ប្រវត្តិជូរចត់អ្នកចាំទីហ្វីលីពីន Etheridge ធ្លាប់អស់ឡាននិងផ្ទះ មុនបានមកលេងនៅ PL

2018-08-21 07:57:13
ចំនួនមតិ 0 | ចំនួនចែករំលែក 0

ចន្លោះមិនឃើញ

Premier League រដូវកាលនេះមានកីឡាករ៦៦សញ្ជាតិខុសគ្នាកំពុងប្រកបអាជីព ក្នុងនោះក៏មាន អ្នកចាំទី Neil Etheridge សញ្ជាតិហ្វីលីពីន ដែលកំពុងលេងនៅក្លឹប Cardiff City។

Etheridge បានក្លាយជាកីឡាករហ្វីលីពីនដំបូងបានមកលេងនៅ Premier League។ អ្វីដែលពិសេសគេក៏ជាអ្នកចាំទីទីមួយដែលបានសង្គ្រោះបាល់ប៉េណាល់ទីនៅថ្ងៃបង្ហាញខ្លួនលើកដំបូងនៅ Premier League ពេល Cardiff City ចាញ់ Bournemouth ២-០ ក្នុងសប្ដាហ៍ទី១។ លេងទល់នឹង Newcastle United កាលពីចុងសប្ដាហ៍ អ្នកចាំទីវ័យ២៨ឆ្នាំកាន់តែទទួលបានការចាប់អារម្មណ៍ម្ដងទៀត ក្រោយជួយបាល់ប៉េណាល់ទីសាជាថ្មីរបស់ កីឡាករ Kenedy។

យ៉ាងណាមិញ Etheridge ធ្លាប់ជួបរឿងរ៉ាវជូរចត់ក្នុងវិស័យបាល់ទាត់ជាច្រើន មុនពេលមានឱកាសមកលេងនៅ Premier League។ កាលឆ្នាំ២០១៤ កីឡាករដែលបង្ហាញខ្លួនឲ្យជម្រើសជាតិហ្វីលីពីនបាន៥៩ប្រកួតបានបញ្ចប់កុងត្រាជាមួយក្លឹប Fulham ដោយសារមិនផ្ដល់ពេលវេលាឲ្យគេបង្ហាញខ្លួនដំបូងនៅ Premier League។

”ខ្ញុំបានចំណាយពេល៥ខែដោយគ្មានក្លឹបលេង ហើយខ្ញុំចាប់ផ្ដើមរៀបចំទិសដៅនៃអាជីពរបស់ខ្ញុំឡើងវិញ។ ខ្ញុំបានបង់ប្រាក់ដើម្បីបានចូលហ្វឹកហាត់ជាមួយក្លឹប Charlton Athleti។ ខ្ញុំព្យាយាមខ្លាំងតាមអ្វីដែលអាចធ្វើបាន។ ខ្ញុំលក់ផ្ទះ រថយន្ត ហើយខ្ញុំស្ទើរតែបោះបង់អ្វីគ្រប់យ៉ាងនិងត្រលប់ទៅហ្វីលីពីនវិញ ប៉ុន្តែបន្ទាប់ស្របតែក្លឹប Oldham Athletic បានផ្ដល់កិច្ចសន្យាធ្វើជាអ្នកចាំទីបម្រុង ហើយខ្ញុំក៏ទទួល"។ សម្ដី Etheridge។

អ្នកចាំទីអាស៊ីបានបន្តទៀតថា៖ "ខ្ញុំជាមនុស្សកើតក្នុងទីក្រុងឡុងដ៏ ដែលបានទៅទីក្រុង Manchester ដើម្បីស្នាក់នៅផ្ទះរបស់មិត្តភ័ក្ដិ ក្នុងការបន្តអាជីព។ ខ្ញុំធ្លាប់គេងលើសាឡុង"។ យ៉ាងនេះក្ដី បន្ទាប់ពីបង្ហាញខ្លួនបានមួយប្រកួតជាមួយ Oldham ក្លឹប Charlton សម្រេចខ្ចីជើង Etheridge មុនពេលទិញផ្ដាច់នៅឆ្នាំ២០១៥។

ក្នុងឆ្នាំ២០១៥ដដែល Etheridge បានផ្ទេរទៅកាន់ក្លឹប Walsall (ក្លឹបក្នុង League One របស់អង់គ្លេស) មុនពេលចាកចេញទៅលេងឲ្យ Cardiff ក្នុងឆ្នាំ២០១៧។ ពិតជាបង្ហាញទម្រង់លេងបានល្អ ៤៥ប្រកួតនៅ Championship gamesរដូវកាលមុន Etheridg បានបិទមិនឲ្យគេទាត់ចូល១៩ប្រកួតនិងនាំ Cardiff ឡើងមកលេងនៅ Premier League រដូវកាលនេះ៕

ប្រភព៖ Marca ប្រែសម្រួល៖ ហេង សុធារិទ្ធិ