មកដឹងម៉ាកទូរសព្ទមួយចំនួនដែលនៅក្រោមដំបូលម៉ាកផ្សេងមួយទៀត

2019-10-17 07:27:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ាកស្មាតហ្វូនលើទីផ្សារនាពេលបច្ចុប្បន្ននេះ មានជាច្រើនម៉ាក ដោយមានម៉ាកខ្លះទើបលេចមុខកាលពីថ្មីៗនេះប៉ុណ្ណោះ។ ក្នុងចំណោមនោះមានម៉ាកទូរសព្ទមួយចំនួនគឺស្ថិតក្រោមក្រុមហ៊ុនទូរសព្ទដទៃកាន់កាប់តែម្ដង។ ខាងក្រោមនេះនឹងបង្ហាញអំពីក្រុមហ៊ុន ៤ ដែលជាមេរបស់ម៉ាកស្មាតហ្វូនដទៃ ៖

១. ក្រុមហ៊ុន BBK Electronics

BBK គឺជាក្រុមហ៊ុនអេឡិចត្រូនិកមួយដែលមានជំនាញក្នុងការផលិតដូចជាទូរទស្សន៍ ម៉ាស៊ីន MP3 កាមេរ៉ាឌីជីថល និងជាពិសេសស្មាតហ្វូន។ ម៉ាកសញ្ញាស្មាតហ្វូនដែលស្ថិតនៅក្រោមដំបូលរបស់ BBK រួមមាន Realme Oppo Vivo និង OnePlus ហើយចុងក្រោយគេគឺ IQOO។ ក្រុមហ៊ុននេះបង្កើតឡើងនៅឆ្នាំ ១៩៩៨ និងមានទីស្នាក់ការនៅតំបន់ Dongguan ខេត្ត Guangdong ប្រទេសចិន។

២. ក្រុមហ៊ុន TCL

TCL ជាក្រុមហ៊ុនអេឡិចត្រូនិកចិនមានទីស្នាក់ការនៅតំបន់ Huizhou ខេត្ត Guangdong ប្រទេសចិន។ ក្រុមហ៊ុននេះមានឌីហ្សាញ អភិវឌ្ឍន៍ និងលក់ផលិតផលរួមមានទូរទស្សន៍ ទូរសព្ទ ម៉ាស៊ីនត្រជាក់ ម៉ាស៊ីនលាងសម្អាត ទូទឹកកក និងគ្រឿងសម្ភារៈអគ្គិសនីតូចៗ។ ក្រុមហ៊ុនបង្កើតឆ្នាំ ១៩៨១ នេះមានកាន់កាប់ម៉ាកទូរសព្ទ BlackBerry និង Alcatel ផងដែរ។

៣. ក្រុមហ៊ុន Huawei

Huawei បង្កើតឡើងនៅឆ្នាំ ១៩៨៧ ដែលដើមឡើយគឺផ្ដោតលើការផលិតឧបករណ៍ភ្ជាប់ទំនាក់ទំនងទូរសព្ទ និងក្រោយមកពង្រីកលើជំនួញទូរគមនាគមន៍។ នៅឆ្នាំ ២០០៣ ក្រុមហ៊ុនបានចាប់ផ្ដើមជំនួញផលិតទូរសព្ទជាលើកដំបូងដែលប្រើម៉ាក Huawei ផ្ទាល់។ នៅខែធ្នូ ២០១៣ ក្រុមហ៊ុនបានបង្កើតម៉ាកស្មាតហ្វូនឯករាជ្យមួយទៀតនៅចិនគឺ Honor។

៤. ក្រុមហ៊ុន Xiaomi

Xiaomi បង្កើតឡើងនៅឆ្នាំ ២០១០ មានទីស្នាក់ការនៅទីក្រុងប៉េកាំង ប្រទេសចិន ដែលធ្វើការផលិត និងបណ្ដាក់ទុនលើស្មាតហ្វូន កម្មវិធីទូរសព្ទ កុំព្យូទ័រយួរដៃ កាបូប កាស ទូរទស្សន៍ និងផលិតផលជាច្រើនទៀត។ Xiaomi បានបង្កើតចេញនូវម៉ាកទូរសព្ទ Redmi មួយទៀតដាច់ដោយឡែកនៅខែមករា ២០១៩ ដែលផ្ដោតលើការផលិតស្មាតហ្វូនតម្លៃធូរ៕