ភ្ញាក់ផ្អើលពេលយក iPhone 11 ដាក់ត្រាំក្នុងទឹក ព្រោះថាខ្លាំងលើសអ្វីដែល Apple អួត

2019-10-25 03:14:55
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការធ្វើតេស្តថ្មីចុងក្រោយមួយរបស់ក្រុមការងារសារព័ត៌មាន CNET បានបង្ហាញថា iPhone ម៉ូដែលថ្មីរបស់ Apple គឺធន់នឹងទឹកបានល្អលើសពីអ្វីដែលក្រុមហ៊ុនបានប្រកាសប្រាប់ទៅទៀត។

នៅក្នុងការប្រកាសចេញ iPhone 11/ iPhone 11 Pro និង iPhone 11 Pro Max ក្រុមហ៊ុន Apple និយាយថា iPhone ទាំងបីមានសមត្ថភាពធន់នឹងទឹកកម្រិត IP68 ដែលអាចឲ្យវាស្ថិតនៅក្នុងទឹកជម្រៅដល់ ២ ម៉ែត្រ ក្នុងពេល ៣០ នាទី។

យ៉ាងណាក្ដីតាមការធ្វើតេស្តជាក់ស្ដែងលើ iPhone 11 និង iPhone 11 Pro លទ្ធផលបានធ្វើឲ្យគេភ្ញាក់ផ្អើលដោយសារសមត្ថភាពធន់នឹងទឹករបស់វាខ្លាំងជាងការប្រកាសរបស់ក្រុមហ៊ុន ៣ ដងឯណោះ។

CNET បានដាក់ iPhone 11/iPhone 11 Pro ជាប់នឹងដ្រូននិងបញ្ជាដ្រូនតាមរយៈទូរសព្ទ។ គេបានធ្វើតេស្តដោយកទូរសព្ទទម្លាក់នៅឈូងសមុទ្រ Monterey Bay ក្នុងរដ្ឋ California។ ដំបូងគេសាកបោះវាចូលក្នុងទឹកជម្រៅ ៤ ម៉ែត្រ ដោយទុករយៈពេល ៣០ នាទី ហើយទូរសព្ទនៅដំណើរការធម្មតាក្រោយតេស្តរួច។

បន្ទាប់មកគេក៏សម្រេចបោះវាជម្រៅជ្រៅជាងមុន គឺ ៨ ម៉ែត្រ និង ១២ ម៉ែត្រ។ ហើយលទ្ធផលគឺគួរឲ្យភ្ញាក់ផ្អើល ដោយសារ iPhone ទាំងពីរនៅតែមានជីវិតដំណើរការបាន។ ប៉ុន្តែគេសង្កេតឃើញមានបញ្ហានៅរន្ធបញ្ចេញសំឡេង ដែលបញ្ចេញសំឡេងមិនច្បាស់និងកខ្សោយ។ ទស្សនាវីដេអូខាងក្រោម ៖