ក្រុមហ៊ុនធំៗចូលបក្សឆកអស់ ទុកឲ្យ Samsung កណ្ដោចកណ្ដែងតែឯង

2018-08-20 07:36:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការណ៍ដែលក្រុមហ៊ុនផលិតទូរសព្ទធំៗមួយចំនួនលួចចម្លងពីគេឯង ដូចជាចម្លងពី Apple ជាដើមនោះ ត្រូវបានគេចាត់ទុកថាជារឿងធម្មតាទៅហើយក្នុងសហគ្រាសស្មាតហ្វូន។ ប៉ុន្តែគេមិនធ្លាប់ឃើញការចម្លងលក្ខណៈទ្រង់ទ្រាយធំ និងបើកចំហដូចជាគ្រប់គ្នាកំពុងចម្លង iPhone X នាពេលបច្ចុប្បន្ននេះទេ។

នៅឆ្នាំ ២០១៨ ក្រុមហ៊ុនធំៗដូចជា LG, Asus, Nokia, Huawei, Oppo និង Xiaomi ជាដើមនោះ បានប្រកាសចេញស្មាតហ្វូនថ្មីៗជាច្រើនដែលមានរចនាបថក្បាលឆកដូចជា iPhone X។ បន្ថែមពីនេះមានក្រុមហ៊ុនខ្លះ បានប្រៀបធៀបស្នាមឆកលើស្មាតហ្វូនរបស់ខ្លួនជាមួយ iPhone X ដោយអួតថាមានស្នាមឆកតូចជាង។

ទន្ទឹមនឹងនេះក្រុមហ៊ុន Oppo និង Vivo បានរិះរកវិធីសាស្ត្រថ្មីដោយបានបង្កប់កាមេរ៉ាក្នុងតួខ្លួនដើម្បីផលិតស្មាតហ្វូនមានអេក្រង់លាតពេញទី គ្មានក្បាលឆក។ ទោះយ៉ាងណាក្រុមហ៊ុនពីរនេះនៅតែផលិតស្មាតហ្វូនអេក្រង់ឆកដដែល។

ដោយឡែក Samsung គឺមិនស្ថិតក្នុងក្រុមក្បាលឆកនេះទេ។ ផ្អែកតាមសារព័ត៌មាន Forbes មានហេតុផលដែលធ្វើឲ្យក្រុមហ៊ុនយក្សកូរ៉េ មិនខ្ចីប្រើរចនាបថឆក។ ទីមួយ Samsung មានភាពជឿជាក់លើអេក្រង់ Infinity Display របស់ខ្លួន និងទីពីរគឺដោយសារ Samsung ជាក្រុមហ៊ុនធំមួយក្នុងលោក ហេតុនេះចង់ចម្លង Apple ដោយបើកចំហបែបនេះគឺមិនមែនជារឿងល្អនោះទេ។ ហេតុមួយទៀតគឺ Samsung ធ្លាប់បានសើចចំអក Apple យ៉ាងចាស់ដៃ តាមរយៈស្ប៉តវីដេអូរបស់ខ្លួន។

Forbes បាននិយាយទៀតថា ៖ "អ្នកមិនអាចរិះគន់លើចំណុចមួយរបស់ Apple ហើយស្រាប់តែធ្វើតាម Apple វិញនោះទេ...លុះត្រាតែអ្នកជា Google”។

កាលពីឆ្នាំ ២០១៦ ក្រុមហ៊ុន Google បានសើចចំអក Apple ដែលដករន្ធ 3.5 mm ចេញពី iPhone 7 ប៉ុន្តែនៅចុងឆ្នាំ ២០១៧ ក្រុមហ៊ុននេះក៏បានប្រកាសចេញ Pixel 2 និង Pixel 2 XL ដែលគ្មានរន្ធកាស 3.5 mm ទៅវិញ៕

ប្រភព៖ vnexpress ប្រែសម្រួល៖ សុខហេង