ក្រុម​ខ្លាំង​ Atletico Madrid បាន​ធ្លាក់​ចេញ​ពី​ពាន​ Copa del Rey យ៉ាង​គួរ​ឲ្យ​ភ្ញាក់ផ្អើល​ក្រោយ​ប្រកួត​ស្មើ​គ្នា​ ៣​ទល់​នឹង​៣​ ជាមួយ​ Girona ក្នុង​ការ​ប្រកួត​ជើង​ទី​ពីរ​​យប់​មិញ។​

កាល​ពី​ជើង​ទី​មួយ​នៅ​ទឹកដី​ Estadi Montilivi ក្រុម​ទាំង​ពីរ​បាន​ស្មើ​គ្នា​ដែរ ១-១ ដូច្នេះ​លទ្ធផល​ ៣-៣​ នៅ​ទឹកដី​ Wanda Metropolitano ធ្វើ​ឲ្យ​ Girona មាន​សិទ្ធ​ឡើង​ទី​វគ្គ​៨​ក្រុម​ចុង​ក្រោយ​ដោយ​ផ្អែក​ទៅ​លើ​រូប​មុន​ Away goals ឬ​ចំណេញ​គ្រាប់​បាល់​ក្រៅ​ដី។​

កីឡាករ​ Kalinic, Correa និង ​Griezmann គឺ​ជា​អ្នក​រក​គ្រាប់​បាល់​ឲ្យ​ Atletico ហើយ​៣​គ្រាប់​របស់​ Girona ជា​ថ្វី​ជើង​របស់​កីឡាករ​ Fernández, Stuani និង​ García។ គូ​ផ្សេង​ទៀត​នៅ​វគ្គ​១៦​ក្រុម​យប់​មិញ​ Leganes បាន​យក​ឈ្នះ Real Madrid ១​-០ តែ​ Real ជា​អ្នក​ឡើង​ដោយ​លទ្ធផល​ទាំង​ពីរ​ជើង​ពួកគេ​ឈ្នះ​ ៣-១។ Sevilla ក៏​​ឡើង​ដែរ​ដោយ​ឈ្នះ​​ Ath Bilbao សរុប​ទាំង​ពីរ​ជើង​ ៣ទល់នឹង​១៕

អត្ថបទ៖ វីរ័ត្ន