ទេព សុវិចិត្រ ជនជាតិខ្មែរម្នាក់គត់ ឡើងធ្វើជាវាគ្មិន "ពុម្ពអក្សរអាស៊ីអាគ្នេយ៍"

2018-07-25 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនដ៏មានទេពកោសល្យម្នាក់គឺ ទេព សុវិចិត្រ ត្រូវបានគណៈកម្មការកម្មវិធីថ្នាក់តំបន់មួយជ្រើសរើសជាវាគ្មិនក្នុងកម្មវិធី "ពុម្ពអក្សរអាស៊ីអាគ្នេយ៍" ដែលនឹងធ្វើឡើងនៅក្នុងប្រទេសថៃចាប់ពីថ្ងៃទី ១ ដល់ ៥ ខែតុលាឆ្នាំ ២០១៨ ខាងមុខ។ យ៉ាងណាក្ដី តំណែងជាវាគ្មិននេះមិនមែនជាលើកទី១ នោះពោលគឺ យុវជនរូបនេះ ធ្លាប់បានចូលរួមម្ដងរួចមកហើយ។

តោះ! កុំឲ្យខាតពេលយូរ មកដឹងពីបទពិសោធន៍ របស់អតីតអ្នកសម្របសម្រួលគេហទំព័រ Wikipedia ភាសាខ្មែររូបនេះ ធ្លាប់បានធ្វើនៅកម្មវិធីខាងលើ៖

សុវិចិត្រ បានប្រាប់ Sabay ឲ្យដឹងថា រូបគេបានជួបជជែកជាមួយអ្នករៀបចំសិក្ខាសាលានេះហើយ ក្រោយៗមក ក៏បានទាក់ទងគ្នាបន្ត និងជួយឆ្លើយសំណួររបស់អ្នករៀបចំរូបនោះ ទាក់ទងនឹងអក្សរខ្មែរ។ ដោយឃើញអំពីការងារ រួមទាំងការលម្អិតពីតួអក្សរខ្មែរ ដែលគេបានដាក់បញ្ចូលក្នុងពុម្ពអក្សរថ្មីៗទៅក្នុង Google Font ផងនោះ ក៏ត្រូវអ្នករៀបចំក៏បានអញ្ជើញរូបគេឲ្យទៅបង្រៀនដោយផ្ទាល់នៅទីក្រុងបាងកក ប្រទេសថៃកាលពីឆ្នាំ២០១៦។

ដោយសារកម្មវិធី "ពុម្ពអក្សរអាស៊ីអាគ្នេយ៍" នេះដែរ វិចិត្រក៏បានជួបអ្នកដឹកនាំក្រុមហ៊ុនធ្វើពុម្ពអក្សរមួយពីរដែរ នៅស្រុកថៃ ហើយបានរៀនខ្លះៗអំពីការងាររបស់ពួកគេនៅទីនោះ និងក្នុងអន្តរជាតិ។

វិចិត្រ បានរៀនចេះច្រើនពីកម្មវិធីនេះ ជាពិសេសអំពីស្ថានភាពនៃទីផ្សារពុម្ពអក្សរ តម្លៃនៃតួអក្សរ និងលក្ខណៈខុសប្លែកគ្នានៃតួអក្សរក្នុងអាស៊ីអាគ្នេយ៍។

វិចិត្រ ជាមួយនឹងវាគ្មិនមកពីប្រទេសដទៃ | រូបភាព៖ fontpad

ក្រោយបន្ទាប់ពីនេះ (ក្នុងឆ្នាំដដែល) យុវជនវ័យ២៣ ឆ្នាំក៏បានយកចំណេះដឹងទាំងនោះ មកជួយរៀបចំវគ្គសិក្សាអំពីការឌីហ្សាញពុម្ពអក្សរ នៅទីក្រុងភ្នំពេញវិញ។ ដោយសារការខិតខំ និងស្នាដៃថ្មីប្លែកៗចេញជារូបរាង បន្តបន្ទាប់នៅក្នុងឆ្នាំ ២០១៨ នេះ វិចិត្រត្រូវបានអ្នករៀបចំកម្មវិធី "ពុម្ពអក្សរអាស៊ីអាគ្នេយ៍" អញ្ជើញឲ្យទៅធ្វើជាអ្នកបង្រៀននៅទីនេះម្ដងទៀត។

វិចិត្របានបន្ថែមទៀតថា "រូបគេទទួលបានតួនាទីជាអ្នកបង្រៀន(Local Expert) និងចែករំលែកដល់អ្នកចូលរួម ឱ្យបានយល់អំពីមូលដ្ឋានក្នុងការឌីហ្សាញតួអក្សរខ្មែរ និងបច្ចេកទេសផ្សេងៗទៀត ដើម្បីឱ្យការឌីហ្សាញរបស់អ្នកចូលរួម មានលក្ខណៈជាតិ ឱ្យសមស្របទាក់ទាញ និងជារបស់ដែលជាវប្បធម៌ខ្មែរ។

រំឭកដែរថាសិក្ខាសាលាអំពី «ពុម្ពអក្សរអាស៊ីអាគ្នេយ៍» រួមមាន អក្សរខ្មែរ អក្សរថៃ អក្សរឡាវ និងអក្សរភូមា ដោយមានការចូលរួមពីអ្នកជំនាញក្នុងតំបន់ និងអ្នកឌីហ្សាញអក្សរមកពីបរទេស ដែលធ្វើឡើងនៅដើមខែតុលា ឆ្នាំ២០១៨ ខាងមុខនេះ៕