តិចនិកមិនឲ្យសង្សារផឹកជ្រុល

2014-12-28 16:17:05
ចំនួនមតិ 0 | ចំនួនចែករំលែក 0

ចន្លោះមិនឃើញ

សុភាពនារីទាំងឡាយប្រហែលមិនសប្បាយចិត្តប៉ុន្មានឡើយ ពេលឃើញសង្សារសំណព្វចិត្តឲ្យតែជួបជុំគ្នាជាមួយមិត្តភ័ក្ដិពេលណា ដឹងតែផឹកទល់យប់ រហូតដល់ស្រវឹងជាមិនខាន។ គូសង្សារខ្លះឈ្លោះគ្នាព្រោះតែរឿងនេះ។ មិនចង់បែកបាក់គ្នាព្រោះតែរឿងហ្នឹង ដូច្នេះដើម្បីធ្វើឲ្យសង្សារឈប់ផឹកស្រាច្រើន គួរធ្វើបែបណាទៅ?

ទាក់ ទងនឹងរឿងនេះ កញ្ញា វី អ្នកគិតលុយនៅក្រុមហ៊ុនឯកជនមួយកន្លែងជិតផ្សារអូរឫស្សី ប្រាប់ថា វាអាចជារឿងលំបាកមួយសម្រាប់សុភាពនារី ព្រោះបុរសគេក៏ចង់មានសេរីភាពរបស់គេដែរ គេចង់ធ្វើអ្វីដែលគេចង់ ។

កញ្ញា បន្តថា៖" វិធីរបស់ខ្ញុំ គឺនិយាយពាក្យផ្អែមល្ហែម និង មានសុជីវធម៌ទៅកាន់គាត់។ យើងប្រើពាក្យបែបហាមឃាត់តែក្នុងន័យព្រួយបារម្ភ ដូចជាបងកុំផឹកច្រើនពេកប្រយ័ត្នឈឺណា ខ្លាចមានគ្រោះថ្នាក់ពេលជិះទៅផ្ទះវិញ ។ ប្រាប់គាត់ពីផលលំបាកដែលយើងមិនចង់បាន និង គុណវិបត្តិរបស់ស្រា"។ ប៉ុន្តែនារីក៏គួរមើលពីកាលៈទេសៈផងដែរត្រូវមើលពីចរិតរបស់គេ ថាគេមានធ្វើអ្វីខុសក្រៅពីផឹកអត់។

ស្រដៀងគ្នានេះដែរ កញ្ញា ឈុន ផល្លា អតីតនិស្សិត រៀនពេទ្យ និយាយថា នៅពេលជួបជុំគ្នាបុរសមិនចង់លក់មុខដោយសារតែមិនផឹកស្រាព្រោះសង្សារទេ។ នារីខ្លះជ្រើសយកការធ្វើមុខក្រញូវ បើនិយាយហើយមិនព្រមស្ដាប់ដើរចេញ។

ផល្លា ថា៖ "ខ្ញុំប្រាប់មិត្តប្រុសឲ្យប្រាប់មិត្តភ័ក្ដិគាត់ថា គាត់ឈឺក្រពះផឹកច្រើនមិនបានទេ ម្យ៉ាងត្រូវឌុបមិត្តស្រីទៅផ្ទះផងខ្លាចផឹកច្រើនឌុបមិនកើត។ ហើយនៅពេលគាត់ទៅជប់លៀងអី ខ្ញុំតែងផ្ញើរសារថា បើស្រវឹងកុំបើកបរ! អូនចង់ឃើញបងមានក្ដីសុខ។ យើងមិនអាចទៅហាមឃាត់១០០% គ្រប់ពេលទេ ត្រឹមកាត់បន្ថយបានខ្លះ តែយើងក៏មើលដែរបើយូរៗគាត់ផឹកម្ដងៗក្នុងការជួបជុំមិត្តភ័ក្ដិ យកល្អកុំឈ្លោះជាមួយនឹងគាត់អី គ្រាន់តែសុំកុំឲ្យផឹកច្រើនពេកទៅបានហើយ។ ខ្ញុំតែងធ្វើបែបនេះហើយគាត់មិនដែលខឹងខ្ញុំទេ ព្រោះគាត់យល់ថាខ្ញុំស្រលាញ់និងបារម្ភគាត់"។

សូមអាន៖ ចង់បាន iPhone 6 ចូលទៅកាន់ Get Your Sexy Back KH

សម្រាប់ អ្នកប្រឹក្សាផ្លូវចិត្តរបស់ទំព័រមើលចិត្ត (www.facebook.com/merlchitpage) កញ្ញា ឡេង ពុទ្ធារី ចែករំលែកនូវគន្លឹះមួយចំនួនដើម្បីជំរុញឲ្យដៃគូកាត់បន្ថយឬឈប់ផឹកស្រាបានខ្លះ ។ ពេលខ្លះការរួមចំណែកពីមនុស្សជាទីស្រលាញ់ក្នុងការបញ្ឈប់សុរារបស់សង្សារពេលខ្លះពិតជាអាចមែន។

- ត្រូវដាក់ដែនកំណត់ហើយនិយាយឲ្យបានច្បាស់លាស់ជាមួយគាត់ ។ ប្រសិនបើគាត់ប្រើសម្ដីធ្ងន់ៗ ឬមានកាយវិការមិនសមរម្យពេលគាត់ផឹកស្រវឹងម្ដងៗ យើងគួរតែកុំទៅណាជាមួយគាត់នៅកន្លែងបែបនោះទៀតអី ។ ហើយបើសិនជាគាត់ដល់ថ្នាក់ប្រើហិង្សាទៀតនៅពេលដែលគាត់ផឹកស្រវឹង ម្ដងៗ យើងមិនគួរនៅជិតគាត់ដែរពេលនោះ ។

- ត្រូវចងចាំថា ការញៀនសុរា គឺជា ជំងឺមួយ ។ យើងស្អប់ការញៀនសុរា តែមិនមែនស្អប់ដៃគូរបស់យើងទេ ។ ដូច្នេះ សូមកំដរគាត់ បង្កើតភាពរីករាយជាមួយគាត់ បង្ហាញក្ដីស្រឡាញ់ដល់គាត់ឲ្យបានច្រើន នៅពេលដែលគាត់មិនផឹក ។ ក្នុងខណៈនោះ យើងក៏អាចចាប់ផ្ដើមនិយាយបន្តិចម្ដងៗ តាមសម្រួលនិងដោយពាក្យផ្អែមល្ហែមពីរឿងដែលយើងពិបាកចិត្ត ឬឈឺចាប់ដោយសារការផឹករបស់គាត់ ដោយធ្វើយ៉ាងណាមិនឲ្យវាបង្កទៅជាជម្លោះពាក្យសម្ដីនោះឡើយ ។

ប្រសិនបើចង់ឲ្យដៃគូរឈប់ផឹកស្រាតែម្ដង ប្រហែលជាគ្មានវិធីណាមួយដែលប្រើហើយទទួលបានជោគជ័យទាំងស្រុងនោះ ទេ ពោលគឺមានតែខ្លួនគាត់ផ្ទាល់ប៉ុណ្ណោះដែលអាចធ្វើការសម្រេច ចិត្តថាគួរបន្តផឹកដដែល ឬកាត់បន្ថយ ឬឈប់តែម្ដង ៕

នៅតែស្រលាញ់គ្នា ហើយសង្សារមិនផឹកគ្រឿងស្រវឹង មិត្តយុវវ័យយល់ថា មានយុទ្ធសាស្ត្រអ្វីផ្សេងពីនេះទៀតទេ? បើមានជួយប្រាប់ផងណា។

អត្ថបទ៖ សុនា