ឪពុក-ម្ដាយ បើកបុកកូនស្លាប់ មានទោសព្រហ្មទណ្ឌ ឬអត់?

2015-01-14 12:30:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ករណីឪពុក-ម្ដាយ បើករថយន្តបុក ឫកិនកូនខ្លួនឯងបានកើតមានតាមរយៈរូបភាពវីដេអូបង្ហោះនៅលើបណ្ដាញសង្គម និង សារព័ត៌មាននាពេលចុងក្រោយនេះ។ មានការលើកឡើងផ្សេងៗថា ទោះជនរងគ្រោះជាកូនបង្កើតដែលខ្លួនស្រឡាញ់បែបណាក្ដី ក៏ត្រូវទទួលខុសត្រូវព្រហ្មទណ្ឌដែរ។ តែអ្នកខ្លះថា គ្មានឪពុក-ម្ដាយណាចង់ឲ្យកូនខ្លួនស្លាប់នោះទេ បើមិនអីចឹងមិនមែនខំបង្កើត និង ចិញ្ចឹមបីបាច់នោះទេ។ ដើម្បីស្រាយបញ្ហានេះ Sabay បានជួបលោក សែម គន្ធា នាយរងការិយាល័យចរាចរណ៍ផ្លូវគោករាជធានីភ្នំពេញ។

រូបតំណាង ករណីគ្រោះថ្នាក់ចរាចរណ៍

Sabay៖ ជម្រាបសួរ លោក សែម គន្ធា នាយរងការិយាល័យចរាចរណ៍រាជធានីភ្នំពេញ !

សែម គន្ធា ៖ បាទ ជម្រាបសួរ !

Sabay៖ មហាជនហាក់មិនច្បាស់នៅឡើយទេអំពីការទទួលខុសរបស់ឪពុកម្ដាយ ដែលបើកបរបុក ឫកិន កូនខ្លួនឯងស្លាប់។ តើលោកអាចពន្យល់ដូចម្ដេចដែរអំពីបញ្ហានេះ?

សែម គន្ធា៖ អរគុណ ខ្ញុំសូមជម្រាបថា ច្បាប់ចរាចរណ៍ផ្លូវគោក មិនបាននិយាយសំដៅលើបុគ្គលណាម្នាក់ដើម្បីដាក់ការទទួលខុសត្រូវនោះទេ គឺសំដៅគ្រប់ជនទាំងអស់ត្រូវស្ថិតក្រោមច្បាប់នេះ បើខុសឆ្គងដោយប្រការណាមួយ។

Sabay៖ អីចឹង មានន័យថា ទោះជាឪពុក-ម្ដាយជាអ្នកបង្កើតកូនខ្លួនឯង ខំចិញ្ចឹមបីបាច់ថែរក្សាកូនយ៉ាងណាក្ដី ក៏ត្រូវតែទទួលខុសត្រូវដែរមែនទេលោក?

សែម គន្ធា ៖ បាទ ជាការពិតណាស់ បើពួកគាត់ធ្វេសប្រហែសឲ្យកើតរឿងអីចឹង ត្រូវមានកាតព្វកិច្ចប្រឈមនឹងច្បាប់ចរាចរណ៍ហើយ។ ច្បាប់បើកបរតម្រូវឲ្យគ្រប់អ្នកបើកបរមុននឹងបើកបរ ត្រូវត្រួតពិនិត្យគ្រប់ជ្រុងជ្រោយ ទាំងបច្ចេកទេស និង បរិវេណជុំវិញ និង ក្រោយរថយន្តមុននឹងចេញដំណើរ។

Sabay៖ រឿងនេះត្រូវធ្វើខានមិនបានមែនទេលោក?

សែម គន្ធា៖ ត្រូវតែមើល! ដើម្បីកុំឲ្យរឿងកិនកូន ឫបុកកូនខ្លួនឯងកើតឡើង ព្រោះក្មេងៗគ្នាមិនដឹងអីទេ តែភាគច្រើនមិនសូវធ្វើទេ ពោលគឺពេលចង់ចេញ ចង់ថយរថយន្តក៏ឡើងបើកទៅប្រុយដោយមិនមើលមុខក្រោយ ចំហៀង សងខាង និង ខាងក្រោមរថយន្តអីទេ។ សុទ្ធតែខុស! ខ្ញុំដឹងថា គ្មានឪពុកម្ដាយណាចងធ្វើបែបនេះទេ ដូច្នេះហើយបានជាច្បាប់ដាក់ទណ្ឌកម្មបន្ថែមឲ្យឪពុកម្ដាយកាន់តែប្រយ័ត្ន។ ខ្ញុំសូមបញ្ជាក់ដែរថា ច្បាប់ចរាចរណ៍ក៏មិនបាននិយាយទេ ករណីឪពុកម្ដាយបុកឫកិនកូនខ្លួនឯងរបួសឫស្លាប់ ត្រូវឲ្យរួចខ្លួនដែរ គឺដូចខ្ញុំនិយាយខាងលើហើយថា ច្បាប់ចែងសំដៅបុគ្គលគ្រប់រូបឲ្យតែល្មើស។

Sabay៖សូមអរគុណចំពោះការពន្យល់! លោក ចុះការទទួលខុសត្រូវ ឫ ទណ្ឌកម្មដែលឪពុក-ម្ដាយត្រូវទទួលវិញ តើរបៀបម៉េចវិញបាទ?

សែម គន្ធា៖ និយាយរួមទៅមើលច្បាប់ចរាចរណ៍ដែលកំពុងនៅធរមាន ដាក់ទណ្ឌកម្មលើអ្នកប្រព្រឹត្តទូទៅបែបណា គឺឪពុកម្ដាយក្នុងករណីនេះ ក៏រងទណ្ឌកម្ម ដូចគ្នាដែរ។ ឥឡូវខ្ញុំលើកករណីដែលបើកបុក ឫកិនកូនស្លាប់មួយចុះ។ តាមមាត្រា ៨២ នៃច្បាប់ស្ដីពីចរាចរណ៍ឆ្នាំ ២០០៧ តុលាការអាចដាក់ទោសជនណាដែលបើកបរបណ្ដាលឲ្យមានអ្នកស្លាប់ដោយអចេតនានេះ ពី១ឆ្នាំទៅ៣ឆ្នាំ និង\ឫពិន័យជាប្រាក់ពី៤លានទៅ១០លានរៀល។ ពាក្យ និង ឫនេះ ទុកលទ្ធភាពឲ្យចៅក្រមជ្រើសរើសយកមួយណា ឫដាក់ទាំងពីរតែម្ដង ដោយផ្អែកតាមកម្រិតល្មើស និង ស្ថានភាពអ្នកល្មើស។ និយាយរួមមក ឪពុកម្ដាយ ទទួលខុសត្រូវដូចគ្នាអីចឹង។

Sabay៖ ចំពោះការអនុវត្តជាក់ស្ដែងវិញ តើនគរបាលត្រូវកសាងសំណុំរឿងបញ្ជូនទៅតុលាការឫយ៉ាងណាលោក?

សែម គន្ធា៖ និយាយដោយស្មោះត្រង់ទៅ យើងបានត្រឹមតែកសាងសំណុំរឿង ឃាត់ខ្លួនខ្លះត្រឹមដំណាក់កាលនគរបាល ប៉ុន្តែ ពុំបានបញ្ជូនទៅតុលាការទេ។ យើងអប់រំពួកគេអំពីបញ្ហានេះ និង ធ្វើកិច្ចសន្យាបញ្ចប់រឿង។ ហេតុផលដែលមិនបញ្ជូន ដោយយល់ឃើញថា ជាទំនាក់ទំនងឪពុកម្ដាយនិងកូន តែមែនទែនទៅទទួលខុសត្រូវព្រហ្មទណ្ឌ។

Sabay៖ ជាចុងក្រោយលោកមានអ្វីចង់បន្ថែមជុំវិញប្រធានបទនេះ! សែម គន្ធា៖ នាពេលបច្ចុប្បន្ននេះ នគរបាលប្រើមនោសញ្ចេតនាយោគយល់ចំពោះទំនាក់ទំនងឪពុកម្ដាយ និង កូន។ តែការយោគយល់ មានព្រំដែនកំណត់ បើបណ្ដោយការធ្វេសប្រហែលរបស់ឪពុកម្ដាយនៅតែមាន ហើយការបាត់បង់កូនខ្លួនឯង នឹងបន្ត។ សួរថា អ្នកណាអ្នកខាតបង់ គឺឪពុកម្ដាយខ្លួនដដែល។ ខ្ញុំសូមឲ្យអ្នកបើកបរទាំងអស់ មុននឹងចេញរថយន្ត គប្បីពិនិត្យគ្រប់យ៉ាងដូចខ្ញុំលើកឡើងខាងលើ ដើម្បីបញ្ចៀសបញ្ហា។ សូមអរគុណ!

Sabay៖ សូមថ្លែងអំណរគុណលោក ជម្រាបលា! សែម គន្ធា៖ បាទ សូមអរគុណ!

អត្ថបទ៖ ទូច សុវណ្ណរិទ្ធិ