West Ham vs Everton ស៊ុតប៉េណាល់ទី២០គ្រាប់ ទម្រាំដឹងចាញ់ឈ្នះ

2015-01-14 16:03:54
ចំនួនមតិ 0 | ចំនួនចែករំលែក 0

ចន្លោះមិនឃើញ

West Ham បានយកឈ្នះ Everton ដោយបាល់ប៉េណាល់ទីកាត់សេចក្ដីដ៏តានតឹង ៩-៨ (ស៊ុតម្ខាង១០គ្រាប់) ក្រោយស្មើគ្នា ២-២ ក្នុង១២០នាទី នៅក្នុងការប្រកួត FA Cup ជុំទី៣ យប់មិញនេះ (ប្រកួតឡើងវិញ ក្រោយស្មើគ្នា ១-១ ជើងទី១)។

Enner Valencia បានស៊ុតឲ្យក្រុមម្ចាស់ផ្ទះញញួរធំនាំមុខមុន នៅនាទី៥១ ក្រោយទទួលបាល់ពី Andy Carroll។ Everton ត្រូវបាត់បង់សមាជិកម្នាក់នៅនាទី៥៦ ដោយសារ Aiden McGeady ទទួលកាតលឿង២ដង ប៉ុន្តែក្រុមនេះនៅតែអាចតាមស្មើដោយការស៊ុតហ្រ្វីឃីករបស់ Kevin Mirallas នៅ៨នាទីមុនចប់ការប្រកួត។

ឈានចូលដល់ម៉ោងថែម១៥នាទី២ដង Romelu Lukaku បានជួយឲ្យក្រុមភ្ញៀវនាំមុខវិញ នៅនាទី ៩៧ ប៉ុន្តែ Carlton Cole បានធ្វើឲ្យការប្រកួតឈានដល់វគ្គប៉េណាល់ទីកាត់សេចក្ដី ក្រោយស៊ុតតាមស្មើនៅនាទី១១៣។

ដល់វគ្គរន្ធត់ប៉េណាល់ទី៥គ្រាប់ម្នាក់ ក្រុមទាំង២នៅតែស្មើគ្នាទៀត គឺស៊ុតចូល៤គ្រាប់ដូចគ្នា។ ៤គ្រាប់ដំបូង West Ham ស៊ុតចូលទាំងអស់ ខណៈ Everton ស៊ុតមិនចូល១គ្រាប់ (Steven Naismith) ប៉ុន្តែ West Ham មិនអាចយកឈ្នះបាននៅគ្រាប់ទី៥ បានទេ ដោយសារ Steward Downing ស៊ុតមិនចូល។ ឈានដល់ការស៊ុតគ្រាប់ស្លាប់រស់ ក្រុមទាំង២ស៊ុតចូលដូចគ្នារហូតដល់គ្រាប់ទី១០ ទើបអ្នកចាំទី Joel Robles របស់ Everton ស៊ុតមិនចូល ខណៈអ្នកចាំទី Adrián របស់ West Ham ជាអ្នកស៊ុតគ្រាប់ជ័យជម្នះ។

អ្នកចាំទី Adrian ក្រោយជាវីរបុរសប្រចាំការប្រកួត ក្រោយជួយសង្រ្គោះបាល់បាន និងស៊ុតចូលគ្រាប់ចុងក្រោយ

ក្រោយជ័យជម្នះដ៏ត្រដាបត្រដួសនេះ ក្រុមលោក Sam Allardyce នឹងត្រូវឡើងទៅជួបក្រុមនៅលីកលំដាប់ទី៣ (League One) Bristol City នៅជុំទី៤។

លទ្ធផលការប្រកួតឡើងវិញ៣គូផ្សេងទៀត គឺ Fulham ឈ្នះ Wolverhampton ដោយបាល់ប៉េណាល់ទី (ស្មើ ៣-៣), Bristol City ឈ្នះ Doncaster Rovers ២-០, Chesterfield ឈ្នះ Scunthorpe United ២-០ (ក្រោយម៉ោងថែម១៥នាទី២ដង)៕