ការដ្ឋានសង់សំណង់ខុសច្បាប់ជាង៦០ ត្រូវក្រសួងដែនដីផ្អាកដំណើរការសាងសង់

2018-10-20 09:19:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ខែឆ្នាំ២០១៨ នេះ ក្រសួងដែនដីនគររូបនីយកម្ម និងសំណង់បានបិទការដ្ឋានសាងសង់បាន ៦៤គម្រោង។ នេះបើយោងតាមរបាយការណ៍បូកសរុបលទ្ធផលការងារ ៩ខែ ឆ្នាំ២០១៨ និងទិសដៅការងារបន្ត ដែលបានចេញផ្សាយនៅសប្តាហ៍នេះ។

ប្រភពដដែលបន្ថែមទៀតថា អគ្គនាយកដ្ឋានសំណង់បានទទួលពាក្យបណ្ដឹងទាក់ទងនឹងវិវាទពាក់ព័ន្ធនឹងការងារសាងសង់សរុបចំនួន១៩ករណី ក្នុងនោះមានការដោះស្រាយបញ្ចប់ជាស្ថាពរចំនួនពីរករណី រក្សាទុក១ករណី និងបានបញ្ជូនទៅមន្ទីរដែនដីនគររូបនីយកម្ម និងសំណង់ចំនួន ១ករណី និងបានបញ្ជូនទៅស្ថាប័នតុលាការចំនួន ១ករណី។ អគ្គនាយកដ្ឋានសំណង់កំពុងបន្តដោះស្រាយចំនួន១២ករណី និងបានផ្អាកការដ្ឋានចំនួន២ករណី។

កាលពីពេលថ្មីៗនេះ ក្រសួងរៀបចំដែនដី នគរូបនីយកម្ម និងសំណង់ ក៏បានចេញលិខិតទៅ អភិបាលខេត្តព្រះសីហនុ ឱ្យបញ្ឈប់ការចេញលិខិតអនុញ្ញាតជាគោលការណ៍ ឱ្យដំណើរការសាងសង់ មុនទទួលបានលិខិតអនុញ្ញាតសាងសង់ពីស្ថាប័នមានសមត្ថកិច្ចផងដែរ។ ការហាមប្រាមនេះត្រូវបានធ្វើឡើងក្នុងគោលបំណង បញ្ចៀសឱ្យបាននូវបទល្មើសសំណង់ ប៉ះពាល់ដល់សណ្តាប់ធ្នាប់សាធារណៈ សោភណ្ឌភាព និង គុណភាពសំណង់។

ទោះយ៉ាងណាថ្លែងបើកកិច្ចប្រជុំផ្សព្វផ្សាយលិខិតបទដ្ឋាននានា ស្ដីពីការគ្រប់គ្រងសំណង់ ច្បាប់ការងារ និងបញ្ហាបរិស្ថាន នៅខេត្តព្រះសីហនុ កាលពីថ្ងៃទី១៦ ខែតុលា ឯកឧត្តម យន្ត មីន អភិបាលខេត្តព្រះសីហនុ បានឱ្យដឹងថា កន្លងមកខេត្តបានចេញគោលការណ៍ឱ្យសំណង់ខ្លះ បានសាងសង់បណ្ដើរ រត់ច្បាប់ជាបណ្តើរ ដើម្បីឆ្លើយតបនឹងសភាពការណ៍អភិវឌ្ឍនយ៉ាងគំហុក នៅខេត្តព្រះសីហនុ ។ ការឱ្យសាងបែបនេះ ឯកឧត្តម បានពន្យល់ថា ក៏មានមន្ត្រីជំនាញបានចុះពិនិត្យជាក់ស្តែងនៅទីតាំង និងលក្ខណៈបច្ចេកទេស នៃសំណង់នោះដែរ។

ឯកឧត្ដម អភិបាលខេត្តព្រះសីហនុ បានឱ្យដឹងទៀតថា ចំពោះសំណង់ត្រឹម ៣,០០០ ម ចុះក្រោមជាសមត្ថកិច្ចរបស់ខេត្ត ខេត្តនឹងពិនិត្យជំរុញការរត់ច្បាប់ឱ្យបានលឿនបំផុត តែចំពោះសំណង់ណាដែលជាសមត្ថកិច្ចរបស់ក្រសួង ឯកឧត្តម យន្ត មីន នឹងជួយជំរុញឱ្យបានលឿនផងដែរ។ ម្ចាស់គម្រោងនៃសំណង់ខ្លះនៅតែទទូចស្នើសុំសាងសង់បណ្តើរ រត់ច្បាប់បណ្តើរ ដោយលើកហេតុផលថា ការរត់ច្បាប់ហាក់ត្រូវចំណាយពេលយូរពេក ។ ណាមួយទៀតពួកគាត់ខ្លះយកប្រាក់កម្ចីពីធនាគារ ដើម្បីធ្វើការវិនិយោគ ។ បើកាលណាការរត់ច្បាប់ចំណាយពេលយូរពេក វានាំប៉ះពាល់ដល់ដំណើរការអាជីវកម្មរបស់ពួកគាត់ដែរ។ ពួកគាត់នៅតែទទូចស្នើសុំពន្លឿនការរត់ច្បាប់សាងសង់ និងសុំធ្វើបណ្តើររត់ការបណ្ដើរ។

ក្រសួងដែនដីនឹងបន្តពង្រឹងការទប់ស្កាត់រាល់ការដ្ឋាន ដែលសាងសង់មិនមានលិខិតអនុញ្ញាត ឬសាងសង់មិនមានលិខិតអនុញ្ញាត។ លើកទឹកចិត្ត និងផ្សព្វផ្សាយស្ថាបត្យកម្ម ដែលមានលក្ខណៈជាខ្មែរ បន្តបង្កើនប្រសិទ្ធភាពការងារ និងសម្រេចឱ្យបានតាមបរិបថការងារលើការត្រួតពិនិត្យប្លង់នៃការស្នើសុំលិខិតអនុញ្ញាតសាងសង់ លិខិតអនុញ្ញាតបើក និងបិទការដ្ឋានសាងសង់ ការចុះបញ្ជីប្រកបអាជីវកម្ម សិក្សាគម្រោងប្លង់ និងសាងសង់ ព្រមទាំងចំណុចស្នូលសំខាន់ៗជាច្រើនទៀត។ រយៈពេល៩ ខែឆ្នាំ២០១៨ ក្រសួងដែនផ្តល់លិខិតអនុញ្ញាតសាងសង់ចំនួន ២ ៥៤១ គម្រោង និងមានតម្លៃប៉ាន់ស្មានជិត ៥ពាន់ លានដុល្លារអាមេរិក៕

អត្ថបទ៖ សុផល