កើតមុនពេលមករដូវ ស្ត្រីគួរធ្វើបែបណា?

2014-12-07 18:27:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ការមករដូវគឺជាសភាពធម្មតា និងបង្ហាញពីសុខភាពល្អដែលតែងកើតឡើងរាល់ខែសម្រាប់នារី។ ការមករដូវនេះឯងបង្ហាញថារាងកាយស្ត្រីមានដំណើរការល្អ និងបញ្ជាក់ថាស្ត្រីគ្មានផ្ទៃពោះ។ វដ្ដនៃរដូវនេះអាចបង្កផលប៉ះពាល់ដល់ផ្លូវអារម្មណ៍ និងរាងកាយស្ត្រីតិចតួចដូចជា ធ្វើឲ្យមានអារម្មណ៍មួម៉ៅ អស់កម្លាំង និងកើតមុនជាដើម។

នាយកដ្ឋានផ្នែកសុខភាព និងមនុស្សរបស់សហរដ្ឋអាមេរិកបានបញ្ជាក់ថា ការប្រែប្រួលអរម៉ូនក្នុងអំឡុងពេលមករដូវ ធ្វើឲ្យចេញជាមុនសម្រាប់នារីមួយចំនួន។ ហេតុនេះការថែរក្សាស្បែកនៅមុន ក្នុងអំឡុងពេល និងក្រោយការមករដូវ អាចជួយនារីយើងក្នុងការកម្ចាត់មុនទាំងនោះបាន។

វិធីទី១៖

លាងមុខរបស់អ្នករៀងរាល់ព្រឹក និងពេលយប់ជាមួយហ្វូមលាងមុខដែលត្រូវនឹងស្បែកមុខ។ អ្នកជំនាញបានរៀបរាប់ថា បើអ្នកលាងមុខច្រើនជាង២ដង ក្នុងមួយថ្ងៃ ឬក៏ប្រើប្រាស់ផលិតផលលាងមុខដែលមានសភាពគគ្រាត វានឹងធ្វើឲ្យស្បែកមុខរបស់អ្នកកាន់តែឡើងមុន។ មានតែផលិតផលលាងមុខ និងគ្រឿងសម្អាងដែលគ្មានជាតិខ្លាញ់ និងមិនធ្វើឲ្យស្ទះរន្ធញើសប៉ុណ្ណោះទើបសមសម្រាប់ស្បែកកើតមុន។

វិធីទី២៖ ពិភាក្សាជាមួយគ្រូពេទ្យ ក្នុងករណីដែលអាចប្រើថ្នាំពន្យារកំណើតដើម្បីជួយទប់ទល់ការកើតមុន។ វិធីនេះមានប្រសិទ្ធភាព ជាពិសេសសម្រាប់ស្ត្រីដែលតែងឡើងមុនរាល់ពេលមករដូវ។ តាមសម្ដីអ្នកជំនាញមកពីនាយកដ្ឋានសុខភាព និងមនុស្សរបស់សហរដ្ឋអាមេរិកបានអះអាងថា ថ្នាំពន្យារកំណើតអាចជួយកាត់បន្ថយជាតិខ្លាញ់ពីក្នុងស្បែក និងមូលហេតុផ្សេងទៀតដែលបង្កឲ្យកើតមុន។

វិធីទី៣៖

ក្នុងអំឡុងពេលមករដូវ អ្នកគួរចេះថែរក្សាស្បែករបស់អ្នកឲ្យមានសំណើមគ្រប់គ្រាន់ ជាជាងទុកឲ្យស្បែកឡើងស្ងួត ព្រោះវាងាយស្រួលដល់ការកកើតរបស់មុន។ ញ៉ាំអាហារបំប៉នសុខភាពឲ្យបានច្រើន និងគ្រប់គ្រាន់ ព្រោះអំឡុងពេលនេះ រាងកាយរបស់អ្នកត្រូវការជាចាំបាច់នូវសារធាតុបំប៉នទាំងនោះ ដើម្បីមកចិញ្ចឹមរាងកាយ ជំនួសឲ្យឈាមរដូវដែលធ្លាក់មក។

វិធីទី៤៖ ចៀសវាងអារម្មណ៍ស្មុគស្មាញ ឬបញ្ហាដែលធ្វើឲ្យអ្នកគិតច្រើន ព្រោះអារម្មណ៍ស្មុគស្មាញក៏អាចជាកត្តាដែលធ្វើឲ្យកើតមុនផងដែរ។ អ្នកអាចធ្វើការសមាធិរយៈពេលខ្លីណាមួយ ឬសម្រាកឲ្យបានគ្រប់គ្រាន់ដើម្បីកម្ចាត់អារម្មណ៍ស្ត្រេសទាំងនោះ។ ជាងនេះទៀត អ្នកត្រូវញ៉ាំទឹកឲ្យបានច្រើន ដើម្បីចូលទៅផ្សើមរាងកាយ និងលាងជាតិកខ្វក់ចេញពីរាងកាយបានផង៕

ប្រែសម្រួល៖ សរ សុគន្ធី ប្រភព៖ livestrong, younghopes