ឌន សៅ ថាបើបានទៅស៊ីហ្គេមឆ្នាំក្រោយសង្ឃឹមខ្ពស់បានមេដាយតែខ្លាចរឿងមួយ

2018-12-19 02:19:55
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតម្ចាស់មេដាយមាសស៊ីហ្គេមឆ្នាំ២០១៣ លើប្រភេទកីឡាចំបាប់ ឌន សៅ នឹងអាចចូលរួមការប្រកួតស៊ីហ្គេមឆ្នាំក្រោយបាន លុំត្រាតែប្រភេទទម្ងន់របស់ ហេង វុទ្ធី ត្រូវបានម្ចាស់ផ្ទះហ្វីលីពីនដាក់បញ្ចូលឲ្យប្រកួតប្រជែងដូចគ្នា។

ឌន សៅ និងកូន

ព្រឹត្តិការណ៍ស៊ីហ្គេមឆ្នាំ២០១៩ នឹងដំណើរចន្លោះពីថ្ងៃទី៣០ ខែវិច្ឆិកា ឆ្នាំ២០១៩ ដល់ថ្ងៃទី១១ ខែធ្នូ ឆ្នាំ២០១៩ ដែលត្រូវបានកំណត់ចំនួន ៥៦ ប្រភេទកីឡាឲ្យប្រកួតប្រជែង។ ទាក់ទងប្រភេទកីឡាចំបាប់ ឌន សៅ បានឲ្យដឹងថា ពេលនេះប្រភេទទម្ងន់ក្រោម ១២០ គីឡូក្រាមរបស់ខ្លួនគឺច្បាស់ជាមាន។ ស្របពេលប្រភេទទម្ងន់ក្រោម ៨៦ គីឡូក្រាមរបស់ ហេង វុទ្ធី មិនទាន់ច្បាស់នៅឡើយ ដូច្នេះបើសិនប្រភេទទម្ងន់របស់ ហេង វុទ្ធី គ្មានទេនោះលោកមិនអាចទៅចូលរួមបានឡើយ ដោយទុកប្រភេទទម្ងន់ធ្ងន់ក្រោម ១២០គីឡូក្រាមឲ្យ ហេង វុទ្ធី ទៅវិញ ពីព្រោះ ឌន សៅ បច្ចុប្បន្នជាគ្រូបង្វឹកថ្នាលគឺត្រូវទុកឱកាសឲ្យកូនសិស្សបានទៅប្រកួតព្រឹត្តិការណ៍អន្តរជាតិ។

ប៉ុន្តែសម្រាប់ ឌន សៅ បានបង្ហាញក្ដីរំពឹងយ៉ាងខ្ពស់ថា បើសិនខ្លួនបានចេញទៅប្រកួតមែននោះ គឺប្រាកដជាអាចយកបានមេដាយ គ្រាន់តែមិនអាចបញ្ជាក់ថា មាស, ប្រាក់ ឬសំរឹទ្ធឡើយ។ ទាក់ទងការចេញទៅប្រកួតស៊ីហ្គេមនេះដែរ លោក Casey Barnett អនុប្រធានសហព័ន្ធចំបាប់ក៏ចង់ឲ្យ ឌន សៅ បានទៅចូលរួមដែរ ពីព្រោះអនុប្រធានសហព័ន្ធរូបនេះជឿជាក់លើសមត្ថភាពរបស់ ឌន សៅ ថាពិតជាខ្លាំង។

ហេង វុទ្ធី

ឌន សៅ ជាកីឡាករចំបាប់ដែលខ្លាំងសម្បូរទៅដោយបទពិសោធ និងឈ្នះមេដាយមាសស៊ីហ្គេម១ ប្រាក់ ១ សំរឹទ្ធ៤ សម្រាប់ជើងឯកអាស៊ីអាគ្នេយ៏វិញគេធ្លាប់ឈ្នះមេដាយមាសរហូត ៤គ្រឿងនិងសំរឹទ្ធ១គ្រឿង។ កីឡាកររូបនេះបានចូលខ្លួនជាគ្រូបង្វឹកចំបាប់ថ្នាលចំនួន ៣ ឆ្នាំមកហើយ៕