ឆ្នាំ​២០១៤​កាន់​តែ​ជិត​ដល់​ថ្ងៃ​បញ្ចប់ រឿងរ៉ាវ​ជា​ច្រើន​បាន​កើត​ឡើង​នៅ​ក្នុង​ទ្វីប​អាហ្រ្វិក​ក្នុង​រយៈ​ពេល​ស្ទើរ​ពេញ​មួយ​ឆ្នាំ​កន្លង​មក​នេះ។ ក្រៅ​ពី​ការ​រីក​រាលដាល​ឡើង​វិញ​នៃ​មេរោគ​មរណៈ​អេបូឡា​នៅ​អាហ្រ្វិក​ខាង​លិច ការ​ចាប់​ជំរឹត​សិស្ស​សាលា​ស្រីៗ​នៅ​នីហ្សេរីយ៉ា ​និង​ជម្លោះ​នៅ​ស៊ូដង់​ខាង​ត្បូង ​នៅ​​មាន​រឿងរ៉ាវ​ប្លែកៗ​ជា​ច្រើន​ទៀត​បាន​កើត​ឡើង​ក្នុង​ទ្វីប​មួយ​នេះ។

១. ការ​ដើរ​ហាត់ប្រាណ​នៅ​ប៊ូរុនឌី ជា​រឿង​ខុស​ច្បាប់

ការ​រត់​យឺតៗ ឬ​ការ​ដើរ​ដើម្បី​ហាត់ប្រាណ គឺ​ជា​ទម្លាប់​ជា​យូរ​មក​ហើយ​សម្រាប់​ប្រជាជន​នៃ​ប្រទេស​ប៊ូរុនឌី ដោយ​មាន​មនុស្ស​ម្នា​រាប់​រាយ​នាក់​ចេញ​មក​ហាត់​ប្រាណ​​បែប​នេះ​នា​ពេល​ព្រឹក​ព្រលឹម។ ប៉ុន្តែ​កាល​ពី​ខែ​មីនា អាជ្ញាធរ​បាន​ដាក់​បម្រាម​មិន​ឲ្យ​មាន​ការ​ដើរ​ហាត់​ប្រាណ​ជា​ក្រុម​ទៀត​នោះ​ទេ ដរាប​ណា​មាន​ការ​អនុញ្ញាត​ពី​អាជ្ញាធរ។ បម្រាម​នេះ​ក៏​បាន​ប៉ះពាល់​ដល់​កីឡា​លេង​ជាមួយ​ក្រុម​មួយ​ចំនួន​ផង​ដែរ។ ច្បាប់​ថ្មី​នេះ​ត្រូវ​បាន​បង្កើត​ឡើង ក្រោយ​ពី​មាន​ការ​ចាប់​ខ្លួន​សមាជិក​បក្ស​ប្រឆាំង​ដែល​នាំ​គ្នា​ស្រែក​ពាក្យ​ពេចន៍​ឌឺដង​ក្នុង​ន័យ​នយោបាយ​ពេល​ដើរ​ហាត់ប្រាណ។

២. ប៉ូលិស​នៅ​តង់ហ្សានី​ត្រូវ​បាន​ហាម​ឃាត់​មិន​ឲ្យ​ថើប​គ្នា

ប៉ូលិស​ប្រុស​ស្រី​ពីរ​នាក់​នៅ​តង់ហ្សានី​ ដែល​ត្រូវ​គេ​ថត​បាន​ពេល​កំពុង​ថើប​គ្នា ត្រូវ​បាន​បណ្ដេញ​ចេញ​ពី​ការងារ។ រូបភាព​ដែល​ត្រូវ​បាន​គេ​ចែក​រំលែក​ត​គ្នា​ជា​ច្រើន​តាម​បណ្ដាញ​សង្គម​នេះ គឺ​បាន​បំពាន​ដល់​ច្បាប់​ដែល​ហាម​មិន​ឲ្យ​ប៉ូលិស​ថើប​គ្នា​ពេល​កំពុង​ពាក់​ឯកសណ្ឋាន។ ប៉ូលិស​ដែល​ថត​រូប​នេះ រួច​បង្ហោះ​តាម​អនឡាញ ក៏​ត្រូវ​បាន​បណ្ដេញ​ចេញ​ផង​ដែរ។

៣. នៅ​ហ្ស៊ីមបាវ៉េ រៀន​ត្រឹម​រយៈ​ពេល​២​ខែ ក៏​អាច​ទទួល​សញ្ញាប័ត្រ​បណ្ឌិត (PhD) បាន​ដែរ

សាកល​វិទ្យាល័យ​ University of Zimbabwe បាន​បង្ក​ឲ្យ​មាន​ការ​ភ្ញាក់ផ្អើល​​ ក្រោយ​ផ្ដល់​សញ្ញាប័ត្រ​បណ្ឌិត​​ចិត្តវិទ្យា​ដល់​ជំទាវ​ទី​១​ Grace Mugabe។ ក្រោយ​ការ​ស៊ើប​អង្កេត​បាន​ឲ្យ​ដឹង​ថា​ជំទាវ​ជា​ភរិយា​​​ជា​ភរិយា​ប្រធានាធិបតី Robert Mugabe នោះ ​ប្រើ​ពេល​ត្រឹម​២ខែ​ប៉ុណ្ណោះ​ដើម្បី​បាន​សញ្ញាប័ត្រ​នេះ។ ក្រៅ​ពី​នេះ​ក៏​មានការ​បារម្ភ​ផង​ដែរ​ ដោយ​សារ​និក្ខេបទ​របស់​លោក​ជំទាវ​នោះ​មិន​ត្រូវ​បាន​ដាក់​ក្នុង​បណ្ដាល័យ​របស់​សាកលវិទ្យាល័យ​ឡើយ។ ក្រោយ​បាន​ងារ​ជា​បណ្ឌិត វិថី​ថ្មី​មួយ​បាន​ដាក់​ថា "Dr Grace Mugabe Way” ផង​ដែរ។

៤. មនុស្ស​ស្អាត​ជាង​គេ​ក្នុង​លោក ឬ The World's Most Beautiful Person មក​ពី​ប្រទេស​កេនយ៉ា

ទស្សនាវដ្ដី People បាន​ដាក់​ងារ​នាង Lupita Nyong'o ជា​មនុស្ស​ស្អាត​ជាង​គេ​បំផុត​ក្នុង​លោក​ប្រចាំ​ឆ្នាំ​២០១៤។

តារា​សម្ដែង​កេនយ៉ា​រូប​នេះ បាន​ល្បី​ឈ្មោះ​ខ្លាំង​​ក្នុង​រឿង 12 Years a Slave ដោយ​ឈ្នះ​ពាន​រង្វាន់​ Oscar ក្នុង​នាម​ជា​តួ​រង​ល្អ​បំផុត (Best supporting actress)។ យ៉ាង​ណា​ក្ដី នាង​ក៏​ធ្លាប់​ត្រូវ​បាន​គេ​រិះគន់​តាម​អនឡាញ​ថា​បាន​ខាត់​ស្បែក​របស់​នាង​ឲ្យ​ភ្លឺ​ជាង​ស្បែក​ធម្មជាតិ​ផង​ដែរ។

៥. Mandela មាន​ទន្សាយ​នៅ​ក្នុង​ត្រចៀក

កាល​ពី​ខែ​មករា រដ្ឋាភិបាល​អាហ្វ្រិក​ខាង​ត្បូង​បាន​បញ្ជា​ឲ្យ​​ជាង​ចម្លាក់​ដក​រូប​ទន្សាយ​ប្រាក់​ចេញ​ពី​ក្នុង​ត្រចៀក​រូប​សំណាក Nelson Mandela ដែល​ត្រូវ​បាន​កសាង​ឡើង​ក្រោយ​ការ​ស្លាប់​អតីត​ប្រធានាធិបតី​រូប​នោះ។ រូប​ទន្សាយ​​​ធ្វើ​ពី​ប្រាក់​នោះ ត្រូវ​បាន​គេ​ចាត់​ទុក​ថា​ជា​សញ្ញា​សម្គាល់​របស់​ជាង​ធ្វើ​រូប​សំណាក​ដែល​ចង់​បញ្ជាក់​ថា​ពួក​គេ​ជា​អ្នក​កសាង​រូប​នេះ។ ក្រោយ​ការ​បញ្ជា រូប​ទន្សាយ​នោះ​ត្រូវ​បាន​ដក​ចេញ​ភ្លាមៗ។

៦. បោះ​ឆ្នោត​រើស​​ប្រធានាធិបតី​​នៅ​បុតស្វាន់ណា ជិះ​កង់​ឃោសនា​បោះឆ្នោត

មេដឹក​នាំ​ប្រទេស​បុតស្វាន់ណា លោក Ian Khama បាន​ជិះ​កង់​ដោយ​ខ្លួនឯង ដើម្បី​ឃោសនា​បោះឆ្នោត​​សកល​កាល​ពី​ខែ​តុលា​កន្លង​ទៅ។ នៅ​ពេល​ចុះជួប​អ្នក​គាំទ្រ អតីត​មេបញ្ជាការ​យោធា និង​ជា​អតីត​អ្នក​បើក​យន្តហោះ​ចម្បាំង​រូប​នេះ ក៏​បាន​ប្រើ​កង់​នោះ​ដែរ។

ដោយ៖ សុខ សុវត្ថិ

ប្រភព៖ BBC