អ្នកលេងគុនចម្រុះ៣រូបប្រៀបធៀបក្បាច់វ៉ៃ ចាន់ រតនា និង Rudy Agustian

2019-04-24 01:55:41
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងក្បាច់គុនចម្រុះដែលមានបទពិសោធន៍លើសង្វៀន ONE Championship ចំនួន ៣ រូបបង្ហាញទស្សនៈរៀងៗខ្លួនមុនពេលកីឡាករម្ចាស់ស្រុក Rudy Agustian ទទួលជើងខ្លាំងបទពិសោធជោកជាំ ចាន់ រតនា នៅសង្វៀន ONE: FOR HONOR ថ្ងៃទី៣ ខែឧសភា ឆ្នាំ ២០១៩ ខាងមុខ នារដ្ឋធានី ហ្សាកាតា ប្រទេស ឥណ្ឌូណេស៊ី។

កីឡាករ ចាន់ រតនា

កីឡាករ Rudy Agustian

អ្នកលេងក្បាច់គុនចម្រុះ រិន សារ័ត្ន បានលើកឡើងថា ៖«ទាំង ចាន់ រតនា និង Rudy មានចំណុចល្អផ្សេងៗគ្នា ប៉ុន្តែខ្ញុំ ខ្លាចណាស់ ចាន់ រតនា ចាញ់កម្លាំងស៊ុហ្វគេ។ បង រតនា មានតែមបន្តិចលើការប្រើក្បាច់គុនខ្មែរ ប៉ុន្តែ ខ្លាចគេឃ្លេបាន គឺលំបាក។ មួយទៀត ខ្ញុំបារម្ភអំពីចំណុចខ្វះខាត មួយចំនួនដូចជា ការវ៉ៃដេក គឺ គាត់មិនសូវប៉ិនទេ គេនៅពីលើ ឬគេនៅពីក្រោម គាត់មិនសូវប៉ិនទប់ ហើយ បើគេឃ្លេបាន ខ្លាចគាត់ឆាបអស់កម្លាំងស៊ុហ្វ»។

បែបណាក្ដី សារ័ត្ន ជឿជាក់ថា កីឡាករកីឡាករមានបទពិសោធច្រើនរបស់កម្ពុជាអាច វ៉ៃការពារទប់បានល្អ តាមរយៈភាពរហ័សរហួនក្នុងការប្រើក្បាច់គុនខ្មែរ។ ប៉ុន្តែ ក្នុងករណីដែល ម្ចាស់ក្លឹបប្រដាល់ «សិល្បៈ» ចេញក្បាច់យឺតទំនងលំបាកបន្តិចរបស់ Rudy។

កីឡាករ រិន សារ័ត្ន

ចំណែកអ្នកលេងក្បាច់គុនចម្រុះម្នាក់ទៀត ស៊ឹម ប៊ុនស៊្រន់ ប្រាប់ថា គូនេះប្រហាក់ប្រហែលគ្នា។ កូនសិស្សរបស់លោក ហ៊ុន ច័ន្ទរាជ្យ វ័យ ២៦ ឆ្នាំរូបនេះបានទស្សនាវីដេអូចុងក្រោយរបស់ Rudy Agustian ផ្តួល ខុន ស៊ីចាន់ កាលខែ កុម្ភៈ នៅសិង្ហបុរី ហើយ និយាយថា ៖« ខុន ស៊ីចាន់ កាលហ្នឹងដូចជាជ្រាយពេក ទើបឡើងមកវ៉ៃវិញក្រោយឈប់មួយរយៈ គេមិនបានហ្វឹកហាត់ដិតដល់ ហើយ កម្លាំងស៊ុហ្វក្រោមគេទៀត ដូច្នេះពេលគេឃ្លេគឺចាញ់ហើយ។ ប៉ុន្តែខ្ញុំគិតថា បើចាន់ រតនា វ៉ៃក្នុងជំហរដេក ច្បាស់ជាចាញ់ស្រាបហើយ មានតែវ៉ៃដោះ និង វ៉ៃឈរទេដែលអាចមានប្រៀប»។

យ៉ាងក្ដី ប៊ុនស៊្រន់ ដាក់ជំនឿចិត្តថា ចាន់ រតនា នឹងធ្វើបានល្អព្រោះមានភាពរហ័សរហួនក្នុងការគេច និង វ៉ៃសងគូប្រកួត ជាពិសេសត្រូវប្រើក្បាច់គុនខ្មែរ ដែលធ្លាប់ប្រកួតលើរេញកន្លងមកឲ្យបានច្រើន។

កីឡាករ ស៊ឹម ប៊ុនស៊្រន់

ទន្ទឹមគ្នានេះដែរ ខុន ស៊ីចាន់ ដែលចាញ់ក្រោមក្បាច់ឃ្លេរបស់ Rudy កាលខែកុម្ភៈ ត្រឹមទឹកទី១ នោះបានបញ្ចេញមតិថា ៖«ខ្ញុំលំបាកសន្និដ្ឋានបន្តិច គូនេះ ព្រោះចាន់ រតនា គីឡូគាត់ធំ ហើយគាត់បញ្ចុះមក៦១គីឡូក្រាម ដូច្នេះឆាប់អស់កម្លាំងណាស់។ ខ្ញុំសង្ឃឹមថា គាត់អាចឈ្នះត្រឹមទឹកទី១ តែបើចូលទឹកទី២ និងទី៣អាចចាញ់គេហើយ។ ខ្ញុំជឿជាក់លើគាត់ត្រឹមតែ ១ ទឹកប៉ុណ្ណោះ»។

កីឡាករមកពីក្លឹប Phnom Penh MMA រូបនេះបញ្ជាក់ទៀតថា ជំនាញរបស់ Rudy ល្អចាប់ល្អគាប ប៉ុន្តែជំនាញ ឈរវ៉ៃ និង តិកនិកវ៉ៃ ចាញ់ ចាន់ រតនា ទេ។ អ្នកលេងគុនខ្មែរនិងគុនចម្រុះរូបនេះនៅតែមានជំនឿចិត្តលើមិត្តរួមជាតិថាអាចសងសឹកជំនួសខ្លួនបាន បើសិនប្រើក្បាច់ខ្មែរបុរាណឲ្យបានច្រើន និង មិនឲ្យគេចូលចាប់បាន ពោលអាចឈ្នះដល់ ៩០% ឯណោះ។

កីឡាករ ខុន ស៊ីចាន់

នៅថ្ងៃទី ៣ ខែ ឧសភា ឆ្នាំ ២០១៩ ខាងមុខនារដ្ឋធានីហ្សាកាតា ប្រទេសឥណ្ឌូណេស៊ី មិនត្រឹមតែ Rudy Agustian និង ចាន់ រតនា ធ្វើឲ្យកក្រើកអ្នកគាំទ្រនៅកម្ពុជាទេ ប៉ុន្តែ ថែមទាំងមានកីឡាការិនីជម្រើសជាតិ នៅ ស្រីពៅ ប៉ះ កីឡាការិនីម្ចាស់ផ្ទះ Priscilla Hertati Lumban Gaol ទៀតផងនៅសង្វៀន ONE: FOR HONOR៕

អត្ថបទ៖ ស៊ីធី