រឿង «ផ្នូរគ្មានឈ្មោះ» របស់ផលិតករ រិទ្ធី ប៉ាន់ ជាប់ជម្រើសដណ្តើមពានរង្វាន់ Oscar 2019

  • 2018-09-11 03:26:42
  • ចំនួនមតិ 0 | ចំនួនចែករំលែក 105

ចន្លោះមិនឃើញ

«Graves without a Name» ឬ «ផ្នូរគ្មានឈ្មោះ» របស់ផលិតករអ្នកដឹកនាំរឿងល្បីឈ្មោះ លោក រិទ្ធី ប៉ាន់ ជាភាពយន្តឯកសារក្រោយគេបំផុតដែលផលិតរួចក្នុងឆ្នាំ ២០១៨ ហើយបានចាក់បញ្ចាំងជាលក្ខណៈ World Premiere ក្នុងមហោស្រពភាពយន្ត Venice Film Festival មុនគេកន្លងទៅថ្មីៗនេះ។

រូបភាពពីក្នុងភាពយន្ត «ផ្នូរគ្មានឈ្មោះ»

ពេលនេះ ភាពយន្តរឿង «ផ្នូរគ្មានឈ្មោះ» ដែលជាភាពយន្តតពីរឿង «កង្វះរូបភាព» ធ្លាប់ជាប់ជម្រើស Oscar កាលពី ឆ្នាំ ២០១៤ ត្រូវបានគណៈកម្មការជ្រើសរើសភាពយន្តប្រកួតក្នុងមហោស្រពពិភពលោក ពានរង្វាន់ Oscar ពិចារណា និង បោះឆ្នោតយកទៅដាក់ប្រកួតពានរង្វាន់ជាលក្ខណៈអន្តរជាតិ ពានរង្វាន់ Oscar 2019 ក្នុងជម្រើស Best Foreign Language Film Oscar at the 91 Academy Awards ពីប្រទេសកម្ពុជា ជាមួយបណ្ដាប្រទេសទូទាំងសកលលោក ជាង ៨០ ប្រទេស ដែលស្ថិតក្នុងដំណាក់កាលរៀបចំឯកសារ។

រូបភាពពីក្នុងភាពយន្ត «ផ្នូរគ្មានឈ្មោះ»

«ផ្នូរគ្មានឈ្មោះ» ជារឿងនិយាយពីសម័យវាលពិឃាតខ្មែរក្រហម ដែលប្រជាជនកម្ពុជារាប់លាននាក់បានស្លាប់យ៉ាងខ្លោចផ្សាបំផុត។ ដើម្បីជួយឱ្យភាពយន្តជាប់ជម្រើសទៅប្រកួតពានរង្វាន់ Oscar 2019 គោលការណ៍សំខាន់មួយ ក្នុងចំណោមគោលការណ៍ជាច្រើនទៀត ពីគណៈកម្មការជ្រើសរើសភាពយន្ត តម្រូវឱ្យ ភាពយន្តនេះ ចាក់ផ្សាយក្នុងស្រុកហោចណាស់ ៧ថ្ងៃ និងមានការគាំទ្រផ្ទាល់ពីប្រជាជនកម្ពុជា នេះបើតាមអ្នកស្រី Mariam Arthur ប្រធានគណៈកម្មការជ្រើសរើសពានរង្វាន់ អូស្គា កម្ពុជា។

ភាពយន្តឯកសារ រឿង «ផ្នូរគ្មានមនុស្ស» ក៏មានដាក់បញ្ចាំងជាផ្លូវការនៅថ្ងៃទី ១៥ ខែកញ្ញា ខាងមុខនេះ។ ប្រិយមិត្តអាចស្វែងរកទិញសំបុត្រចូលរួមទស្សនាភាពយន្តជាតិនេះ នៅរោងភាពយន្ត ប៉ារីសអេដិន ក្នុងមជ្ឈមណ្ឌលបុប្ផាណា ចាប់ពីថ្ងៃទី១៥ ខែកញ្ញា នេះតទៅ៕

កាលវិភាគ និងទីតាំងទិញសំបុត្រកុន «ផ្នូរគ្មានឈ្មោះ»

រូបភាពផ្ដល់ដោយ៖ មជ្ឈមណ្ឌលបុប្ផាណា


អត្ថបទ៖ Sunny