ពិធីករកម្មវិធី "រង្វាន់ទេវតា" បង្ខំចិត្តសេងហាងនៅផ្លូវកម្ពុជាក្រោម ព្រោះអាណិតម្ដាយ!

2014-12-16 13:00:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីករកម្មវិធី "រង្វាន់ទេវតា" យឹម ណារ៉ា បានបង្ខំចិត្តបិទទ្វាហាងលក់សំលៀកបំពាក់នៅផ្លូវកម្ពុជាក្រោម និង សេងហាងនោះឲ្យអ្នកដទៃជាអ្នកជួលជំនួសទៅវិញ ដោយសារតែអាណិតម្ដាយពេក។

ពិធីករខាងលើបានប្រាប់ Sabay ថ្មីៗនេះថា រូបគេមមាញឹកក្នុងការងារសិល្បៈដកដៃមិនរួចសោះ នៅមួយរយៈចុងក្រោយនេះ ហើយមិនអាចឆ្លៀតមកជួយម្ដាយមើលការខុសត្រូវហាងបានទេ។ រូបគេត្រូវចេញពីផ្ទះតាំងពីព្រឹក រហូតយប់ជ្រៅទើបត្រឡប់វិញ និង ស្ទើរមិនមានពេលជួបមុខម្ដាយទៀតផង។

ណារ៉ា បញ្ជាក់ថា៖ “អត់ចង់ឲ្យម៉ាក់នៅម្នាក់ឯងទេ ហើយបងស្រីចង់ឲ្យគាត់ទៅរស់នៅជាមួយឯសៀមរាប ព្រោះអាចមានពេលគ្រប់គ្រាន់មើលថែទាំគាត់ជាង"។ ម្យ៉ាងទៀត ណារ៉ា បន្ថែមថា មិនមានពេល ចេញចូលទៅមកប្រទេសថៃ ដើម្បីយកសំលៀកបំពាក់មកលក់ដូចពីមុនឡើយ ខណៈមានកម្មវិធីរបស់ CTN និង My TV ចំនួន ៥ នៅក្នុងដៃ ដោយមិនរាប់បញ្ចូលកម្មវិធីសិល្បៈនានាទៀតទេ។

ហេតុផលទាំងអស់នេះ បានរុញច្រានឲ្យតារាសម្ដែងខាងលើសម្រេចចិត្ត បញ្ចប់អាជីពជាអ្នកលក់សំលៀកបំពាក់បុរស និង ជួនម្ដាយទៅរស់នៅខេត្តសៀមរាបជាមួយបងស្រី ហើយរូបគេសុខចិត្តរស់នៅម្នាក់ឯងនៅភ្នំពេញ។

ទោះបីជាយ៉ាងណា ពិធីកររូបនេះកំពុងរៀបចំផែនការ ដើម្បីបើកហាងមួយទៀត ដោយចូលហ៊ុនគ្នាជាមួយមិត្តភក្ដិនៅពាក់កណ្ដាលឆ្នាំ ២០១៥ ខាងមុខនេះ ព្រោះមានគ្នាច្រើនងាយស្រួលជួយមើលការខុសត្រូវគ្នា។ ទោះបីជាយ៉ាងណា អ្នកសម្របសម្រួលកម្មវិធីខាងលើ មិនបានបញ្ជាក់ថា មុខរបរថ្មីនេះជាអ្វីពិតប្រាកដនៅឡើយ។

ចំណែករឿងរ៉ាវស្នេហាឯណេះវិញ តារារូបនេះបង្ហើបថា អាចនឹងសម្លឹងរកនារីម្នាក់ ហើយរៀបអាពាហ៍ពិពាហ៍នៅឆ្នាំ២០១៦ ឬ២០១៧ខាងមុខ ខណៈមានវ័យ២៨ឆ្នាំទៅហើយ៕

មើលតារាភូមា Selfies ក្នុងថ្ងៃបុណ្យសមុទ្រខ្មែរ

អានអត្ថបទ៖ សាន់ដេ ត្រៀម១អាល់ប៊ុមឲ្យ ប៊ុន សក្ដិ ផ្ទុះក្នុងឆ្នាំ២០១៥

អត្ថបទ៖ សំ ជំនាញ