំព្យូទ័ររបស់អ្នក

ការអាប់ដេតទៅកាន់ប្រព័ន្ធប្រតិបត្តិការចុងក្រោយ ឬការដំឡើងកម្មវិធីដែលចេញមកសម្រាប់ជួសជុលចន្លោះប្រហោងនៃ ប្រព័ន្ធប្រតិបត្តិការចាស់ជារឿងដែលអ្នកប្រើប្រាស់កុំព្យូទ័រទាំងអស់គ្នាគួរតែធ្វើ។

៧. ការដាក់កម្មវិធីកម្ចាត់មេរោគ

កម្មវិធីមកស្រាប់ៗដែលអាចកម្ចាត់មេរោគបានលើប្រព័ន្ធប្រតិបត្តិការកុំព្យូទ័រ ដូចជា Windows Defender មានប្រយោជន៍សម្រាប់ទប់ស្កាត់ការជ្រៀតចូលនៃមេរោគនានា។ យល់ល្អ អ្នកគួរដំឡើងកម្មវិធីកម្ចាត់មេរោគថែមទៀត ទាំងលើទូរសព្ទដៃ និងនៅលើកុំព្យូទ័រ ជៀសវាងការជ្រៀតចូលនៃមេរោគបច្ចេកវិទ្យាទាំងនោះ។

អត្ថបទគួរអាន៖

ទីបំផុត Google ព្រមដកខ្លួនពីគម្រោងមហាប្រល័យ ក្រោយបុគ្គលិកតវ៉ាច្រើនពេក

ប្រភព៖ krazytech ប្រែសម្រួល៖ ផាត សុវត្ថិ