វៀតណាម ប្រកាសប្រមូលថ្នាំ ៥៧ ប្រភេទមកវិញ ព្រោះអាចបង្កជំងឺមហារីក
- 2018-08-05 03:46:03
- ចំនួនមតិ 0 | ចំនួនចែករំលែក 0
វៀតណាម ប្រកាសប្រមូលថ្នាំ ៥៧ ប្រភេទមកវិញ ព្រោះអាចបង្កជំងឺមហារីក
ចន្លោះមិនឃើញ
ក្រសួងសុខាភិបាលវៀតណាម បានប្រកាសប្រមូលថ្នាំបេះដូងចំនួន ៥៧ប្រភេទត្រឡប់មកវិញ ក្រោយរកឃើញថាមានផ្ទុកសារធាតុដែលអាចបង្កជំងឺមហារីក។
រដ្ឋបាលឱសថនៃប្រទេសវៀតណាម និយាយថាថ្នាំដែលប្រមូលមកវិញនេះ មានផ្ទុកសារធាតុ Valsartan ដែលផលិតដោយក្រុមហ៊ុនមួយក្នុងប្រទេសចិន។ លើសពីនេះទៀត វាត្រូវបានរកឃើញថាមាន N-nitrosodimethylamine (NDMA) ដែលអាចបង្កឲ្យមានជំងឺមហារីកបាន ប្រសិនបើប្រើប្រាស់ក្នុងរយៈពេលយូរ។ ក្នុងចំណោមថ្នាំទាំងអស់ ថ្នាំចំនួន ៣២ប្រភេទត្រូវបានផលិតក្នុងប្រទេសវៀតណាមផ្ទាល់ ហើយ ២៥ប្រភេទទៀតត្រូវបាននាំចូលពីប្រទេសចិន។
ជាមួយគ្នាដែរ ថ្នាំទាំង ៣២ប្រភេទ ត្រូវបានផលិតដោយក្រុមហ៊ុនចំនួន ១៣ដែលបាននាំចូលសារធាតុ Valsartan ពីក្រុមហ៊ុនចិនឈ្មោះ Zhejiang Huahai Pharmaceutical Co., Ltd។ ក្នុងប្រទេសវៀតណាម ថ្នាំដែលមានផ្ទុកសារធាតុ Valsartan ត្រូវបានប្រើប្រាស់សម្រាប់ការឡើងសម្ពាធឈាមខ្ពស់, ជំងឺខ្សោយបេះដូង និងគាំងបេះដូងជាដើម។
គួរបញ្ជាក់ថា រដ្ឋបាលវៀតណាមក៏បានចេញបញ្ជីថ្នាំទាំង ៥៧ប្រភេទដែលត្រូវប្រមូលមកវិញ ហើយស្នើសុំដល់អ្នកផលិត និងអ្នកនាំចូលទូទាំងប្រទេស ឲ្យបញ្ឈប់ការលក់ និងប្រើប្រាស់ជាបន្ទាន់ដើម្បីជៀសវាងពីការកើតជំងឺមហារីក៕