ជើងឯកពិភពលោក Andy Souwer គ្រោងជួយក្លឹបគុនខ្មែរមួយនៅសៀមរាប

2018-12-21 04:05:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមតែវ័យ៣៦ឆ្នាំ Andy Souwer ដែលជាជើងឯកក្នុងការប្រកួត K-1 World MAX ពីរសម័យកាល និងក៏ជាជើងខ្លាំងល្បីម្នាក់នៅ ONE Super Series ប្រាថ្នាកសាងជីវិតថ្មីបែបផ្សេងទៀត ដោយចាប់ដៃជាមួយ ក្លឹប«អាណាចក្រប្រយុទ្ធ (KFG)» នៅក្រុងសៀមរាប។

Souwer ចង់យកគំរូតាមអ្វីដែលស្ថាប័ន ONE Championship បានធ្វើក្នុងការជួយដល់កីឡាករម្នាក់ៗ និងតាំងចិត្តខ្ពស់របស់អ្នកដឹកនាំក្លឹប KFG លោក Mark Van Dongen រួមជាមួយលោក Kwok Leung Tsang ដែលមានឆន្ទៈដូចគ្នា។

កីឡាករ Andy Souwer (រូបថត៖ ONE)

លោក Leung Tsang ប្រធានក្លឹប KFG ពន្យល់ថា៖ «អ្វីដែលយើងចង់បាន មិនគ្រាន់តែចង់បានកីឡាករច្រើនចូលក្នុងក្លឹបយើងទេ តែយើងក៏ចង់ជួយផ្តល់ការហ្វឹកហាត់ និងការអប់រំ ឥតគិតថ្លៃដល់យុវជនក្នុងស្រុកផងដែរ។ យើងចង់បង្កើតមជ្ឈមណ្ឌលកីឡាធំមួយ ដែលប្រមូលផ្តុំក្មេងៗឲ្យច្រើន តាមសមត្ថភាពដែលយើងផ្គត់ផ្គង់បាន»។

ក្រោយពីបានទាក់ទងជាមួយសហស្ថាបនិកក្លឹបលោក Van Dongen រួចមក ជើងខ្លាំងហុល្លង់ Andy Souwer ក៏បានក្លាយជាទូតសុឆន្ទៈម្នាក់តំណាងឲ្យក្លឹបអាណាចក្រប្រយុទ្ធសៀមរាបមួយនេះ រួមជាមួយកីឡាករប្រដាល់ហុល្លង់ម្នាក់ទៀត ដែលគេស្គាល់ថា ជាជើងខ្លាំងខាងប្រដាល់សេរីមួយរូបគឺ Ernesto Hoost។

ពេលនេះ Souwer ដាក់ដេញថ្លៃខ្សែក្រវាត់មួយរបស់ខ្លួន ព្រមទាំងយកប្រាក់មួយចំណែកដែលបានពីការប្រកួតនាពេលខាងមុខ មកជួយផ្គត់ផ្គង់ក្លឹបកម្ពុជានេះផងដែរ។

Souwer បាននិយាយថា ៖«វាមិនសំខាន់រឿងលុយទេ! សំខាន់គឺអនាគត ការមើលថែក្មេងៗទាំងនោះ ព្រោះពួកគេចង់មានអនាគតត្រចះត្រចង់ដែរ។ ស្ថាប័នប្រដាល់ ONE កំពុងផ្តោតលើផ្នែកនេះដូចគ្នា។ គេព្យាយាមបង្ហាញមនុស្សទូទាំងពិភពលោក ជាពិសេសនៅអាស៊ីថា បើយើងចេះផ្តោតអារម្មណ៍ និងមានភាពថ្លៃថ្នូរខ្ពស់ នោះយើងនឹងអាចសម្រេចដល់គោលដៅបាន»។

ថ្វីបើ ជើងខ្លាំង Souwer ធ្លាប់បានដើរប្រកួតស្ទើរជុំវិញពិភពលោកមែន ប៉ុន្តែមិនទាន់មានឱកាសមកប្រទេសកម្ពុជាផ្ទាល់នៅឡើយទេ។ ប៉ុន្តែលោកគ្រោងនឹងមកកម្ពុជាឆាប់ៗ។

កីឡាករក្លឹប KFG (រូបថត៖ ONE)

ជាមួយគ្នា ម្ចាស់ខ្សែក្រវាត់ពិភពលោករូបនេះគ្រោងមកហាត់សមផ្ទាល់នៅក្លឹបអាណាចក្រប្រយុទ្ធ បន្ទាប់ពីប្រកួតជាមួយជើងឯកពិភពលោករបស់ថៃ Yodsanklai ក្នុងព្រឹត្តិការណ៍ ONE: A NEW ERA ខែមីនា ឆ្នាំ២០១៩នៅប្រទេសជប៉ុន។ នេះឱកាសសងសឹករបស់កីឡាករថៃម្នាក់នេះ បន្ទាប់ពីធ្លាប់ចាញ់កីឡាករហុល្លង់ម្នាក់នេះកាលពីឆ្នាំ២០០៨។

Andy ប្រាប់ថា ៖«បន្ទាប់ពីប្រកួតរួច ខ្ញុំចង់ទៅលេង(កម្ពុជា)។ ខ្ញុំចង់ប្រឡូកក្នុងសកម្មភាពរបស់ជំរុំ ហើយចង់ធ្វើការជាមួយក្មេងៗ។ ខ្ញុំចង់ចែករំលែកបទពិសោធផ្ទាល់ខ្លួនដែលធ្វើឲ្យខ្ញុំទទួលបានជោគជ័យ»។

ការសហការគ្នារវាងក្លឹប KFG និងជើងខ្លាំងហុល្លង់ Andy Souwer បានចេញជាផ្លែផ្កាបណ្តើរៗហើយ។ ថ្មីៗនេះកីឡាករ គង់ សំបូរក្លឹបនៅសៀមរាបនេះ ទើបតែចុះកុងត្រាជាមួយស្ថាប័ន ONE Championship។ តាមការគ្រោងទុក គង់ សំបូរ ក៏នឹងបង្ហាញខ្លួនលើឆាកអន្តរជាតិនាដើមឆ្នាំ២០១៩ដែរ។

Andy Souwer បានចាប់ផ្តើមប្រឡូកក្នុងពិភពប្រដាល់សេរីតាំងពីអាយុ៧ឆ្នាំដែលរហូតដល់ពេលនេះគ្រាន់តែស្ថិតិប្រកួតផ្លូវការគឺចំនួន១៨២ដង ក្នុងនោះឈ្នះ១៦០ដង (ផ្តួលដៃគូឲ្យសន្លប់បាន៩៨ដង) និងចាញ់២១ដង៕