បាត់ខ្លួនជើងហោះហើរ MH370 នៅតែស្ថិតក្នុងភាពអាថ៌កំបាំង

2015-02-10 22:32:10
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះបីមានការប្រកាសជាផ្លូវការពីមន្ត្រីរដ្ឋាភិបាលម៉ាឡេស៊ី បញ្ជាក់ថាជើងហោះហើរ MH370 បានជួបគ្រោះថ្នាក់ សម្លាប់ជីវិតមនុស្សអស់ទៅហើយក្ដី ក៏មតិជាច្រើននៅតែមានការសង្ស័យមិនអស់មន្ទិលក្នុងចិត្ត។ គិតមកដល់ត្រឹមពេលនេះ ប្រតិបត្តិការរុករកដែលធំជាងគេ និងចំណាយទឹកប្រាក់អស់ច្រើនបំផុតក្នុងប្រវត្តិសាស្ត្រ មិនទាន់ទទួលបានដានអ្វីជាដុំកំភួននៅឡើយទេ។ មន្ត្រីម៉ាឡេស៊ីកំពុងរៀបចំសំណងដល់គ្រួសារជនរងគ្រោះ ខណៈការងារតាមប្រមាញ់យន្តហោះដែលបាត់ដំណឹងសូន្យឈឹងតាំងពីថ្ងៃ០៨ ខែមីនា ឆ្នាំ២០១៤ កន្លងទៅ នៅតែបន្តធ្វើឥតស្រាកស្រាន្ត។

ការបាត់ខ្លួនយ៉ាងអាថ៌កំបាំងបំផុត នៃយន្តហោះរបស់ក្រុមហ៊ុនអាកាសចរណ៍ម៉ាឡេស៊ីមួយនេះ បាននាំឲ្យមានការសន្និដ្ឋានផ្សេងៗគ្នា ទាំងអ្នកជំនាញ ទាំងអតីតប្រធានក្រុមហ៊ុនអាកាសចរណ៍ ព្រមទាំងអ្នកវិភាគមួយចំនួន។ ការលើកឡើងខុសៗគ្នា បានបង្ហាញថា យន្តហោះអាចត្រូវបាញ់ទម្លាក់នៅមហាសមុទ្រឥណ្ឌា ឯមួយចំនួនដាក់ការសង្ស័យថាត្រូវគេប្លន់ ខណៈសាធារណៈមតិផ្សេងៗទៀត គិតថាយន្តហោះជួបអាកាសធាតុមិនល្អធ្លាក់ចូលទៅបាតសមុទ្រ គ្រាន់តែរកមិនទាន់ឃើញប៉ុណ្ណោះ។ ១. យន្តហោះអាចត្រូវគេប្លន់

ជារឿងពិបាកស្មានដល់ ប្រសិនបើយន្តហោះត្រូវគេប្លន់មែននោះ ព្រោះមកដល់ពេលនេះទៅហើយនៅមិនទាន់មានលេចឮដំណឹងទៀត។ តើយន្តហោះដ៏ធំនោះ គេយកទៅលាក់ទុកនៅឯណា? ចុះមនុស្សទាំង ២៣៩នាក់ រស់នៅយ៉ាងដូចម្ដេច? ទោះជាពិបាកប៉ាន់ស្មានដល់ក៏ពិតមែន ក៏មានមតិមួយចំនួនដាក់ការសង្ស័យថា យន្តហោះរបស់ក្រុមហ៊ុនអាកាសចរណ៍ម៉ាឡេស៊ី ត្រូវគេប្លន់រួចបង្វែរការហោះហើរទៅគោលដៅផ្សេងខុសផ្លូវរត់។

បើតាមការចុះផ្សាយរបស់កាសែត Moskovsky Komsomolets នៃប្រទេសរុស្ស៊ី បានបង្ហាញតម្រុយថា យន្តហោះដឹកអ្នកដំណើរ Boeing 777 ត្រូវគេប្លន់ រួចបញ្ជាទៅលាក់ទុកនៅភូមិតូចមួយ ក្នុងប្រទេសអាហ្វហ្គានីស្ថាន។ ប្រភពដដែលបានបញ្ជាក់ទៀតថា អាកាសយានិកមិនមែនជាអ្នកនៅពីក្រោយគ្រោះថ្នាក់នេះទេ គឺយន្តហោះត្រូវប្លន់ដោយក្រុមភេរវជនមិនស្គាល់អត្តសញ្ញាណ។

ជើងហោះហើររបស់ម៉ាឡេស៊ី ព្រមទាំងមនុស្ស ២៣៩នាក់ អាចស្ថិតនៅក្នុងប្រទេសអាហ្វហ្គានីស្ថាន មិនឆ្ងាយប៉ុន្មានពីខេត្តកាន់ដាហា ជិតព្រំដែនប្រទេសប៉ាគីស្ថាន។ លើសពីនេះ គេថែមទាំងបង្ហើបទៀតថា មនុស្សទាំងអស់នៅលើយន្តហោះ ត្រូវគេបែងចែកជាក្រុម រស់នៅតំបន់ដាច់ស្រយាលស្ទើរតែគ្មានអាហារទទួលទាន។ ទោះយ៉ាងនេះក្ដី កន្លងទៅអស់ជាងមួយឆ្នាំហើយ ប្រសិនបើយន្តហោះត្រូវគេប្លន់ ហើយមនុស្សទាំងអស់នៅរស់មែននោះ គួរណាស់តែមានបែកធ្លាយដំណឹងខ្លះ។

២. យន្តហោះអាចត្រូវគេបាញ់ទម្លាក់

អតីតប្រធានក្រុមហ៊ុនអាកាសចរណ៍ និងជាអ្នកនិពន្ធ លោក Marc Dugain បានអះអាងថា សហរដ្ឋអាមេរិក គឺជាអ្នកបាញ់ទម្លាក់ជើងហោះហើរ MH370 ព្រោះកងទ័ពរបស់មហាអំណាចសេរីមួយនេះ ខ្លាចមានឧបទ្ទវហេតុកើតឡើងដូចថ្ងៃទី១១ ខែកញ្ញា ឆ្នាំ២០០១។

លោក Marc Dugain

លោក Dugain បានបញ្ជាក់ថា កងទ័ពអាមេរិកខ្លាចយន្តហោះរបស់ក្រុមហ៊ុនអាកាសចរណ៍ម៉ាឡេស៊ីនេះ ត្រូវវាយប្រហារដោយពួកភេរវកម្ម រួចបញ្ជាទៅកម្ទេចគោលដៅណាមួយនៅក្នុងសហរដ្ឋអាមេរិក ដូចព្រឹត្តិការណ៍ជាង ១៣ឆ្នាំមុនទៀត ទើបគេបាញ់ទម្លាក់ដើម្បីការពារខ្លួនទុកជាមុន។

អតីតប្រធានក្រុមហ៊ុនអាកាសចរណ៍ Proteus Airlines (បច្ចុប្បន្នលែងដំណើរការ) បាននិយាយថា យន្តហោះនោះត្រូវបាញ់ទម្លាក់ជិតមូលដ្ឋានទ័ពអាមេរិក ដែលមានទីតាំងនៅលើកោះដាច់ស្រយាល Diego Garcia ក្នុងមហាសមុទ្រឥណ្ឌា។

លោកបានប្រាប់ទស្សនាវដ្ដី Paris Match របស់បារាំងថា អ្នករស់នៅលើកោះម៉ាល់ឌីវ ប្រាប់លោកពីរឿងឃើញយន្តហោះដែលបាត់ខ្លួននោះ បើកក្នុងរយៈកម្ពស់ទាបៗ។ លោកបញ្ជាក់បន្ថែមទៀតថា អ្នកនេសាទនៅលើកោះតូចមួយ ក៏បានឃើញយន្តហោះដ៏ធំ ពណ៌ដែលរៀបរាប់គឺដូចគ្នានឹងពណ៌យន្តហោះម៉ាឡេស៊ី កាលពីថ្ងៃទី០៨ ខែមិនានោះដែរ។

៣. យន្តហោះជួបអាកាសធាតុអាក្រក់ធ្លាក់ចូលទៅបាតសមុទ្រ

ជាទូទៅយន្តហោះភាគច្រើនដែលជួបគ្រោះថ្នាក់ គឺបណ្ដាលមកពីអាកាសធាតុ ចំណែកឯបញ្ហាបច្ចេកទេសមានភាគរយតិចជាង។ មិនមែនជារឿងចម្លែកអ្វីឡើយ ប្រសិនបើយន្តហោះជួបគ្រោះថ្នាក់ រួចធ្លាក់ទៅបាតសមុទ្រមែននោះ ប៉ុន្តែនេះមិនមែនជារឿងធម្មតាដូចការគិតឡើយ។

យន្តហោះនេះ បានបាត់ខ្លួនទៅអស់ជាងមួយឆ្នាំហើយ ឯប្រតិបត្តិការរុករកនៅតែបន្តធ្វើដោយគ្មានដានអ្វីបន្តិចសោះ។ ការស្រាវជ្រាវដ៏ធំបំផុតក្នុងប្រវត្តិសាស្ត្រ ដោយមានការចូលរួមពីប្រទេសធំៗ រួមមានទាំងអាមេរិក អូស្ត្រាលី និងចំណាយប្រាក់អស់រាប់លានដុល្លារ នៅតែពុំអាចប្រមាញ់បានព័ត៌មានសូម្បីបន្តិច។

បើតាមការចុះផ្សាយរបស់គេហទំព័រ Dailymail កាលពីពេលថ្មីៗនេះ បានឲ្យដឹងថា ការរុករកនៅបាតសមុទ្របានប្រព្រឹត្តទៅក្នុងផ្ទៃ ៩០០០គីឡូម៉ែត្រក្រឡាហើយ ចំណែកនៅលើផ្ទៃមហាសមុទ្រវិញទាំងកប៉ាល់ នាវា យន្តហោះបានស្រាវជ្រាវអស់ប្រហែល ២ម៉ឺនគីឡូម៉ែត្រក្រឡា។ យ៉ាងណាក្ដី កិច្ចខិតខំប្រឹងប្រែងពីបណ្ដាប្រទេសជាច្រើននេះ នៅតែគ្មានលទ្ធផលជាផ្លែផ្កាអ្វីឡើយ។

៤. អ្នកបើកបរយន្តហោះ ឬជំនួយការអាចជាអ្នកនៅពីក្រោយគ្រោះថ្នាក់

ក្រៅពីហេតុផល ៣ខាងលើ នៅមានការសន្និដ្ឋានមួយទៀតថា អ្នកបើកបរយន្តហោះ ឬជំនួយការ អាចជាអ្នកនៅពីក្រោយអាថ៌កំបាំងបាត់ខ្លួនជើងហោះហើរ MH370។ បើតាមការចុះផ្សាយនៅក្នុងគេហទំព័រសារព័ត៌មាន Mirror ក្រោយយន្តហោះរបស់ក្រុមហ៊ុនអាកាសចរណ៍ម៉ាឡេស៊ីបាត់ខ្លួន បានឲ្យដឹងថា HM370 បានផ្លាស់ប្ដូរទិសដៅហោះហើរយ៉ាងតិច ២ដង ពីផ្លូវដែលខ្លួនត្រូវហោះហើរ។

រ៉ាដារបស់កងការពារអាកាសម៉ាឡេស៊ី បានបង្ហាញយន្តហោះមួយ ដែលគេជឿថាជាជើងហោះហើរ MH370 ហោះបត់ក្បាលត្រលប់ក្រោយ។ បន្ទាប់មកវាបានហោះក្នុងទិសដៅឆ្ពោះមកភាគខាងលិច លើឧបទ្វីបម៉ាឡេស៊ី មុនងាកក្បាលទៅភាគពាយព្យបន្ត។ ការប្ដូរទិសដៅហោះហើរនេះ គឺជាសកម្មភាពធ្វើឡើងដោយចេតនា របស់នរណាម្នាក់នៅលើយន្តហោះ។ លើសពីនេះ ទំនាក់ទំនងទាំងអស់ជាមួយយន្តហោះ ត្រូវបានកាត់ផ្ដាច់ទាំងស្រុង មុនពេលយន្តហោះជួបគ្រោះថ្នាក់។ ដូចនេះ អាកាសយានិក Zaharie Ahmed Shah និងជំនួយការ Fariq Hamid ក៏មិនអាចស្ថិតនៅក្រៅការសង្ស័យដែរ។

ជំនួយការ និងអាកាសយានិកជើងហោះហើរ MH370

ម្យ៉ាងវិញទៀត នៅក្នុងសារសន្ទនាចុងក្រោយរយៈពេល ៥៤នាទី អ្នកវិភាគបានចាប់អារម្មណ៍ទៅលើពាក្យពីរឃ្លា ដែលមើលទៅខុសប្លែកពីធម្មតា។ សារដែលផ្ញើចេញពីបន្ទប់បញ្ជាការហោះហើរនៅវេលាម៉ោង ១:០៧ រំលងអាធ្រាត្រ បញ្ជាក់ថា យន្តហោះកំពុងស្ថិតនៅកម្ពស់ ៣៥០០០ហ្វីត(១០៦៦៨ម៉ែត្រ)។ នេះគឺជាសារដដែល និងបានផ្ញើម្ដងរួចមកហើយកាលពី ៦នាទីមុន ហើយក៏មិនចាំបាច់ត្រូវផ្ញើម្ដងទៀតដែរ។

ក្រៅពីហេតុផលដែលអាចទៅរួចទាំងអស់ខាងលើ នៅមានការបញ្ចេញមតិដែលពិបាកទទួលយកបានមួយចំនួនទៀត។ អ្នកខ្លះនិយាយថា យន្តហោះនេះអាចត្រូវខ្យល់ព្យុះកួចទៅលើអាកាស មិនធ្លាក់មកវិញ ឬត្រូវមនុស្សភពផ្សេងប្លន់យកទៅបាត់ជាដើម។ ទោះបែបនេះក្ដី រឿងរ៉ាវទាំងអស់នេះសុទ្ធតែមាននៅក្នុងការប្រឌិត និងពិបាកធ្វើឲ្យជឿណាស់។