ចាយទុនពិសោធន៍ឡើង ១៥ឆ្នាំ! ហ្វ្រាំង ABS ល្បីតាំងពីឡានដល់ម៉ូតូ មានដឹងក្រុមហ៊ុនណាបង្កើតដំបូងគេអត់?

2018-07-02 07:39:59
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្ត និងម៉ូតូសេរ៊ីក្រោយៗ ភាគច្រើនសុទ្ធតែផលិតមកដោយបំពាក់ Anti-lock Braking System (ABS) ដែលជាបច្ចេកវិទ្យាជំនួយរាល់ពេលចាប់ហ្វ្រាំង ដោយមិនចាប់ឲ្យកង់ឈប់ស្ងៀមនោះទេ គឺវានឹងចាប់ប្រលែងៗ ដោយខ្លួនឯង មិនធ្វើឲ្យរអិលដូចហ្វ្រាំងធម្មតា ហើយឈប់បានលឿនជាង។

ABS បង្កើតចេញដំបូងនៅឆ្នាំ ១៩៧៨ ដោយ Bosch ដែលក្រុមហ៊ុននេះចំណាយដើមទុនមួយចំនួនរបស់ខ្លួនរយៈពេល ១៥ឆ្នាំ ទើបបច្ចេកវិទ្យាមួយនេះលេចជារូបរាងឡើង។

ដុំ ABS

លោក Andre de Jong អគ្គនាយក Bosch ប្រចាំកម្ពុជា បាននិយាយប្រាប់ Sabay ថា៖ "យើងជាក្រុមហ៊ុនទី ១ ដែលបញ្ចេញ ABS កាលពីឆ្នាំ ១៩៧៨ ដោយកាលនោះ យើងចំណាយ ៨-១០% នៃចំនួនលុយដែលលក់បាន ឲ្យទៅ R&D (Reseacher Development) រយៈពេល ១៥ឆ្នាំ ទើបផលិតបាន ABS”។

អគ្គនាយក Bosch ខាងលើ ក៏បានបន្ថែមថា ក្រៅពី ABS, Electronic Stability Control (ESC បច្ចេកវិទ្យាទប់ឡានមិនឲ្យគ្រលែង) ក៏ Bosch បង្កើតមុនគេដែរ ដោយចំណាយទុន ១០ឆ្នាំ ហើយចេញដំបូងនៅឆ្នាំ ១៩៩៥។

លោក Andre de Jong អគ្គនាយក Bosch ប្រចាំកម្ពុជា និយាយក្នុងពិព័រណ៍ផលិតផលអឺរ៉ុប ២០១៨

បច្ចុប្បន្ន ឡានសរុបទូទាំងពិភពលោក ប្រើប្រព័ន្ធហ្វ្រាំង ABS ប្រមាណ ៧០% និង ៦៤% សម្រាប់ ESP ដោយប្រទេសមួយចំនួនធំនៅប៉ែកអឺរ៉ុប សុទ្ធតែតម្រូវឲ្យមានប្រព័ន្ធសុវត្ថិភាពទាំង ២ នេះ។

កាលពីចុងសប្ដាហ៍មុន Bosch ក៏បានតាំងពិព័រណ៍ផលិតផលអឺរ៉ុប ២០១៨ នៅកោះពេជ្រ ដោយក្រៅពីផលិតផលទាំងទងគ្រឿងឡាន ក៏មានឧបករណ៍ប្រើប្រាស់ក្នុងវិស័យសំណង់ ឧបករណ៍ផ្ទះបាយដូចជាម៉ាស៊ីនកាហ្វេ ម៉ាស៊ីនលាងចាន ទូទឹកកក ឧបករណ៍ប្រព័ន្ធសុវត្ថិភាព (កាមេរ៉ា...) និងឧបករណ៍បំពងសំឡេងជាដើម។

សម្រាប់ព័ត៌មានបន្ថែម ចូលទៅផេកហ្វេសប៊ុក Bosch Cambodia ៕