Brooklyn Beckham កូន​ប្រុស​ច្បង​របស់​អតីត​​កំពូល​កីឡាករ​បាល់​ទាត់ David Beckham ​ដែល​មាន​វ័យ​ត្រឹម​តែ​១៥​ឆ្នាំ​នោះ​ កាន់​តែ​អភិវឌ្ឍន៍​ខ្លួន​បាន​មួយ​កម្រិត​ទៀត​ក្នុង​អាជីព​ជា​កីឡាករ​បាល់ទាត់​របស់​គេ បន្ទាប់​ពី​ត្រូវ​បាន​​​ឈុត U-១៨ Arsenal កោះ​ហៅ ដោយ​សារ​​មាន​ទម្រង់​លេង​​ល្អ។

​កាល​ពី​សប្ដាហ៍​មុន Brooklyn បាន​បង្ហោះ​វីដេអូ​ឃ្លិប​មួយ​នៅ​លើ​ Instagram ​របស់​គេ ដើម្បី​បង្ហាញ​ថា​រូប​គេ​​មាន​សមត្ថភាព​ មិន​ចាញ់​ឪពុក​របស់​គេ​ប៉ុន្មាន​នោះ​ទេ។ ក្នុង​វីដេអូ​នោះ Brooklyn ​បាន​បង្ហាញ​ពី​ជំនាញ​ស៊ុត​ដ៏​អស្ចារ្យ បន្ទាប់​ពី​ទទួល​បាល់​ពី​មិត្ត​រួម​ក្រុម​របស់​គេ​ ពី​ខាង​ស្លាប​ឆ្វេង ហើយ​កីឡាករ​វ័យ​ក្មេង​រូប​នេះ ក៏​ស៊ុត​កាប់​ជើង​ស្ដាំ​បាន​យ៉ាង​ល្អ ប៉ុន្តែ​ត្រូវ​អ្នកចាំទី​លោត​ទះ​ចេញ ​បាល់​បុក​របារ​ទី​ខាង​លើ​ទៅ​វិញ។

ដោយ​សារ​តែ​ Brooklyn បង្ហាញ​ទម្រង់​លេង​​បាន​យ៉ាង​ល្អ ក្នុង​ឈុត U-១៦ ដូច្នេះ​ក្រុម​U-១៨ ក៏​មើល​ឃើញ​ និង​បាន​កោះ​ហៅ​ឲ្យ​ជាប់​ក្នុង​ឈុត​​នេះ ខណៈ​ដែល​រូប​គេ​ជាប់​ជា​កីឡាករ​បម្រុង​ អំឡុង​ពេល​ប្រកួត U-១៨ Arsenal ឈ្នះ U-១៨ Leicester ១-០។

ក្នុង​ការ​ប្រកួត​នោះ Brooklyn បាន​ដូរ​ចូល​លេង​​នៅ​ចុង​ម៉ោង ខណៈ​ដែល​ឪពុក​របស់​គេ David Beckham ក៏​បាន​មក​មើល​ ជួយ​លើក​ទឹក​ចិត្ត​ផង​ដែរ៕   ​​​​​ http://youtu.be/0WyJOcp05kI

​ប្រែ​សម្រួល៖ វិន ជីវ័ន្ត ប្រភព៖ Daily Mail