ជប៉ុនគ្រោងនឹងបើកសណ្ឋាគារបម្រើការដោយមនុស្សយន្តដំបូងបំផុតក្នុងលោក

2015-02-08 14:50:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ជប៉ុនគ្រោងនឹងបើកដំណើរការសណ្ឋាគារដំបូងគេបំផុតដែលមានបុគ្គលិកបម្រើការសុទ្ធសឹងតែមនុស្សយន្ត និងគ្រប់គ្រងដោយបច្ចេកវិទ្យាកុំព្យូទ័រទំនើបចុងក្រោយគេបំផុត។ នេះបើយោងតាម អង្គភាពទេសចរណ៍ជាតិរបស់ជប៉ុន (JNTO)។

សណ្ឋាគារដំបូងគេមួយនោះមានឈ្មោះថាThe Henn-na Hotel ឬ “Strange Hotel” ដែលនឹងចាប់ផ្ដើមបើកដំណើរការនៅក្នុងថ្ងៃទី១៧ ខែកក្កដាខាងមុខនេះនៅក្នុងឧទ្យានកម្សាន្តក្នុងទីក្រុងណាហ្គាសាគី ប្រទេសជប៉ុន។ នេះបើតាមសេចក្ដីប្រកាសពី JNTO កាលពីថ្ងៃទី២៨ ខែមករា។

សណ្ឋាគារនោះដែរនឹងមានបុគ្គលិកមនុស្សយន្តចំនួន១០នាក់ អាចធ្វើការបម្រើភ្ញៀវ ដើម្បីផ្ដល់សេវាកម្មទូទៅចាប់ពីកន្លែងតុទទួលភ្ញៀវ ជញ្ជូនឥវ៉ាន់ និងសម្អាតបន្ទប់ ហើយ រាល់ការគ្រប់គ្រងទាំងអស់នៅក្នុងសណ្ឋាគារ គឺដំណើរការដោយគ្រឿងម៉ាស៊ីនទាំងអស់។

ប្រធានឧទ្យានកម្សាន្ត Huis Ten Bosch ក្នុងទីក្រុងណាហ្គាសាគី ប្រទេសជប៉ុន លោក Hideo Sawada បានអោយដឹងថា “នៅពេលអនាគត យើងចង់អោយមាន៩០ភាគរយនៃសេវាបម្រើនៅក្នុងសណ្ឋាគារគឺប្រតិបត្តិដោយមនុស្សយន្ត”។

លោក Sawada បាននិយាយថា រាល់សម្ភារៈប្រើប្រាស់ក្នុងបន្ទប់៧២ នឹងប្រើដោយឧបករណ៍បច្ចេកវិទ្យាទំនើបបំផុត ហើយ Henn-na គឺជា "សណ្ឋាគារទំនើបបំផុតនៅក្នុងពិភពលោក"។ នេះបើតាមសេចក្ដីរាយការណ៍របស់គេហទំព័រ The Japan Times។

យោងតាមគេហទំព័ររបស់សណ្ឋាគារបានអោយដឹងថា រាល់ក្នុងបន្ទប់នឹងជំនួសនូវការប្រើម៉ាស៊ីនត្រជាក់ប្រភេទធម្មតាទៅជាបន្ទះចាំង ដែលអាចសម្របសីតុណ្ហភាពដោយស្វ័យប្រវត្តិទៅតាមសីតុណ្ហភាពក្នុងរាងកាយមនុស្ស និងសីតុណ្ហភាពក្នុងបន្ទប់។ បន្ថែមទៅទៀតនោះ ភ្ញៀវក្នុងសណ្ឋាគារនឹងអាចប្រើបច្ចេកវិទ្យាសម្គាល់មុខ (facial recognition technology) ដើម្បីបើកទ្វារជំនួសការប្រើសោ ហើយភ្ញៀវទាំងនោះក៏អាចប្រើសោបានបើសិនជាពួកគេមិនពេញចិត្តនឹងបច្ចេកវិទ្យានោះ។

ចំពោះតម្លៃនៅក្នុងសណ្ឋាគារ Henn-na Hotel វិញ បន្ទប់គ្រែមួយនិងបន្ទប់គ្រែពីរគឺមានតម្លៃប្រហែលជា៦០ និង៧៥ដុល្លារក្នុងមួយយប់។

លោក Sawada បានប្រាប់ទៅកាន់គេហទំព័រ Nikkei news របស់ជប៉ុន ថាលោកគ្រោងនឹងបើកសណ្ឋាគារស្រដៀងគ្នានេះប្រមាណជា ១ពាន់សណ្ឋាគារនៅជុំវិញពិភពលោក។

អាន៖ បច្ចេកវិទ្យាទូរទស្សន៍ផ្សាយផ្ទាល់អូឡាំពិកឆ្នាំ២០២០ សាហាវមិនធ្លាប់មាន

ប្រែសម្រួល៖ សំនៀង ប្រភព៖ aljazeera