បែកធ្លាយរូបភាពចុងក្រោយរបស់ Galaxy S10 Plus មានទាំងប្រជ្រុយ មានទាំងចិញ្ចើមជួប

2019-02-01 04:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមគេហទំព័រ 91Mobile ទើបបានបញ្ចេញរូបភាពបែកធ្លាយរបស់ទូរសព្ទ Samsung Galaxy S10 Plus ដែលជា Flagship ដើមឆ្នាំ របស់ Samsung មើលទៅមានរូបរាងប្លែកខ្លាំងព្រមទាំងមានទាំងកាមេរ៉ាមុខដែលបង្កប់ក្រោមអេក្រង់មើលទៅដូចជាប្រជ្រុយខាងមុខ ហើយបើមើលទៅខាងក្រោយវិញ កាមេរ៉ា ៣ គ្រាប់តម្រៀបជាជួរប្រៀបដូចជាចិញ្ចើមសងខាងជួបគ្នាអ៊ីចឹង។ បើតាម 91Mobile បានបញ្ជាក់មក រូបភាពបែកធ្លាយនេះគឺជារូបភាពពិត សម្រាប់ចេញផ្សាយក្នុងសន្និសីទកាសែតផលិតផលថ្មីរបស់ Samsung។

បើផ្អែកតាមរូបបែកធ្លាយមុនៗ និងរូបភាពចុងក្រោយនេះ គេអាចនិយាយបានថា Samsung ឆ្នាំនេះលេងខ្លាំងដៃតែម្ដងលើបច្ចេកវិទ្យាកាមេរ៉ា ហើយក៏មិនខ្ចីចេញក្បាលឆកដូចគូប្រជែងយក្សរបស់ខ្លួន Apple ដែរ ដោយបែកគំនិតឆ្នៃកាមេរ៉ាខាងមុខបង្កប់ក្រោមអេក្រង់ផ្នែកខាងលើនៅស្ដាំដៃវិញម្ដង ធ្វើឲ្យផ្ទៃអេក្រង់លាតសឹងពេញផ្ទៃខាងមុខ បាត់ទាំងថ្ងាស បាត់ទាំងចង្កា។

ម៉្យាងវិញទៀត បើមើលតាម Wallpaper និងទម្រង់ Icon លើ lockscreen ដែលមានក្នុងរូបលេចធ្លាយនោះ គេអាចកត់សម្គាល់ឃើញថា Samsung បានកែប្រែ UI របស់ខ្លួនឲ្យ Icon មានរាងតូច និងមូលជាងមុន។

យ៉ាងណាមិញ បន្ទះស្កេនខ្ចៅដៃខាងក្រោយអេក្រង់មិនត្រូវបានគេឃើញក្នុងរូបភាពបែកធ្លាយនេះឡើយ ដែលអាចសន្និដ្ឋានថា Samsung នឹងប្រើបន្ទះស្កេនខ្ចៅដៃដែលបង្កប់ក្រោមអេក្រង់ដូចអ្វីដែលធ្លាប់បានឃើញលើទូរសព្ទរបស់ Vivo, OnePlus និង Oppo ដូច្នោះដែរ។ លើសពីនេះទៅទៀត តាមពាក្យចចាមអារ៉ាមបានលើកឡើងថា Samsung Galaxy S10 Plus និងមានទំហំអេក្រង់ស្មើនឹង Galaxy Note 9 ហើយវាក៏មានត្រកូល Galaxy S10 ទំហំតូចជាងចេញមកជាមួយផងដែរ។

ចំពោះផ្នែកកម្លាំងម៉ាស៊ីនវិញ Galaxy S10 ជំនាន់ចុងក្រោយនេះ ត្រូវបានគេរំពឹងថានឹងបំពាក់ឈីប Qualcomm Snapdragon 855 ឬក៏ Exynos 9820 SoC (ខុសគ្នាតាមតំបន់) មានអង្គចងចាំដល់ទៅ ១ TB និង មាន RAM ៦ GB មកស្រាប់។

ចុចអាន៖

ប្រភព៖ theverge ប្រែសម្រួល៖ ផាត សុវត្ថិ