តាមនាង ភីម ជុំវិញ នាយ តាក់ស៊ី ចង់រត់ទៅបួសចោលខ្លួន និងកូន នឹងដឹងសខ្មៅកាន់តែច្បាស់ល្ងាចនេះ

2019-04-23 08:48:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មាន នាយ តាក់ស៊ី ចង់ឈប់ពីសិល្បៈ ហើយយកខ្លួនថ្វាយព្រះធម៌ មិនស្រណោះប្រពន្ធ និងកូន បានធ្វើឲ្យមានការភ្ញាក់ផ្អើលខ្លាំងនៅរសៀលម្សិលមិញ ក្នុងនោះ នៅមានមន្ទិលខ្លះនៅក្នុងរឿងនេះ ស្របពេលនាង ភីម ព្រលយវិញថា នាងនឹងចេញមុខបកស្រាយជុំវិញរឿងនេះ។

នៅរសៀលម្សិលមិញ នាយ តាក់ស៊ី តាមរយៈលោក អ៊ឹម ជីវ៉ា បានព្រលយនូវព័ត៌មានដ៏គួរឲ្យភ្ញាក់ផ្អើលមួយថា លោកគ្រោងនឹងឈប់ពីសិល្បៈហើយ ហើយបន្ទាប់ពីនោះមក លោកនឹងទៅបួសជារៀងរហូត។ ចំពោះមូលហេតុ ដោយសារលោកធុញថប់នឹងខ្លួនឯង ដែលមានជំងឺរុំារៃច្រើនមុខ ហើយដោយមិនចង់ឲ្យប្រពន្ធកូនពិបាក ក្នុងការមើលថែខ្លួន ផ្សំនឹងលោកខ្លួនឯងមានឧបនិស្ស័យជាមួយព្រះធម៌ស្រាប់ផង ទើបលោកសម្រេចថានឹងទៅជ្រកក្រោមព្រះធម៌ អាស្រ័យបាយវត្តតែម្ដង។

បន្ថែមពីលើនេះ សមាជិកក្រុមកំប្លែង បញ្ជាក់ថា លោកនឹងទៅបួសក្នុងខែឧសភាខាងមុខនេះហើយ ហើយដំណើរចាកចេញពីសិល្បៈកណ្ដាលទី ហើយរត់ទៅរកព្រះធម៌ជាជំនួសវិញនេះ លោកនឹងមិនយកអ្វីដុំកំភួនទៅជាមួយឡើយ ពោលគឺទៅតែខ្លួនប៉ុណ្ណោះ។ មិនត្រឹមប៉ុណ្ណឹងលោកនៅបានសង្កត់ធ្ងន់ថា សុខចិត្តបើកផ្លូវឲ្យនាង ភីម ជាភរិយា រកអ្នកថ្មីជំនួសខ្លួនថែមទៀត។

ឃើញព័ត៌មានដ៏គួរឲ្យភ្ញាក់ផ្អើលនេះ ប្រិយមិត្តមួយចំនួន នៅមិនទាន់ជឿជាក់ទាំងស្រុងទៅលើមូលហេតុដែលសាមីខ្លួនបានលើកឡើងឡើយ។ ពិសេសចំណុចចុងក្រោយដែលលោកបញ្ជាក់ថា សុខចិត្តឲ្យភរិយារកអ្នកថ្មីមកជំនួសខ្លួននោះ នាំឲ្យមានការសង្ស័យថា លោក និងភរិយា សាច់សខ្ចី អាចនឹងមានទំនាស់ផ្ទៃក្នុងស្រួចស្រាល់ មុនជំរុញលោកឲ្យគិតដូច្នេះ។

ជុំវិញបញ្ហានេះ នាយ តាក់ស៊ី នៅតែអះអាងថា លោក និងភរិយា មិនមានបញ្ហាល្អក់កករអ្វីនឹងគ្នា ដោះស្រាយមិនចេញរហូតរត់គេចទៅរកព្រះធម៌នោះឡើយ។ ហេតុផលសំខាន់ៗ គឺមានតែបញ្ហាសុខភាព និងឧបនិស្ស័យជាមួយព្រះធម៌ប៉ុណ្ណោះ ក្នុងនោះលោកបានដាក់ចិត្តថានឹងទៅបួសជាយូរមកហើយ។ វិលមកនាង ភីម ជាភរិយា វិញ បានបញ្ជាក់ថា ជុំវិញបញ្ហាដែលកើតឡើង នាងនឹងចេញមុខធ្វើការបកស្រាយ នៅវេលាល្ងាចនេះតែម្ដង ដើម្បីឲ្យសាធារណជនអស់មន្ទិល។

នេះមិនមែនជាលើកទី១ ឡើយដែលនាយ តាក់ស៊ី បានផ្សារភ្ជាប់ខ្លួនជាមួយព្រះធម៌ កន្លងមក នាយក៏ត្រូវបានប្រទះឃើញរត់ទៅបួសលើភ្នំគូលេនបង្កជាការភ្ញាក់ផ្អើលម្ដងដែរ ប៉ុន្តែមិនបានសម្រេច ដោយសារពេលនោះ ក្រុមគ្រួសារបានដឹង និងទៅនិយាយលួងលោម អង្វរ ទើបលោកទន់ចិត្តហើយក៏ត្រឡប់មកវិញ។

ដោយឡែកលើកនេះ គឺជាលើកទី២ ខណៈសាមីខ្លួនអះអាងថា នឹងទៅបួសឲ្យខាងតែបាន ព្រោះបាននិយាយជាមួយក្រុមគ្រួសាររួចអស់ហើយ ហើយបើទោះជាមានសប្បុរសជន សន្យាធានាព្យាបាលជំងឺប្រចាំកាយរបស់នាយដោយមិនយកប្រាក់ទៀតក៏ដោយ។ ចំណែកឯនាង ភីម ក៏បានបញ្ជាក់ថា អ្វីៗទៅមុខហើយ មិនអាចបកក្រោយឡើយ ក្រុមគ្រួសារមិនអាចឃាត់នាយ តាក់ស៊ី ជាប់ដូចមុនបានទៀតទេ៕

អត្ថបទ៖ ទារិកា