ឧស្សាហកម្មភាពយន្តខ្មែរចាប់ផ្ដើមជ្រួលច្របល់ ចំពោះការមកដល់ជាថ្មីនៃភាពយន្តថៃ

2014-09-20 17:38:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលក្នុងឧស្សាហកម្មភាពយន្តខ្មែរ បានកើតមានការព្រួយបារម្ភ ចំពោះការបើកឲ្យហូរចូលឡើងវិញនូវភាពយន្តថៃ ដោយផ្អែកទៅលើអតីតកាលកាលពីអំឡុងឆ្នាំទសវត្សរ៍៩០ ដែលកាលណោះភាពយន្តក្នុងស្រុក បានដួលសន្លប់ស្ដូកដោយចាញ់ឥទ្ធិពលភាពយន្តប្រទេសជិតខាងមួយនេះ។

ការព្រួយបារម្ភរបស់សិល្បករ កើតមានបន្ទាប់ពីស្ថានទូតថៃប្រចាំនៅកម្ពុជា ថ្មីៗនេះ បានធ្វើសន្និសីទសារព័ត៌មានមួយ ដើម្បីស្វែងរកឱកាសឲ្យខ្សែភាពយន្ត ពិសេសភាពយន្តភាគរបស់គេមានវត្តមានឡើងវិញលើកញ្ចក់ស្ថានីយទូរទស្សន៍នានារបស់កម្ពុជា បន្ទាប់អាក់ខានតាំងពីឆ្នាំ ២០០៣មកដោយសារកុប្បកម្មដុតស្ថានទូតដោយពលរដ្ឋខ្មែរ ប្រឆាំងនឹងតារាសម្ដែងម្នាក់របស់ថៃ គឺនាង កូប ស៊ីវណាន់ខុងយីង ដែលបាននិយាយថា ប្រាសាទអង្គរវត្តជារបស់ជនជាតិគេ។

សកម្មភាពថតភាពយន្តក្នុងស្រុក(រូបថត៖ FB លោក ទេព រិនដារ៉ូ)

ការព្រួយបារម្ភនេះដែរ ក៏ដោយសារមានព័ត៌មានចេញមកថា មានទូរទស្សន៍ក្នុងស្រុកចំនួន២-៣រួចហើយ បានបើកភ្លើងខៀវសម្រាប់ទទួលយកភាពយន្តភាគថៃទៅចាក់បញ្ចាំងនៅលើកញ្ចក់ទូរទស្សន៍របស់គេ ។

សិល្បករជើងចាស់ដែលធ្លាប់ឆ្លងកាត់សម័យភាពយន្តក្នុងស្រុកសន្លប់ស្ដូកនោះ លោក ហម ឈរ៉ា ថ្លែងថា លោកមិនពេញចិត្តឡើយ ព្រោះថាវត្តមានរបស់ភាពយន្តថៃនាពេលនេះ ឬពេលអនាគត នឹងនាំទៅដល់ការដួលរលំជាថ្មីនៃភាពយន្តក្នុងស្រុកដែលកំពុងស្ទុះឡើងនាពេលបច្ចុប្បន្ន។ "ខ្ញុំទើបតែនិយាយអម្បាញ់មិញពីរឿងហ្នឹង និយាយទៅខ្ញុំអត់ពេញចិត្ត ភាពយន្តយើងកំពុងតែស្ទុះឡើង ផលិតករ សិល្បករកំពុងតែដុតដៃដុតជើង ដល់ឥឡូវទៅអីចឹងវិញ ខ្ញុំគិតថា មិនមានផលល្អឡើយ"។

លោក បន្តដោយសង្កត់ធ្ងន់ថា វត្តមានភាពយន្តថៃ នឹងបង្កើតឲ្យមានការប្រកួតប្រជែងខ្លាំងមួយជាមួយភាពយន្តក្នុងស្រុក ហើយនោះគឺជាការប្រកួតមួយដែលយើងដឹងថាចាញ់មុនរួចស្រេចទៅហើយ។

មិនត្រឹមតែសិល្បករជើងចាស់ដែលធ្លាប់ឆ្លងកាត់សម័យភាពយន្តដេកលក់នោះទេ សូម្បីតែសិល្បករជើងថ្មីក៏ព្រួយបារម្ភដូចគ្នា។ កញ្ញា សៀក សក្ដិរុណា តារាសម្ដែងវ័យក្មេងដែលទើបចូលប្រឡូកសិល្បៈបានប្រមាណ១ឆ្នាំ និងទើបមានទីផ្សារសម្ដែងនោះ ថ្លែងថា នាងព្រួយខ្លាចថា វត្តមានភាពយន្តថៃ នឹងធ្វើឲ្យនាងថមថយឱកាសការងារ។

“ខ្ញុំអត់បានឆ្លងកាត់ទេ ប៉ុន្តែខ្ញុំធ្លាប់លឺគេនិយាយពីភាពយន្តយើងចាញ់ភាពយន្តថៃពីមុន ដល់លឺថា ភាពយន្តហ្នឹងជិតមកវិញ អីចឹងខ្ញុំភ័យដែរហ្នឹង ព្រោះថាមិនត្រូវ តែភាពយន្តយើងធ្លាក់ចុះការផលិត យើងអ្នកសម្ដែងក៏អត់មានអីសម្ដែងដែរ!"។

ផ្ទុយពីសិល្បករផ្សេងៗ អ្នកស្រី ឌី សាវ៉េត សិល្បករជើងចាស់មួយរូប បានស្វាគមន៍ការមកដល់នៃភាពយន្តថៃទៅវិញ។ អ្នកស្រី ថ្លែងថា " ខ្ញុំបានលឺហើយ...រឿងហ្នឹងវាទាក់ទងនឹងការធ្វើសមាហរណកម្មអាស៊ាន ក្នុងនោះមានការផ្លាស់ប្តូរទំនាក់ទំនងនយោបាយ ពាណិជ្ជកម្ម និងភាពយន្តជាដើម។ ខ្ញុំដឹងថា កន្លងមកយើង និងថៃធ្លាប់មានបញ្ហាជាមួយគ្នាមួយចំនួន ប៉ុន្តែបំភ្លេចចោលទៅ...ចាប់ផ្ដើមជាថ្មី ថៃជាប្រទេសជិតខាងយើងតើ ធ្វើការជាមួយគ្នាទៅយើងនឹងបានសិក្សាពីគ្នាទៅវិញទៅមក បើយើងប្រឹង យើងតស៊ូយើងមិនដួលឡើយ"។

វិលមកលោក ទិត្យ ធារិទ្ធ អ្នកដឹកនាំរឿងល្បីឈ្មោះមួយវិញ លោកបានប្រាប់ថា លោក ព្រួយបារម្ភខ្លាំងណាស់ចំពោះស្ថានភាពនេះ បើទោះជាភាពយន្តយើងកំពុងស្ទុះឡើង ប៉ុន្តែមិនគ្រប់គ្រាន់សម្រាប់ប្រកួតប្រជែងជាមួយនឹងភាពយន្តគេឡើយ។

"និយាយពីបារម្ភ គឺខ្ញុំបារម្ភខ្លាំងបំផុត ប៉ុន្តែខ្ញុំក៏យល់...វាជាទីផ្សារសេរី យើងមិនអាចហាមឃាត់ទេ ព្រោះរឿងអាមេរិក កូរ៉េអីយើងឲ្យចូល រឿងអីថៃយើងមិនឲ្យចូល ធ្វើអីចឹងវាដូចជាមិនស្មើភាព។ អីចឹងយោងលើស្ថានភាពនេះ ទោះខ្ញុំបារម្ភលើសនេះ១០ដង ១០០ដងក៏អត់ប្រយោជន៍ដែរ រឿងដែលយើងអាចធ្វើបាន មានតែខំពង្រឹងគុណភាពទៅ!”។

យ៉ាងណាជាមួយគ្នានេះ លោកក៏ស្នើឲ្យផ្នែកដែលពាក់ព័ន្ធត្រួតពិនិត្យលើបញ្ហាមួយចំនួនផង ដើម្បីធានាដល់ភាពស្នើគ្នាចំពោះភាពយន្តក្នុងស្រុក។ "ចំណុចខ្លះរឿងយើងមិនអាចធ្វើបានទេ ដូចរឿង"ស្បែកគង់" ជាដើម គ្រាន់តែចេញសាច់ខ្នង ក្រសួងដាក់ថា ហាមក្មេងក្រោម១៨ឆ្នាំមើល ប៉ុន្តែបើយើងមើលភាពយន្តអាមេរិកអីគេធ្វើបាន ឯរឿងថៃ មានទាំងឈុតលោកសង្ឃខ្មោចលងរត់របូតស្បង់អីគេធ្វើបាន តែយើងធ្វើអត់បានទេ អីចឹងសូមពិនិត្យលើបញ្ហា ព្រោះវានាំខូចវប្បធម៌យើងដូចគ្នា"។

បន្ថែមពីលើនេះ តម្លៃទាបពេកនៃការនាំចូលភាពយន្តបរទេស ក៏ជាបញ្ហាមួយដែលធ្វើឲ្យភាពយន្តក្នុងស្រុកពិបាកប្រកួតប្រជែងដែរ។ អ្នកដឹកនាំរូបនេះលើកឡើងថា "គួរយកថ្លៃឲ្យខ្ពស់ ពុំនោះទេ រឿងយើងមិនអាចប្រកួតប្រជែងបានឡើយ។ រឿងគេយកមកសុទ្ធជារឿងសល់ មានន័យគេចំណេញនៅគេរួចហើយ អីចឹងយកមកយើងគេសឹងតែឲ្យទទេ តែរឿងយើង១ភាគ បើក្រោម១ពាន់ដុល្លារ យើងមិនអាចធ្វើបានទេ អីចឹងសូមជួយគិតគូរលើចំណុចនេះ ម្យ៉ាងនឹងបានថវិកាចូលរដ្ឋផង"។

ពាក់ព័ន្ធការហូរចូលជាថ្មីនៃភាពយន្តថៃចូលមកក្នុងប្រទេសកម្ពុជា លោក ស៊ិន ច័ន្ទសាយ៉ា ប្រធាននាយកដ្ឋានភាពយន្តបានថ្លែងថា នាយកដ្ឋានរបស់លោកមិនមានសិទ្ធិហាមឃាត់ឡើយ ព្រោះជាទីផ្សារសេរី។ លោកថា ភាពយន្តថៃអាចឈរជើងបាន ឬមិនបាន អាស្រ័យលើការគាំទ្ររបស់ទស្សនិកជនប៉ុណ្ណោះ៕

អត្ថបទ៖ ទារិកា