មូលហេតុនេះ ធ្វើឱ្យក្រសួងការពារជាតិ លេងល្អនៅតង់ទី២ ហើយយកឈ្នះក្រោន ៥-១

2018-07-09 07:21:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងការពារជាតិ បានយកឈ្នះលើក្រុមម្ចាស់ផ្ទះភ្នំពេញក្រោន ក្នុងលទ្ធផល ៥-១ នាការប្រកួតលីគកំពូលកម្ពុជានាសប្ដាហ៍ទី១៣។

នាការប្រកួតម្សិលមិញនេះ ក្រោនមានឱកាសនាំមុខក្រសួងការពារជាតិ មុនទៅហើយនៅតង់ទី១ ក្នុងលទ្ធផល ១-០។ ខណៈដែលចូលដល់តង់ទី២វិញ ក្រុមរបស់លោក ភា សុភក្ត្រា បែរជាធ្វើបានល្អជាងវិញ ដោយអាចរកគ្រាប់បាល់បានដល់៥គ្រាប់ឯណោះ ហើយបិទម្ចាស់ផ្ទះត្រឹម១គ្រាប់នៅតង់ទី១នោះឯង។

លោក ភា សុភក្ត្រា

ចំពោះបច្ចេកទេសធ្វើបានល្អនៅតង់ទី២នេះដែរ លោក ភា សុភក្ត្រា គ្រូបង្វឹកក្រុមក្រសួងការពារជាតិ បានបញ្ជាក់ថា៖ “យើងធ្វើមិនបានល្អនៅតង់ទី១ ដោយសារតែទីលានមានទឹកច្រើនកន្លែង។ កត្តានេះ បានធ្វើឱ្យចង្វាក់ប្រយុទ្ធរបស់ក្រសួងការពារជាតិ មិនអាចទៅមុខបាន ខណៈដែលបាល់បញ្ចូលក៏មិនល្អទៀត។ ចូលដល់តង់ទី២ ក្រុមលេងបានល្អវិញ ដោយសារតែទឹកជ្រាបអស់ ណាមួយប្ដូរខាងលេងផង ទើបធ្វើឱ្យចង្វាក់ប្រយុទ្ធបានយ៉ាងល្អ។ ស្របពេលដែលប្រព័ន្ធការពារក្រោន ហាក់មានចន្លោះប្រហោងផង ទើបអាចរកគ្រាប់បាល់បានច្រើន”។

ជ័យជម្នះនេះដែរ បានធ្វើឱ្យក្រសួងការពារជាតិនៅរក្សាចំណាត់ថ្នាក់លេខ៤ ក្នុងតារាងដដែល ព្រោះថាក្រុម៣ខាងលើ បឹងកេត ណាហ្គាវើល និងវិសាខា សុទ្ធតែទទួលបានលទ្ធផលជ័យជម្នះទាំងអស់៕