កំពូលមុខ Troll កំពុងល្បីខ្លាំង តាមពិតជាអតីតវីរបុរសបាល់បោះចិន

2015-01-18 16:49:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះ ប្រព័ន្ធអ៊ីនធឺណិតកាន់តែជឿនលឿន ឯការកម្សាន្តរបស់មនុស្សកាន់តែច្រើនគ្មានដែនកំណត់។ រូបគំនូរ Troll ដែលគេនិយមប្រើដាក់គ្នា ឬបង្អាប់គ្នាលេងតាម Facebook ដើម្បីកម្សាន្តអារម្មណ៍ ក៏កំពុងរីករាលដាលខ្លាំងដែរ។ មានមុខមាត់មនុស្សប្លែកៗខុសៗគ្នាជាច្រើន ត្រូវគេប្រើដើម្បី Troll ក្នុងចំណោមនោះ មុខមនុស្សម្នាក់សើចចេញធ្មេញជ្រួញចិញ្ចើមកំពុងតែល្បីខ្លាំង។ ដឹងថាគេជានរណាទេ?

តាមពិតមុខ Troll ដែលកំពុងល្បីនេះ គឺជាមុខមាត់ពិតរបស់កីឡាករបាល់បោះចិន ឈ្មោះ Yao Ming បច្ចុប្បន្នមានវ័យ ៣៤ឆ្នាំ។ លោក Ming មានកម្ពស់រហូតដល់ទៅ ២,២៩ម៉ែត្រ ទម្ងន់ ១៤១គីឡូក្រាម ហើយអតីតជាកីឡាករបាល់បោះជម្រើសជាតិចិន និង លេងឲ្យក្លិប Houston Rockets ក្នុងក្របខ័ណ្ឌ NBA របស់សហរដ្ឋអាមេរិក។ យ៉ាងណាក្តី រូបគេបានប្រកាសចូលនិវត្តន៍ទាំងបង្ខំចិត្តតាំងពីខែកក្កដា ឆ្នាំ ២០១១ម្ល៉េះ ដោយសារបញ្ហាកជើង។ ក្នុងអាជីពនៅសហរដ្ឋអាមេរិក និងលេងឲ្យក្រុមជម្រើសជាតិ កីឡាករកម្ពស់ដាច់គេនៅចិន បានសាងស្នាដៃជាច្រើនរាប់មិនអស់ ព្រមទាំងត្រូវគេចាត់ទុកកីឡាករកំពូលម្នាក់ផង។

រំលឹកឡើងវិញ មុខ Troll របស់កីឡាករ Yao Ming នេះ មានដើមកំណើតតាំងពីខែឧសភា ឆ្នាំ២០០៩ មកម្ល៉េះ។ ពេលសម្ភាសន៍ នៅក្នុងសន្និសីទមុនការប្រកួតចាប់ផ្ដើម កីឡាករដែលសាងកេរ្តិ៍ឈ្មោះល្បីលើទឹកដីអាមេរិក បានសើចយ៉ាងខ្លាំង រហូតជ្រួញចិញ្ចើម បញ្ចេញធ្មេញសស្ញាញ មើលទៅគួរឲ្យចាប់អារម្មណ៍។ នៅខែកក្កដា ឆ្នាំ២០១០ មានគេយកវីដេអូដែលថតពេលសម្ភាសន៍នោះ មកចាក់សាឡើងវិញ និង កាត់រូបត្រង់នាទីទី១៨ (មើលក្នុងវីដេអូខាងក្រោម) មកគូជារូប Troll និងបង្ហោះចូលអ៊ីនធឺណិត។ ចាប់ពីពេលនោះមក រូប Troll តារាបាល់បោះ Yao Ming ត្រូវចែកចាយតគ្នា និងសរសេរបន្ថែមអក្សរកំប្លែងផ្សេងៗ រហូតល្បីដល់សព្វថ្ងៃ៕