ព្រោះតែតែតចូលទីខ្លួនឯង ធ្វើឲ្យ Fernandinho ទទួលសារគំរាមសម្លាប់និងរើសអើង

2018-07-09 04:17:52
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធបាល់ទាត់ប្រទេសប្រេស៊ីលហៅកាត់ថា CBF បានរិះគន់ទៅកាន់អ្នកគាំទ្រដែលគំរាមសម្លាប់និងរើសអើងពូជសាសន៍ដល់ Fernandinho និងក្រុមគ្រួសារ ក្រោយចាញ់បែលហ្ស៊ិក ២-១។

ក្នុងចំណោម២គ្រាប់ជ័យជម្នះរបស់បែលហ្ស៊ិក Fernandinho បានភ្លាត់ធ្វើឲ្យចូលទីខ្លួនឯង មុនពេល Kevin De Bruyne ទាត់ទម្លុះសំណាញ់ទីយ៉ាងល្អ ទម្លាក់ប្រេស៊ីលត្រឹមវគ្គ៨ក្រុមចុងក្រោយព្រឹត្តិការណ៍ World Cup។

កាលពីថ្ងៃអាទិត្យម្សិលមិញ សហព័ន្ធបាល់ទាត់ប្រទេសប្រេស៊ីលបានបង្ហាញអារម្មណ៍និងរិះគន់ចំពោះការរើសអើងពូជសាសន៍ ដោយសរសេរការពារ Fernandinhoថា៖ " CBF មិនអាចទទួលយកការវាយប្រហាររើសអើងពូជសាសន៍លើ Fernandinho និងគ្រួសារបានទេ។ បាល់ទាត់គឺតំណាងឲ្យការរួបរួម ពណ៌សម្បុរ ភេទ វប្បធម៌និងមនុស្ស។ ពួកយើងនៅជាមួយអ្នក។ ការរើសអើងពូជសាសន៍នឹងមិនទៅមុខទេ"។

មានអ្នកលេងអ៊ីនធឺណិតមួយចំនួនបានផ្ញើរូបសត្វស្វាទៅកាន់់ Fernandinho បង្ហាញពីការរើសអើងពូជសាសន៍ ខណៈអ្នកគាំទ្រខ្លះគំរាមសម្លាប់គេទៀតផង ក្រោយប្រេស៊ីលចាញ់។ ក្រៅពីអំពើខាងលើ កាលពីម្សិលមិញបានលេចធ្លាយវីដេអូអ្នកគាំទ្រប្រេស៊ីលនាំគ្នាឈរនៅផ្លូវកាន់ ដុំថ្ម ពងមាន់ និងវត្ថុផ្សេងៗ គប់លើឡានរបស់ជម្រើសជាតិ៕