កៀកថ្ងៃពិព័រណ៍សៀវភៅ មកដឹងរឿងរំភើប៣នេះឲ្យហើយ មុនដឹកដៃគ្នាទៅចូលរួម

2018-11-29 10:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិព័រណ៍សៀវភៅកម្ពុជាប្រចាំឆ្នាំលើកទី៧ សម្រាប់ឆ្នាំ២០១៨នេះ នឹងចាប់ផ្ដើមរៀបចំជាថ្មី នៅដើមខែធ្នូខាងមុខ នៅក្នុងបរិវេណបណ្ណាល័យជាតិ នៃរាជធានីភ្នំពេញ។ មានរឿងរំភើប ៣យ៉ាង ក្រោយកម្មវិធីនេះទទួលបានការគាំទ្រ ពី១ឆ្នាំ ទៅ១ឆ្នាំ នេះបើតាមប្រធានបណ្ណាល័យជាតិ។

រូបតំណាង ពិព័រណ៍សៀវភៅឆ្នាំកន្លងទៅ

លោកស្រី ខ្លូត វិបុលឡា ប្រធានបណ្ណាល័យជាតិ និងជាអនុប្រធាននាយកដ្ឋានសៀវភៅ និងការអាន នៃក្រសួងវប្បធម៌ និងវិចិត្រសិល្បៈ បានប្រាប់ Sabay ថានេះជាលើកទី៧ ក្រោមប្រធានបទ សៀវភៅរស់ ចំណេះរីក។

លោកស្រីបន្តថា ដោយសារសន្ទុះនៃការគាំទ្រពីសាធារណៈជន អ្នកគាំទ្រនានា និងថ្នាក់ដឹកនាំចង់ចូលរួមលើកស្ទួយការអាននៅកម្ពុជា ទើបក្រុមការងារអាចបន្តសកម្មភាព ទម្រាំឈានជើងចូលមកដល់ការរៀបចំដល់លើកទី៧នេះ។

លោកស្រី ខ្លូត វិបុលឡា បានបញ្ជាក់ទៀតថា ពិព័រណ៍សៀវភៅលើកទី៧ឆ្នាំនេះ នឹងរៀបចំបីថ្ងៃ គឺថ្ងៃទី ៧, ៨ និងទី៩ ខែធ្នូ ឆ្នាំ២០១៨។ មានកម្មវិធីល្អៗ សម្រាប់ជាព័ត៌មានដល់អ្នកចូលរួម ពិសេសកុមារ និងយុវជន។

១. កំណើនចំនួនស្តង់សៀវភៅ

ប្រភពលោកស្រី ខ្លូត វិបុលឡា ប្រាប់ថា ពិព័រណ៍សៀវភៅពិតជាទទួលបានការចាប់អារម្មណ៍ពីសាធារណៈជន និងអ្នកនិពន្ធ។ ឆ្នាំ២០១៨ នេះស្តង់សម្រាប់ដាក់បង្ហាញស្នាដៃអ្នកនិពន្ធ គ្រឹះស្ថានបោះពុម្ពផ្សាយ និងបណ្ណាល័យនានា និងលក់សៀវភៅដ៏សំបូរបែប បានកើនដល់១១០ស្តង់ ខណៈការរៀបចំដំបូងនៅឆ្នាំ២០១១មានតែ១០ស្តង់។

រូបតំណាង ពិព័រណ៍សៀវភៅឆ្នាំកន្លងទៅ

មកទល់ពេលនេះ ស្តង់និមួយៗ ត្រូវបានកក់អស់ ដើម្បីត្រៀមក្នុងការរៀបចំ។ ចំនួនសៀវភៅត្រៀមនឹងដាក់តាំង មិនទាន់មានរបាយការណ៍ជាក់លាក់នៅឡើយ ប៉ុន្តែបើគិតជាចំនួនអ្នកបោះពុម្ពផ្សាយ គឺមានដល់ជាង៨០០នាក់។

២. ចែកសៀវភៅ Free ១០ម៉ឺនក្បាល

ក្រៅពីសាធារណជន ពិព័រណ៍សៀវភៅ ក៏មានការគាំទ្រពីសម្ដេចនាយករដ្ឋមន្ត្រី ហ៊ុន សែន ដែលនឹងចាត់ឯកឧត្ដម ហ៊ុន ម៉ានី សម្រាប់ចូលរួមតំណាង ក្នុងពិព័រណ៍សៀវភៅឆ្នាំនេះ។

រូបតំណាង

ប្រភពដដែលពីលោកស្រី ខ្លូត វិបុលឡា សៀវភៅប្រមាណ ១០ម៉ឺនក្បាល ដែលមាន៤ចំណងជើង តែសុំមិនទាន់បញ្ជាក់ឈ្មោះ នឹងទុកត្រៀមចែកជូនអ្នកចូលរួម ដើម្បីលើកស្ទួយការអាននៅកម្ពុជា។ អ្នកចូលរួមម្នាក់នឹងទទួលបានសៀវភៅ តែ១ក្បាលគត់។

៣. ចំនួនអ្នកចូលរួម និងការរំពឹងទុក

រូបតំណាង

តួលេខអ្នកចូលរួមពិព័រណ៍សៀវភៅ ដែលបានរៀបចំក្នុងឆ្នាំ២០១៥ កន្លងទៅ មានអ្នកចូលរួមប្រមាណតែ ១២០០០នាក់ ខណៈឆ្នាំ២០១៦ បានកើនបន្តិច ដល់ចំនួន២៥០០០នាក់។ លោកស្រី ខ្លូត វិបុលឡា និងក្រុមការងាររៀបចំពិព័រណ៍ដដែល រំពឹងថាឆ្នាំ២០១៨នេះ ចំនួនអ្នកចូលរួម ពិសេសកុមារ និងយុវជន នឹងអាចបន្តកើន។

ប្រធានបណ្ណាល័យជាតិរូបនេះ ថាបើតាមចំនួនរំពឹងទុក គឺអាចដល់៧ម៉ឺននាក់ ដែលនឹងមកចូលរួមនៅក្នុងពិព័រណ៍សៀវភៅលើកទី៧ នៅបណ្ណាល័យជាតិ ចាប់ពីថ្ងៃទី ៧, ៨ និងទី៩ ខែធ្នូ ឆ្នាំ២០១៨ ខាងមុខ។

អត្ថបទ៖ ពៅ រក្សា