ចេញមកច្បាស់ចែស! Google Pixel 4a ក្នុងវីដេអូ Review ភាសាអេស្ប៉ាញ

2020-03-11 01:54:24
ចំនួនមតិ 0 | ចំនួនចែករំលែក 0

ចន្លោះមិនឃើញ

Pixel 4a ដែលគេរំពឹងថា Google ប្រកាសចេញជាផ្លូវការក្នុងខែឧសភាខាងមុខនេះ បានលេចមុខច្បាស់ៗក្នុងវីដេអូ Review ជាភាសាអេស្ប៉ាញ អាចឲ្យគេឃើញរូបរាង និងជាពិសេសលក្ខណៈសម្បត្តិរបស់វាជាមុន។

វីដេអូបានបង្ហាញថា Pixel 4a មានរចនាបថដូចជារូបភាព Render ចេញផ្សាយកន្លងមក ដែលផ្នែកខាងមុខមានអេក្រង់លាតមានចោះរន្ធសម្រាប់ដាក់កាមេរ៉ា Selfie ហើយផ្នែកខាងក្រោយមានបំពាក់កាមេរ៉ាមួយគ្រាប់ដាក់ក្នុងស៊ុមរាងបួនជ្រុង។

អេក្រង់របស់ Pixel 4a នេះគឺមានទំហំ ៥,៨១ អ៊ីញ អាចបង្ហាញរូបភាពក្នុងកម្រិត ១០៨០ x ២៣៤០ ភីកសែល ជាមួយ Refresh Rate 60Hz។ កាមេរ៉ាក្រោយមានទំហំ ១២MP អាចថតវីដេអូកម្រិត 4K និងមានមុខងាររក្សាលំនឹង EIS ហើយកាមេរ៉ា Selfie ទំហំ ៨MP។

ផ្នែកខាងលើមានរន្ធដោតកាស 3.5 mm ជាមួយរន្ធសាកថ្មប្រភេទ USB-C នៅផ្នែកខាងក្រោយ ដែលមានថ្មទំហំ ៣០៨០ mAh។ បន្ទះឈីបគឺជាម៉ូដែល Snapdragon 730 អមជាមួយ RAM ទំហំ ៦GB និងអង្គផ្ទុកទំហំ ៦៤GB។

ស្មាតហ្វូននេះមានបំពាក់ស៊ីមកាតចំនួនពីរ ដែលមានមួយទំនងជាប្រភេទ eSIM។ ជាមួយ Pixel 4a នេះដែរ គេឃើញឈ្មោះសម្គាល់ចំនួន ៣ គឺមាន Sunfish, Redfin និង Bramble។ សម្រាប់ Sunfish គឺជាឈ្មោះសម្គាល់របស់ Pixel 4a ហើយពីរប្រភេទទៀតទំនងជា Pixel 4a 5G និង 4a XL 5G ដោយសារវាប្រើឈីប Snapdragon 765៕

ប្រភព៖ GSMarena ប្រែសម្រួល៖ សុខហេង