ក្រុម​បិសាច​ក្រហម Manchester United រក​បាន​ត្រឹម​មួយ​ពិន្ទុ​ប៉ុណ្ណោះ​ក្នុង​សប្ដាហ៍​ទី​២៤ នៃ​ Premier League នៅកីឡដ្ឋាន Upton Park យប់​មិញ​នេះ ក្រោយ​តាម​ស្មើ​ក្រុម​ញញួរ​ធំ West Ham ១-១ ទាំង​ត្រដាបត្រដួស​នៅ​ចុង​ម៉ោង ពោល​គឺ​នាទី ៩០+៣។

ខ្សែ​បម្រើ​សញ្ជាតិ​សេណេហ្គាល់ Cheikhou Kouyate បាន​ជួយ​ឲ្យ​ក្រុម​ម្ចាស់​ផ្ទះ West Ham នាំ​មុខ​មុន នៅ​៤នាទី​ដើម​តង់​ទី​២ ក្រោយ​ទទួល​បាល់​ពី​ការ​ស៊ុត​ហ្រ្វីឃីក​ដោយ Mark Noble។ ក្រុម​របស់​លោក Sam Allardyce ស្ទើរ​តែ​អាច​រក​បាន​៣ពិន្ទុ​ពេញ​ទៅ​ហើយ ប៉ុន្តែ​ត្រូវ​របូត​ទៅ​វិញ ក្រោយ​កីឡាករ​ហុល្លង់ Daley Blind ស៊ុត​បំប៉ោង​សំណាញ់​ទី​ក្នុង​ម៉ោង​បន្ថែម​មាន​របួស ក្រោយ​ទទួល​បាល់​ពី Angel di Maria។

ក្រោយ​តាម​ស្មើ ក្រុម​ភ្ញៀវ​បាន​បាត់​បង់​សមាជិក​ម្នាក់ ដោយ​សារ​ខ្សែ​ការពារ Luke Shaw ទទួល​កាត​លឿង​២ដង ស្មើ​នឹង​កាត​ក្រហម​បណ្ដេញ​ចេញ។

ការ​បាន​ត្រឹម​១ពិន្ទុ​នេះ ធ្វើ​​ឲ្យ​បិសាច​ក្រហម​ត្រូវ​ធ្លាក់​មក​ឈរ​នៅ​ចំណាត់ថ្នាក់​លេខ​៤ ក្រោម​ក្រុម Southampton ១ពិន្ទុ និង​ចាញ់​ក្រុម​កំពូល​តារាង Chelsea  ដល់​ទៅ​១២ពិន្ទុ។ លទ្ធផល​ស្មើ​នេះ ក៏​មាន​ន័យ​ថា West Ham ដែល​កំពុង​ឈរ​លេខ​៨​ក្នុង​តារាង នៅ​តែ​មិន​អាច​យក​ឈ្នះ Man Utd បាន​ដដែល គិត​ចាប់​តាំង​ពី​ឆ្នាំ​២០០៧ មក៕

http://youtu.be/kZnDi6zj3xg

  ដោយ៖ សុខ សុវត្ថិ រូបភាព៖ dailymail