ខ្មោចឡានតម្លៃមហាសាល បែរជាទុកចោលហាលវាលអស់៥ទសវត្សរ៍

2014-12-08 18:19:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលរថយន្តល្បីៗតម្លៃកប់ពពកជាច្រើនដូចជា Ferrari, Maserati, Bugatti និងច្រើនម៉ាកផ្សេងទៀត ទើបប្រទះឃើញដោយអ្នកជំនាញនៅកសិដ្ឋានមួយ ភាគខាងលិចប្រទេសបារាំង ក្រោយទុកចោលតាំងពីទសវត្សរ៍ឆ្នាំ១៩៧០។ រតនសម្បត្តិទាំងនេះ ត្រូវគេប៉ាន់ប្រមាណថាអាចមានតម្លៃដល់ទៅ ១៨លានដុល្លារអាមេរិកឯណោះ។

ខាងឆ្វេង គឺរថយន្តម៉ាក Ferrari 250GT SWB ផលិតឆ្នាំ១៩៦១ ដែលអាចមានតម្លៃជាង ១០លានដុល្លារ

ប្រវត្តិរបស់រថយន្តប្រណីតដ៏ច្រើននេះ មានមក ៣តំណទៅហើយ។ ដំបូងឡើយ រថយន្តទាំងអស់ គឺជាកម្មសិទ្ធិរបស់លោក Roger Baillon ដែលជាសហគ្រិនម្នាក់ចូលចិត្តប្រមូលរថយន្តប្រណីតៗ។ លោកបានប្រមូលរថយន្តទាំងអស់នេះ តាំងពីទសវត្សរ៍ឆ្នាំ១៩៥០ ដល់ទសវត្សរ៍ឆ្នាំ១៩៧០ ហើយមានបំណងដាក់តាំងបង្ហាញនៅសារមន្ទីរ។

ទោះយ៉ាងណា គម្រោងនោះត្រូវបរាជ័យ បន្ទាប់ពីជំនួញលោកដាំក្បាលចុះ ដែលបង្ខំឲ្យលោកលក់រថយន្ត ៥០គ្រឿងវិញ ដើម្បីស្ដារស្ថានភាពដ៏អាក្រក់ក្នុងការរកស៊ី។ ចាប់តាំងពីពេលនោះមក ការប្រមូលរថយន្តរបស់អ្នកមានរូបនេះបានអសកម្ម ហើយរថយន្តដែលប្រមូលពីមុនមកត្រូវទុកចោលក្នុងរោងប្រក់ស័ង្កសី នៅកសិដ្ឋានមួយ។

លោក Baillon ដែលជាអ្នកប្រមូលរថយន្តបានស្លាប់ប្រហែលជាង ១០ឆ្នាំមុននេះ ហើយក្រោយមកកូនប្រុសដែលជាអ្នកស្នងមរតកបានបាត់បង់ជីវិតកាលពីឆ្នាំមុនទៀត។ បន្ទាប់ពីម្ចាស់មរតកស្លាប់បាត់ ចៅរបស់លោក Baillon បានហៅអ្នកជំនាញដេញថ្លៃរថយន្ត ដើម្បីគណនាពីតម្លៃរបស់រតនសម្បត្តិទាំងអស់នេះ។

លោក Pierre Novikoff ដែលជាអ្នកជំនាញដេញថ្លៃរថយន្តម្នាក់បាននិយាយថា "ខ្ញុំមិនដែលឃើញឡានច្រើនប្លែកៗគ្នា នៅលើដៃអ្នកប្រមូលតែម្នាក់អីចឹងទេ... មានតាំងពី Bugatti, Hispano-Suiza, Talbot-Lago, Panhard-Levassor, Maserati, Ferrari, Delahaye, Delage"។

អ្វីដែលអ្នកជំនាញមានការភ្ញាក់ផ្អើលខ្លាំង គឺរថយន្តម៉ាក Ferrari 250GT SWB ផលិតឆ្នាំ១៩៦១ ដែលអាចទទួលការចាប់អារម្មណ៍ពីអ្នកប្រមូលរថយន្តម៉ាក Ferrari និងអាចលក់បានរហូតដល់ទៅជាង ១០លានដុល្លារ។ ចំណែកឯរថយន្តមួយទៀតនោះគឺ Maserati A6G Gran Sports ផលិតឆ្នាំ១៩៥៦ ដែលមានតែ ៣គត់លើលោក និងអាចដេញថ្លៃបានដល់ខ្ទង់លានដុល្លារដូចគ្នា៕