មាស សុខសោភា ច្រៀង ១ថ្ងៃ ១-២ ដុល្លារ ក្លាយជាតារាចម្រៀងល្បីប្រចាំប្រទេស

2014-09-12 18:43:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ដើមចេញពីការតស៊ូឥតឈប់ឈរ របស់កញ្ញា មាស សុខសោភា គឺពីអ្នកដើរច្រៀងតាមភ្លេងការនៅស្រុកស្រែ និង ច្រៀងនៅតាមភោជនីយដ្ឋាន ដែលបានកម្រៃ ពី ១-២ ដុល្លារ ក្នុង ១ថ្ងៃនោះ ឥឡូវបានប្រែក្លាយមុខមាត់ថ្មី ទៅជាតារាចម្រៀងល្បីប្រចាំព្រះរាជាណាចក្រកម្ពុជា។

ថ្នាំទិព្វរបស់ កញ្ញា មាស សុខសោភា គឺពាក្យលួងលោមពោរពេញដោយការលើកទឹកចិត្តពីបងប្រុស បានធ្វើឲ្យកម្លាំងចិត្តរបស់នាង កាន់តែខ្លាំងក្លាឡើង ហើយពុះពារគ្រប់ឧបសគ្គហែលឆ្លងស្ទើរគ្រប់ការលំបាកនៅក្នុងជីវិតក្រោយពីនាងបាត់បង់ឪពុកជាទីស្រឡាញ់ ហើយត្រូវរ៉ាប់រងគ្រួសារទាំងមូល។

សូមចុចអាន៖ មាស សុខសោភា ទើបត្រូវ Facebook ទទួលស្គាល់ Page ផ្លូវការ ឥឡូវស្វែងយល់លក្ខខណ្ឌដើម្បីបានការទទួលស្គាល់នេះ

តើ មាស សុខសោភា ឆ្លងកាត់ការលំបាកអ្វីខ្លះនៅក្នុងជីវិត? តើមានមូលហេតុអ្វី ដែលនាំឲ្យមាសសុខសោភា ក្លាយទៅជាតារាចម្រៀងល្បីល្បាញក្នុងព្រះរាជាណាចក្រកម្ពុជារហូតដល់សព្វថ្ងៃនេះ?

ឆ្លើយតបនឹងសំណួរនេះ Sabay នឹងលម្អិតព័ត៌មានដូចខាងក្រោម៖

កញ្ញា មាស សុខសោភា ដែលមានឈ្មោះហៅក្រៅថា ស្រីអូន បានកើតនៅថ្ងៃទី ២៩ ខែ មករា ឆ្នាំ ១៩៨៤ នៅខេត្តកំពង់ស្ពឺ។ នាងមានឪពុក ឈ្មោះ មាស សារឹម អតីតប្រធានមន្ទីរឧស្សាហកម្មខេត្តកំពង់ស្ពឺ ហើយម្ដាយឈ្មោះ សុខ វិលន់ ជាអតីតបុគ្គលិកនៅក្នុងមន្ទីរឧស្សាហកម្មនោះដែរ។

កញ្ញា មាស សុខសោភា មានបងប្អូន ៣ នាក់ ហើយនាងជាកូនទី ២ នៅក្នុងគ្រួសារ។ កូនច្បងនៅក្នុងគ្រួសារ គឺ លោក មាស សុខរតនៈ ជាអ្នកនិពន្ធបទចម្រៀងផង អ្នកចាត់ការទូទៅប្រចាំផលិតកម្មថោនផង និង កូនពៅគឺ មាស សុខវណ្ណៈ ជាទាហាន។

នៅក្នុងជីវិត នៃការរស់នៅ គឺក្រុមគ្រួសាររបស់ កញ្ញា មាស សុខសោភា បានផ្លាស់ប្ដូរទីលំនៅ ពីរ កន្លែង។ ក្នុងអំឡុង ឆ្នាំ ១៩៩០ ដោយសារមានទឹកជំនន់លិចលង់ផ្ទះសំបែងគ្រួសារមួយនេះ បានប្ដូរទីលំនៅពីខេត្តកំពង់ស្ពឺ ទៅរស់នៅស្រុកកៀនស្វាយ ខេត្តកណ្ដាល។ ឆ្នាំ ២០០០ នាងជាមួយបងប្រុសបានប្ដូរពីកៀនស្វាយ មករស់នៅរាជធានីភ្នំពេញ។

កម្រិតវប្បធម៌

កុមារី មាស សុខសោភា បានចូលរៀននៅសាលាបឋមសិក្សាស្ដៅ នៅកៀនស្វាយ ខេត្តកណ្ដាល ហើយនាងបានបន្តការសិក្សារហូតដល់មធ្យមសិក្សា គឺ នៅវិទ្យាល័យព្រះបាទជ័យវរ្ម័នទី ៧ ប៉ុន្តែបានឈប់ពីការសិក្សានៅត្រឹមថ្នាក់ទី ១០ ដោយសារតែឪពុកបាន ស្លាប់ហើយបន្ទុកគ្រួសារបានធ្លាក់មកលើរូបនាង និង បងប្រុស ដែលត្រូវរ៉ាប់រងគ្រួសារទាំងមូល។

មាស សុខសោភា និង បងប្រុស ក្លាយជាបង្គោលគ្រួសារ បន្ទាប់ពីឪពុកស្លាប់ ក្រោយពី មាស សុខសោភា និង បងប្រុស បានក្លាយទៅជាបង្គោលគ្រួសារហើយនោះ អ្នកទាំងពីរបានរ៉ាប់រងជីវភាពគ្រួសារទាំងមូល ដូច្នេះ នាង និង បងប្រុស បានសម្រេចចិត្តដើរច្រៀងតាមភ្លេងការនៅតាមស្រុកស្រែ ដោយទទួលបានកម្រៃតិចតួចដើម្បីយកមកផ្គត់ផ្គង់ ជីវភាពរស់នៅ។

ចេញពីស្រុកកំណើត ទៅច្រៀងតាមភោជនីយដ្ឋានរកប្រាក់បានត្រឹមតែ ១-២ ដុល្លារ ក្នុង១ថ្ងៃដោយសារស្ថានភាពជីវភាពនៅតែយ៉ាប់យ៉ឺន គ្រួសាររបស់ កញ្ញា មាស សុខសោភា បានវេចបង្វេចចេញពីស្រុកកំណើត ដោយប្ដូរទៅរស់នៅខេត្តកណ្ដាល ហើយ សុខសោភា និង សុខរតនៈ (បងប្រុស) នៅតែបន្តអាជីពដើរច្រៀងភ្លេងការ ហើយបន្ទាប់មកបានផ្លាស់ពីការច្រៀងភ្លេងការមកច្រៀងតាមភោជនីយដ្ឋានវិញម្ដង ដែលទទួលបានកម្រៃពី ១-២ ដុល្លារ ក្នុង ១ ថ្ងៃ ដែលជាចំណូលសម្រាប់ចិញ្ចឹមជីវិតប្រចាំថ្ងៃ។

តើចំណូលពី ១-២ ដុល្លារ អាចផ្គត់ផ្គង់ជីវភាពប្រចាំថ្ងៃបានទេ?

ឆ្លើយតបនឹងសំណួរនេះ គឺពិតជាមិនអាចផ្គត់ផ្គង់ជីវភាពប្រចាំថ្ងៃបាននោះឡើយ។ កត្តានេះហើយដែលធ្វើឲ្យ កញ្ញា មាស សុខសោភា មានការបាក់ទឹកចិត្ត។ អាចនិយាយបានថា នាងសំណាង ព្រោះមានបងប្រុស លោក មាស សុខរតនៈ រង់ចាំជួយលើកទឹកចិត្តនាងជានិច្ច ដែលធ្វើឲ្យតារាចម្រៀងមានទឹកដមសំឡេងស្រទន់ និង ក្រអួនក្រអៅ អង្រួនបេះដូងអ្នកស្ដាប់ឲ្យលន្លង់លន្លោចទៅតាមបទចម្រៀងទាំង មនោសញ្ចេតនា និង ញាក់កន្ត្រាក់អារម្មណ៍រូបនេះ មានកម្លាំងចិត្តងើបឡើងតស៊ូសាជាថ្មី។

ដូច្នេះហើយ មាស សុខសោភា មានក្ដីសង្ឃឹម និង ការខិតខំប្រឹងប្រែងតស៊ូ ពុះពារគ្រប់បែបយ៉ាងនៅក្នុងជីវិត ដោយលែងខ្វាយខ្វល់ទាំងអស់រាល់ពាក្យរិះគន់ទាំងអំបាលម៉ាន ដែលសំដៅដល់ពាក្យថា ជានារីច្រៀងនៅតាមភោជនីយដ្ឋានគឺមិនល្អ។

ពាក្យរិះគន់ទាំងនេះធ្វើឲ្យនាងចាំទុកដិតដាមក្នុងអារម្មណ៍ជានិច្ច មិនអាចបំភ្លេចបាន។ ការច្រៀងនៅខេត្តកណ្ដាលមិនអាចធ្វើឲ្យជីវភាពបានប្រសើរនោះទេ គឺនាង និង បងប្រុស បានសម្រេចចិត្តចាកចេញពីស្រុកកៀនស្វាយមករាជធានី ភ្នំពេញដើម្បីស្វះស្វែងឈរជើងនៅតំបន់ទេសចរណ៍ និង ជាបេះដូងប្រទេស បណ្ដុំដោយនយោបាយ សេដ្ឋកិច្ច និង ធនធានសម្បូរបែបមួយនេះ។ ផ្ទុយស្រឡះពីក្ដីសង្ឃឹមថា នៅរាជធានីភ្នំពេញ ជាកន្លែងដែលងាយស្រួលឈរជើង តែផ្ទុយទៅវិញទីក្រុងមួយនេះ សម្បូរទៅដោយការប្រកួតប្រជែងជាខ្លាំង។

សូមចុចអាន៖ មាស សុខសោភា បដិសេធមិនលេង Ice Bucket Challenge មានមូលហេតុដ៏សំខាន់មួយ

“លុះត្រាតែ យើងស្គាល់គេទើបអាចចូលច្រៀងនៅតាមភោជនីយដ្ឋាន ឬ រង្គសាល តែខ្ញុំ និង បងប្រុសមិនបានស្គាល់អ្នកណាទាំងអស់ពេលដែលយើងមកដំបូង តែបានយូរបន្តិចទើបមានមីងគាត់បានត្រួសត្រាយផ្លូវខ្លះសម្រាប់យើង តែមិនបានប៉ុន្មានផងគាត់ក៏បានស្លាប់បាត់ទៅ"។ លោក មាស សុខរតនៈ (បងប្រុស មាស សុខសោភា) និយាយ។

ជីវិតនៅក្នុងសិល្បៈ

នៅក្នុងអំឡុងឆ្នាំ ១៩៩៧ កញ្ញា មាស សុខសោភា បានហក់ចូលសិល្បៈជាលើកដំបូង ប៉ុន្តែ នាងនៅមិនទាន់មានកេរ្តិ៍ឈ្មោះល្បីល្បាញនៅឡើយ។ បន្ទាប់ពីមានការលើកទឹកចិត្តពីបងប្រុស នៅឆ្នាំ ១៩៩៩ នាងបានសម្រេចចិត្តចូលរួមប្រលងប្រជែងក្នុងកម្មវិធីបារី Mild Seven សហការជាមួយវិទ្យុ និង ទូរទស្សន៍ប៉ុស្តិ៍លេខ ៣ ហើយកញ្ញា មាស សុខសោភា បានចំណាត់ថ្នាក់លេខ ១។

ប៉ុន្តែក្ដីសង្ឃឹមជាអ្នកចម្រៀងអាជីពត្រូវរលាយ ដោយសារខាងអ្នករៀបចំកម្មវិធី យល់ថា កញ្ញា មាស សុខសោភា មានរូបសម្រស់មិនស្អាត មិនស័ក្ដិសមជាតារាចម្រៀងក្នុងក្លឹបរបស់គាត់ តែនាងនៅតែពុះពារគ្រប់កាលៈទេសៈដើម្បីបានច្រៀងនៅក្នុងក្លឹបនោះ។

ដោយក្ដីស្រលាញ់ អាណិត និង ការតស៊ូរបស់នាង ម្ចាស់ក្លឹបបានអនុញ្ញាតឲ្យច្រៀង តែទទួលបានកម្រៃ ១០$ ក្នុងមួយយប់។ ប្រាក់កម្រៃដែលទទួលបាននេះមិនអាចយកទៅដោះស្រាយជីវភាពគ្រួសារ គ្រប់គ្រាន់នោះទេ ហើយនាងបានព្យាយាមដើម្បីច្រៀងនៅកន្លែងផ្សេងទៀតសម្រាប់ទ្រទ្រង់ ជីវភាព។

ដោយមិនអាចទ្រាំទ្រទៅនឹងប្រាក់កម្រៃ ដែលទទួលបានពីក្លឹបនោះ គឺនៅក្នុងឆ្នាំ ២០០៤ នាងបានសម្រេចចិត្តចេញពីក្លឹបទៅច្រៀងឲ្យផលិតកម្ម រស្មីស្ទឹងសង្កែ។ នៅទីនេះ មហាជនចាប់ផ្ដើមស្គាល់នាង និង ទទួលបានការគាំទ្រយ៉ាងខ្លាំងពីសំណាក់ប្រិយមិត្ត និង មិត្តយុវវ័យ តាមរយៈបទ “រស់ក្បែរ ទ្រូងបងសែនកក់ក្ដៅ” និង បទ “អូននឹកៗបង” ដែលនាងចាប់ ផ្ដើមមានមុខមាត់ចាប់តាំងពីពេលនោះមក។

នៅក្នុងឆ្នាំ ២០០៥ នាងបានចាកចេញពីផលិតកម្ម រស្មីស្ទឹងសង្កែ ទៅច្រៀងឲ្យផលិតកម្ម យូធូ ដោយសារតែទឹកដមសំនៀងរបស់នាង គឺ សោភា នៅតែទទួលបានការគាំទ្រដដែលពីទស្សនិកជន ដែលនិយមចូលចិត្ត ស្ដាប់ ហើយបទ ដែលល្បីសម្រាប់នាងនៅក្នុងផលិតកម្មនេះ គឺបទ How do I live?, កូនឥតខាន់ស្លា, ១០១ ហេតុផល, និង ស្នេហ៍ឆ្ងាយផ្កាស្លា ដែលបទចម្រៀងទាំងនេះ បានទទួលការគាំទ្រយ៉ាងច្រើនពីបណ្ដាអ្នកស្ដាប់ និង អ្នកទស្សនា ជាពិសេស គឺ បទ how do I live?។ បទនេះ ដែល ត្រូវបានទស្សនិកជនកោតសរសើរថា នាងមិនត្រឹមតែច្រៀងជាភាសាខ្មែរបានល្អនោះទេថែមទាំងច្រៀងជា ភាសាអង់គ្លេស បានល្អទៀតផង។ បើទោះបីជាមានភាពល្បីល្បាញនៅក្នុងផលិតកម្មនេះក្ដី ក៏នាងមិនបាននៅជាប់ជាមួយផលិតកម្មនោះដែរ។

នៅឆ្នាំ ២០០៨ នាងបានចេញពីផលិតកម្ម “យួធួ” ទៅច្រៀងឲ្យ ផលិតកម្ម “អឹម” វិញម្ដង។ ការផ្លាស់មកច្រៀងឲ្យផលិតកម្ម អិម ក៏មិនចាញ់នៅយួធួដែរ ព្រោះបទចម្រៀងដែលនាងបានច្រៀងនៅក្នុងនេះបានទាក់ទាញអារម្មណ៍ មិត្ត យុវវ័យ ច្រើនកុះករ តាមរយៈបទ “១០០០ រាត្រី, ត្រឹមមួយនាទី, what you don’t know?, រស់គ្មានទី បញ្ចប់" ជាដើម។

ចំពោះបទចម្រៀង ១០០០ រាត្រីនេះហើយ ដែលនាងមានភាពល្បីខ្លាំងបំផុតក្នុងចំណោម ផលិតកម្ម ដែលនាងបានច្រៀងកន្លងមក។ បើទោះបីជាមានភាពល្បីល្បាញហើយយ៉ាងណាក្ដី នាងមិនបាននៅយូរជាមួយផលិតកម្ម អឹមដែរ។

នៅឆ្នាំ ២០០៩ នាងបានចេញពីផលិតកម្ម អិមភាពយន្ត មកចូលក្នុងផលិតកម្ម សាន់ដេ វិញ។ ចំពោះការច្រៀងនៅក្នុងផលិតកម្មសាន់ដេ ក៏មិនចាញ់ផលិតកម្ម ដែលនាងធ្លាប់ច្រៀងប៉ុន្មានដែរ នាងនៅតែទទួលបានប្រជាប្រិយភាពដដែល ដោយសារតែបទចម្រៀងដែលចេញទៅបានទទួលការគាំទ្រច្រើនពីយុវវ័យ។ បទដែលល្បីសម្រាប់នាងនៅក្នុងផលិតកម្មនេះ គឺបទ មួយរយភាគរយ, ក្រដាស, come back to me, និងបទ ហេតុអ្វីមនុស្សស្រលាញ់គ្នាមិនបានជួបគ្នា ជាដើម។ ការច្រៀងនៅក្នុងផលិតកម្មនេះ បានប្រមាណមួយឆ្នាំប៉ុណ្ណោះ។

ឆ្នាំ ២០១០ នេះ កញ្ញា បានចូលច្រៀងឲ្យផលិតកម្មថោនរហូតមកដល់បច្ចុប្បន្នហើយ មានរយៈពេលប្រមាណ ៥ ខែហើយ។ សម្រាប់ផលិតកម្មថ្មីនេះ កញ្ញាមានភាពល្បីល្បាញម្ដងទៀត តាមរយៈបទ ” I am sorry” ដែលទទួលបាន ការគាំទ្រពេញទំហឹង ក្នុងការច្រៀងបទចម្រៀងដូចគ្នាជាមួយផលិតកម្មដទៃ ដោយសារតែការសម្ដែង និង ទឹកដមសំនៀងរបស់នាង។ បទចម្រៀងមួយទៀតដែលទទួលបានការគាំទ្រដែរនោះ គឺបទ “សូមពេលឈឺ ចាប់មួយគ្រា” ដែលជាបទចម្រៀងបញ្ចប់សាច់រឿងដែលនាង បានសម្ដែងជាមួយលោក ករុណាពេជ្រ។

ក្រៅពីការ ច្រៀងនៅក្នុងស្រុក នាងក៏ធ្លាប់ទៅសម្ដែងក្រៅប្រទេសមួយចំនួនដែរដូចជា ប្រទេស បារាំង ស្វីស អាល្លឺម៉ង់ នូវែលហ្សេឡង់ អូស្ត្រាលី ជប៉ុន ញ៉ូវហ្សឺឡែន សហរដ្ឋអាមេរិក និង បណ្ដាប្រទេសមួយចំនួនទៀត ហើយបច្ចុប្បន្ននាងត្រូវបានគេចាត់ទុកថា ជាកំពូលតារាចម្រៀង ល្បីល្បាញមួយរូបប្រចាំព្រះរាជាណាចក្រកម្ពុជា។

បន្ទាប់ពីការជម្នះនូវរាល់ការលំបាក ប្រកបដោយការខិតខំប្រឹងប្រែងឥតឈប់ឈររបស់ កញ្ញា មាស សុខសោភាហើយនោះ នាងបានច្បាមយកកេរ្តិ៍ឈ្មោះជាតារាចម្រៀងស្រីប្រចាំព្រះរាជាណាចក្រកម្ពុជា គឺ នាងដណ្ដើមបានពានរង្វាន់ពីរ ពីកម្មវិធីអាណាចក្រតារា ២០១២-២០១៣៕

អត្ថបទ៖ អ៊ីង សុឡា