ក្រសួងនឹងបង្កើនចំនួន វិស្វករបច្ចេកវិទ្យាឲ្យបាន ១៥% ឆ្នាំ ២០២០

2019-01-21 06:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានលើកឡើងថា ជាគោលដៅរួមរបស់រាជរដ្ឋាភិបាល នឹងបង្កើនចំនួនវិស្វករបច្ចេកវិទ្យាដល់ ១៥% ក្នុងឆ្នាំ២០២០ ហើយបំពាក់បំណិនវិជ្ជាជីវៈខាងផ្នែកបច្ចេកវិទ្យា និងផ្នត់គំនិតឌីជីថលដល់សិស្សដែលចប់មធ្យមសិក្សាគ្រប់ៗគ្នា ដើម្បីអាចឱ្យពួកគេដើរទាន់ការវិវត្តឥតឈប់ឈរនៃសង្គមឌីជីថលនេះ។

រូបថត៖ ក្រសួងប្រៃសណីយ៍

តាមរបាយការណ៍បានឲ្យដឹងថា ក្នុងឆ្នាំ២០១៨ ***និស្សិតដែលបញ្ចប់ការសិក្សាថ្នាក់ឧត្ដមសិក្សាជំនាញ ICT មានប្រមាណ ៩% នៃចំនួននិស្សិតសរុប។*** ចំនួននេះមិនអាចផ្គត់ផ្គង់ តម្រូវការទីផ្សារក្នុងកំឡុងពេលដែលបច្ចេកវិទ្យាកំពុងវិវត្តយ៉ាងឆាប់រហ័សហើយធុរកិច្ចជាច្រើនគ្រប់វិស័យ មានទាំងវិស័យធនាគារ ហិរញ្ញវត្ថុ ឧស្សាហកម្ម ពាណិជ្ជកម្ម ការផ្តល់សេវាកម្មនានា កំពុងងាកផ្លាស់ប្ដូរទៅបែបឌីជីថល។

ក្នុងពិធីចុះ កិច្ចព្រមព្រៀងត្រីភាគីអនុវត្តគម្រោង បំពាក់សម្ភារៈកុំព្យូទ័រ ដល់សាលាមធ្យមសិក្សាចំនួន២០ រវាងក្រសួងអប់រំ យុវជន និងកីឡា និងក្រុមហ៊ុន វៀតធេល(ខេមបូឌា) គឺជាការបណ្តុះបណ្តាលធនធានមនុស្សខាងផ្នែកបច្ចេកវិទ្យា ដើម្បីត្រៀមខ្លួនសម្រាប់អនុវត្ត សេដ្ឋកិច្ច ឌីជីថល ក៏ដូចជាបដិវត្តន៍ឧស្សាហកម្ម ៤.០។ ឯកឧត្តមរដ្ឋមន្ត្រី បានថ្លែងអំណរគុណដ៏ជ្រាលជ្រៅដល់អ្នកពាក់ព័ន្ធទាំងអស់ដែលបានចូលរួមជ្រោមជ្រែងគាំទ្រលើការផ្តួចផ្តើម រៀបចំកិច្ចការនេះរហូតមក។

ឯកឧត្តមរដ្ឋមន្ត្រី សង្ឃឹមថាការផ្តួចផ្តើមកិច្ចសហការនេះនឹងហុចជាផ្លែផ្កាក្នុងការអភិវឌ្ឍធនធានមនុស្សជាប្រយោជន៍ដល់ការអភិវឌ្ឍសង្គម សេដ្ឋកិច្ចកម្ពុជាក្នុងសម័យកាលឌីជីថល ហើយស្នើសុំឱ្យមានកិច្ចសហការស្អិតរមួតបន្ថែមទៀត ក្នុងគោលដៅរួមគ្នា៕