ប៉ះពាល់សេដ្ឋកិច្ចខ្លាំងពេក! ស៊ី ជីងពីងប្រកាស សន្យាជួយឧស្សាហកម្មដែលរងគ្រោះពីវីរុសកូរ៉ូណា

2020-02-13 02:44:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការខិតខំជាថ្មីដើម្បីទប់ទល់នឹងការខូចខាតសេដ្ឋកិច្ចកាន់តែច្រើនឡើង ប្រធានាធិបតីចិនលោកស៊ី ជីនពីង កាលពីថ្ងៃពុធទី១២កុម្ភៈ បានសន្យាកាត់បន្ថយពន្ធនិងផ្តល់ជំនួយផ្សេងៗដល់បណ្តាឧស្សាហកម្មណាដែលរងគ្រោះពីការផ្ទុះកូរ៉ូណាវីរុស។

ការប្រកាសរបស់មេដឹកនាំចិន កើតឡើងចំពេលបណ្តាក្រុមហ៊ុនប្រឈមការ ខាតបង់កាន់តែច្រើនឡើងដោយសារតែការបិទរោងចក្រ ការិយាល័យ ហាងនិងស្ថាប័នជំនួញផ្សេងៗក្នុងការចាត់វិធានការប្រឆាំងជំងឺជាទូទៅនិងយ៉ាងតឹងរ៉ឹងបំផុតដែលមិនធ្លាប់ត្រូវបានអនុវត្តតាំងពីមុនមក។ លោកស៊ី បានមានប្រសាសន៍តាមកញ្ចក់ទូរទស្សន៍ជាតិថា ចិនត្រូវការប្រតិបត្តិការសេដ្ឋកិច្ចមានស្ថិរភាពនិងភាពសុខដុមសង្គម។លោកបានអំពាវនាទៅគ្រប់រដ្ឋាភិបាលនិងគណៈកម្មាធិការបក្សគ្រប់កម្រិតថ្នាក់ខិតខំធ្វើការដើម្បីឈ្នះសង្គ្រាមប្រឆាំងនឹងកូរ៉ូណាវីរុសCOVID-19 ហើយក្នុងពេលជាមួយគ្នា ព្យាយាមសម្រេចឲ្យបានគោលដៅសេដ្ឋកិច្ចនិងអភិវឌ្ឍន៍សង្គមនៅឆ្នាំនេះ។

លោកស៊ី ដែលក៏ជាអគ្គលេខានៃគណៈកម្មាធិការកណ្តាលរបស់គណបក្សកុំម្មុយនីស្តចិន បានធ្វើការអំពាវនាវដូច្នេះក្នុងពេលលោកធ្វើជាអធិបតីនៃកិច្ចប្រជុំមួយរបស់គណៈកម្មាធិការអចិន្ត្រៃយ៍នៃការិយាល័យនយោបាយរបស់គណៈកម្មាធិការកណ្តាលរបស់គណបក្សកុំម្មុយនីស្តចិនកាលពីថ្ងៃពុធ។ បើតាមលោកស៊ី វិធានការម៉ឺងម៉ាត់ឡើងគួរត្រូវប្រកាន់យកដើម្បីទប់វីរុស ជាពិសេសនៅតំបន់រងការវាយប្រហារខ្លាំង ឬប្រឈមខ្ពស់ នៅពេលការប្រយុទ្ធប្រឆាំងនឹងជំងឺឆ្លងនេះឈានចូលដំណាក់កាលសំខាន់។

លោកថា ចាប់តាំងពីការផ្ទុះជំងឺឆ្លងនេះមក គ្រប់តំបន់និងគ្រប់ភាគីបានបូជាខ្លួនឯងដើម្បីសង្គ្រាមមួយនេះ ដោយបុគ្គលិកពេទ្យធ្វើការខ្លាំងជាងគេនៅខ្សែត្រៀមជួរមុខ។ជាថ្មីទៀត លោកបានអំពាវនាវឲ្យបុគ្គលិកសុខាភិបាលនិងអាជ្ញាធរខិតខំដាក់សុខភាពនិងសុវត្ថិភាពរបស់ប្រជាជនជាអាទិភាពកំពូល៕

ប្រភព ៖ rasmeinews