លម្អិតរឿង Honda មកដឹកនាំកម្ពុជាយ៉ាងមិច បើខ្លួនជាប់លេងនៅលីគអូស្ត្រាលី

2018-08-14 02:56:01
ចំនួនមតិ 0 | ចំនួនចែករំលែក 0

ចន្លោះមិនឃើញ

Keisuke Honda កីឡាករបាល់ទាត់ល្បីឈ្មោះរបស់ជប៉ុន ត្រូវបានសហព័ន្ធកីឡាបាល់ទាត់កម្ពុជា ប្រកាសតែងតាំងជាអ្នកចាត់ការទូទៅរបស់ក្រុមជម្រើសជាតិកម្ពុជាហើយ ដោយមានកុងត្រា២ឆ្នាំ ដឹកនាំមិនយកប្រាក់ខែទេ។

ការប្រកាសតែងតាំងនេះ បានធ្វើឱ្យអ្នកគាំទ្រភ្ញាក់ផ្អើល ដោយសូម្បីកាសែតធំៗជាច្រើនក៏សឹងមិនគួរឱ្យជឿផងដែរ ព្រោះថា Honda នៅជាកីឡាករបាល់ទាត់នៅឡើយ ហើយមិនទាន់មានលិខិតបញ្ជាក់ពីការចូលរួមបណ្ដុះបណ្ដាលវិជ្ជាជីវៈគ្រូបង្វឹកឡើយ។ បើអីចឹង តើតួនាទីអ្នកចាត់ការទូទៅរបស់គេ អាចដឹកនាំក្រុមជម្រើសជាតិកម្ពុជាដោយរបៀបណា។

ខ្សែប្រយុទ្ធដែលទើបប្រកាសចូលនិវត្តពីជម្រើសជាតិជប៉ុនក្រោយចប់ World Cup 2018 បានប្រកាសរូបគេមកដឹកនាំកម្ពុជា ដើម្បីឱ្យជម្រើសជាតិមាន Style លេងថ្មីមួយ។ ចំពោះរឿងបង្ហាត់វិញ លោកអាចនឹងប្រើដៃស្ដាំរបស់ខ្លួនឈ្មោះថា Felix Agustin Gonzalez Dalmas មកដឹកនាំក្រុមជម្រើសជាតិកម្ពុជាផ្ទាល់នៅកម្ពុជា។ ដោយឡែក សម្រាប់លោកវិញ នឹងប្រើបច្ចេកវិទ្យា VIDEO Call សម្រាប់ទាក់ទងកីឡាករជម្រើសជាតិកម្ពុជា ក៏ដូចជាគ្រូបង្វឹកនៅកម្ពុជា។ ប្រសិនបើការប្រកួតរបស់ជម្រើសជាតិមិនប៉ះពាល់ដល់ការប្រកួតនៅអូស្ត្រាលីទេ នោះលោកនឹងមកផ្ទាល់តែម្ដង។

ដោយនេះបញ្ជាក់យ៉ាងច្បាស់ថា Honda នឹងនៅតែជាកីឡាករបាល់ទាត់របស់ក្លឹប Melbourne របស់អូស្ត្រាលីដដែល បើទោះជាបានធ្វើជាអ្នកចាត់ការក្រុមជម្រើសជាតិក៏ដោយ។ និយាយពីការប្រកួតផ្លូវការវិញ Honda មានឱកាសបានចូលទីលានបាន ដោយប្រើងាជាគណៈប្រតិភូដឹកនាំក្រុមជម្រើសជាតិ មិនមែនប្រើតួនាទីគ្រូបង្វឹកឡើយ ព្រោះរូបគេមិនមានលិខិតបញ្ជាក់ពីការចូលរួមបណ្ដុះបណ្ដាលវិជ្ជាជីវៈគ្រូបង្វឹកឡើយ។

ក្រៅពីធ្វើជាអ្នកដឹកនាំក្រុមជម្រើសជាតិនេះហើយ Honda នៅមានការងារមួយទៀតនៅកម្ពុជា ដោយរូបគេនឹងធ្វើជាទូតសុច្ឆន្ទៈវប្បធម៌ ដើម្បីជួយផ្សព្វផ្សាយពីតំបន់ទេសចរណ៍នានារបស់កម្ពុជា ទៅកាន់ពិភពលោក។

រំលឹកពីកាល Honda មកកម្ពុជាដំបូង នៅឆ្នាំ២០១៥ អំឡុងពេលក្រុមជម្រើសជាតិជប៉ុន ប្រកួតជម្រុះ World Cup 2018 ជាមួយកម្ពុជា ដោយគ្រានោះជប៉ុនឈ្នះ ២-០។ ក្រោយមកទៀត នៅឆ្នាំ២០១៦ កីឡាករខាងលើបានមកកម្ពុជាម្ដងទៀត ដោយបង្កើតជាសាលាបាល់ទាត់បណ្ដុះបណ្ដាលយុវជននៅកម្ពុជាឈ្មោះថា Honda Soltilo Soccer School។ រំលងបានប៉ុន្មាន Honda ក៏បានបង្កើតជាក្លឹបបាល់ទាត់មួយនៅខេត្តសៀមរាបទៀត ឈ្មោះថា សូទីឡូអង្គរ ដែលបច្ចុប្បន្ននេះកំពុងលេងនៅលីគកំពូលកម្ពុជា៕

អត្ថបទ៖ មុន្នីរម្យ