Liverpool ជួលយន្តហោះផ្តាច់មុខ ទៅយកកីឡាករប្រេស៊ីល៣នាក់របស់ខ្លួន

2018-09-15 09:07:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ហង្សក្រហម Liverpool បានជួលយន្តហោះឯកជនមួយគ្រឿងដើម្បីហោះទៅយកកីឡាករប្រេស៊ីល៣នាក់របស់ក្លឹបរួមមាន៖ Roberto Firmino, Alisson និង Fabinho ដែលបានបញ្ចប់ការប្រកួតមិត្តភាពនៅទឹកដីអាមេរិក ឲ្យវិលត្រលប់មកអង់គ្លេសវិញដើម្បីទាន់ការប្រកួតទល់នឹង Spurs នៅថ្ងៃសៅរ៍នេះ។

Firmino, Alisson និង Fabinho សុទ្ធតែបានរួមចំណែកជួយប្រេស៊ីលឲ្យទទួលបានជ័យជម្នះលើអាមេរិក ២-០ និង បានបំបាក់យ៉ាងចាស់ដៃយកឈ្នះប្រទេស អែលសាល់វាឌ័រ ៥-០ ដែលប្រកួតទាំង២នេះធ្វើនៅទឹកដីអាមេរិក។

ហង្សក្រហម Liverpoolបានរៀបចំយន្តហោះឯកជនទៅទទួលកីឡាករដើម្បីធានាថាពួកគេអាចចូលរួមក្នុងវគ្គហ្វឹកហាត់ពិសេសមួយនៅថ្ងៃព្រហស្បតិ៍។ តាមទម្លាប់ លោក Klopp មិនដាក់កីឡាករណា ដែលមិនបានហ្វឹកហាត់ជាមួយនឹងក្រុមមុនពេលការប្រកួតនោះទេ។ នេះបើតាមការរាយការណ៍របស់ The Mirror។

Alisson ឆ្លៀតដើរបានខ្លះអំឡុងប្រេស៊ីលលេងនៅទីក្រុងញូវយ៉កនិងវ៉ាស៊ីនតោន

Liverpool បានចាប់ផ្តើមរដូវកាលយ៉ាងល្អ ឈ្នះទាំង៤ប្រកួតនៅ Premier League ខណៈដែល ខ្សែប្រយុទ្ធ Firmino និង អ្នកចាំទី Alisson បានដើរតួយ៉ាងសំខាន់នៅក្នុងជ័យជម្នះនេះ។

Fabinho មិនទាន់បានបង្ហាញខ្លួនឲ្យ Liverpool នៅឡើយទេចាប់តាំងពីចាកចេញពីក្លឹបម៉ូណាកូ មកកាន់ទឹកដី Anfield កាលពីរដូវក្តៅ ដោយសង្ឃឹមថាគេនឹងបង្ហាញខ្លួននៅឲ្យហង្សក្រហមទល់នឹង Tottenham។

បន្ទាប់ពីការប្រកួតជាមួយនឹងក្រុមរបស់លោក Mauricio Pochettino ក្រុមរបស់លោក Klopp នឹងត្រូវបើកទ្វារស្វាគមន៍ PSG ក្នុងក្របខ័ណ្ឌ Champions League នៅសប្តាហ៍ក្រោយ។

ប្រភព៖ Dailymail ប្រែសម្រួល៖ សុខ លាងហ៊ត