ឪពុកជាបុគ្គលនៅពីក្រោយ ចាន់ រតនា ក្នុងអាជីពប្រដាល់

2018-11-20 02:17:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាន់ រតនា កីឡាករប្រដាល់គុនខ្មែរ និងក្បាច់គុនចម្រុះម្នាក់ដែលបានកសាងកេរ្តិ៍ឈ្មោះរបស់ខ្លួនទាំងក្នុងស្រុក និងនៅលើឆាកអន្តរជាតិ ប៉ុន្តែមុនមានថ្ងៃនេះ រូបគេបានខិតខំប្រឹងប្រែងយ៉ាងខ្លាំងដើម្បីអាជីពប្រដាល់ ក៏ដូចជាជីវិតរស់នៅប្រចាំថ្ងៃ។

ចាន់ រតនា និងប្រពន្ធកូន

កើតនៅជំរំភៀសខ្លួនជាយដែនខ្មែរ-ថៃ ចាន់ រតនា និងគ្រួសារបានត្រឡប់ចូលមាតុភូមិវិញពេលសង្គ្រាមបានបញ្ចប់ ហើយចាប់ផ្តើមជីវិតថ្មីដោយប្រមែប្រមូលប្រាក់ទិញដីផ្ទះនៅខេត្តបន្ទាយមានជ័យ។ គាត់មិនចាំច្បាស់ប៉ុន្មានទេថា ខ្លួនចាប់ផ្តើមហាត់រៀនក្បាច់គុនតាំងពីពេលណាមក ប៉ុន្តែអ្វីដែលខ្លួនដឹងគឺមានលោកឪពុក ជាគ្រូក្បាច់គុនបុរាណយុទ្ធគុនខម។ លោកឪពុកបានក្លាយជាបុគ្គលដ៏មានឥទ្ធិពលបំផុតដែលជំរុញឲ្យរូបគេចាប់អាជីពប្រដាល់។

លោក ចាន់ ប៊ុនធឿន គ្រូក្បាច់យុទ្ធគុនខម និងជាឪពុករបស់ ចាន់ រតនា បានបើកក្លឹបហាត់គុនមួយដែលពេលនោះហើយធ្វើឲ្យកូនប្រុសរបស់លោកបោះបង់ចោលការសិក្សាដើម្បីជួយបន្ថែមកម្លាំងឲ្យគ្រួសារបន្ថែម។ រតនា រំលឹកថា ៖«គ្រួសារខ្ញុំពីមុនក្រខ្លាំងណាស់ ទើបឪពុកខ្ញុំឲ្យឈប់រៀនមកជួយគាត់នៅក្លឹបវិញ។ ពេលខ្ញុំហាត់ចេះបានច្រើនបន្តិច ខ្ញុំក៏ចាប់ផ្តើមបង្រៀនសិស្សដ៏ទៃទៀតជាបន្ត។ អីចឹង ខ្ញុំរៀនបណ្តើរ បង្ហាត់បណ្តើរ»។

«ដំបូងឡើយកម្សត់ណាស់ ដោយសារយើងគ្មានកន្លែងហាត់ ដូច្នេះយើងត្រូវដើរសុំដីគេមកបើកក្លឹប។ ម្យ៉ាង យើងក៏អត់មានឧបករណ៍សម្រាប់ហ្វឹកហាត់គ្រប់គ្រាន់ថែមទៀត អីចឹងយើងត្រូវព្យាយាមរកវិធីច្នៃរបស់ប្រើខ្លួនឯង។ និយាយទៅវេទនាខ្លាំង»។

ចាន់ រតនា (ស្តាំ)ពេលវ៉ៃជាមួយកីឡាករថៃ

នៅពេលក្លឹបប្រដាល់គុនចាប់ផ្តើមមានគេស្គាល់ច្រើន ក៏មានសិស្សមកហាត់រៀនច្រើនជាបន្តបន្ទាប់ដែលទើបអាចជួយផ្គត់ផ្គង់ក្លឹបឲ្យបានប្រសើរជាងមុន។ បច្ចុប្បន្នវិញ ចាន់ រតនា មិនត្រឹមតែជាអ្នកប្រដាល់អាជីពលើឆាកអន្តរជាតិរបស់ ONE Championship និងមានប្រជាប្រិយភាពខ្លាំងនោះទេ ថែមទាំងមានក្លឹបផ្ទាល់ខ្លួននៅរាជធានីភ្នំពេញឈ្មោះថាក្លឹប «សិល្បៈ» ដែលជាដំបូលបណ្តុះបណ្តាលក្មេងៗមានទេពកោសល្យជំនាន់ក្រោយ និងមានជនបរទេសជាច្រើនចូលហ្វឹកហាត់ផងដែរ។

រតនាពន្យល់ ៖«ខ្ញុំមិនដែលគិតថា ខ្លួនឯងក្លាយជាអ្នកប្រដាល់ទេ។ ខ្ញុំទៅហាត់ក្បាច់គុន ព្រោះគ្រាន់តែចង់ជួយឪពុកខ្ញុំដែលបង្ហាត់សិស្សតែប៉ុណ្ណោះ។ ឪពុកខ្ញុំគាត់ព្យាយាមបញ្ចុះបញ្ជូលខ្ញុំឲ្យមកហាត់គុនឲ្យស្ទាត់ទៅ មកពីខ្ញុំមិនបានរៀនសូត្រខ្ពស់ដូចគេ»។

«កីឡាករបានជួយខ្ញុំច្រើនមែនទែន វាមិនឲ្យខ្ញុំមានសំបូរហូរហៀរគ្រប់សព្វអ្វីទេ ប៉ុន្តែខ្ញុំមានអ្វីហូបចុកគ្រប់គ្រាន់ មានគេស្គាល់ខ្ញុំច្រើន ហើយមានគេគោរពខ្ញុំខ្លាំង។ ដូចនេះខ្ញុំមិនស្តាយក្រោយទេ ដែលឪពុកខ្ញុំជំរុញឲ្យខ្ញុំដើរផ្លូវនេះ»។

ចាន់ រតនា និងកូនសិស្សជនបរទេស

រតនា បានបន្តបន្ថែមជំនាញប្រចាំត្រកូលថែមទៀតដោយដាក់បញ្ចូលក្បាច់គុនចម្រុះ ជាមួយយុទ្ធគុនខម និងគុនខ្មែរជាដើម។ កីឡាករវ័យ៣២ឆ្នាំសម្លឹងឃើញអនាគតរបស់ខ្លួន ក៏ដូចជាកីឡាករនៅកម្ពុជាថា នឹងមានការរីកចម្រើនខ្លាំង។ សង្វៀន ONE Championship បានចូលរួមចំណែកសំខាន់ក្នុងការជួយសម្រេចគោលបំណងគាត់ មិនមែនត្រឹមតែជួយក្នុងអាជីពប្រដាល់ខ្លួនប៉ុណ្ណោះទេ ប៉ុន្តែក៏បានជួយដើរតួជាអ្នកផ្សព្វផ្សាយវិស័យនេះសម្រាប់ព្រះរាជាណាចក្រកម្ពុជាផងដែរ។

គាត់និយាយថា ៖«ខ្ញុំទទួលបានប្រយោជន៍ច្រើនតាំងពីបានចូល ONE Championship មក ពីព្រោះវាជាស្ថាប័នក្បាច់គុនស្តង់ដារអន្តរជាតិ ដូច្នេះយើងអាចផ្សព្វផ្សាយពីក្បាច់គុនបុរាណខ្មែរផ្សេងៗទៀត ពិសេសគុនខ្មែរ ឲ្យពិភពលោកបានស្គាល់»។

«ប៉ុន្តែសម្រាប់ខ្ញុំ អ្វីដែលត្រូវសួរខ្លួនឯងនោះគឺ តើខ្លួនឯងមានសមត្ថភាពគ្រប់គ្រាន់ដើម្បីឡើងវ៉ៃនៅទីនោះឬអត់? យើងត្រូវតែបង្ហាញគេពីអ្វីដែលយើងខ្លាំងដែរ»។

ចាន់ រតនា និង Abro Fernandes

នាថ្ងៃទី៧ ខែធ្នូខាងមុខនេះ ចាន់ រតនា នឹងបង្ហាញសមត្ថភាពឲ្យពិភពលោកបានឃើញនៅពេលរូបគេត្រូវពាក់មុខយក្សដាក់ជើងខ្លាំងឥណ្ឌូណេស៊ី Abro Fernandes នៅសង្វៀន ONE: DESTINY OF CHAMPIONS ប្រទេសម៉ាឡេស៊ី៕