ហាត់តេក្វាន់ដូ តែ ៤ ឆ្នាំសោះ សៀវម៉ី ដណ្ដើមបានមេដាយមាសទ្វីបអាស៊ី

2014-10-06 16:19:46
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរនារីកម្ពុជាកញ្ញា ស៊ន សៀវម៉ី ត្រូវបានរាជរដ្ឋាភិបាលកម្ពុជាបំពាក់គ្រឿងឥស្សរិយយសជាតិថ្នាក់មហាសិរីវឌ្ឍន៍ បន្ទាប់ពីកញ្ញាបានសាងស្នាដៃជូនជាតិគឺការឈ្នះមេដាយមាសពីព្រឹត្តិការណ៍កីឡាទ្វីបអាស៊ីលើកទី១៧ នៅទីក្រុងអ៊ីនឆន ប្រទេសកូរ៉េខាងត្បូងកាលពីថ្ងៃទី៣ ខែតុលា ឆ្នាំ២០១៤។ កីឡាការិនីរូបនេះទើបតែហ្វឹកហាត់កីឡាតេក្វាន់ដូ បាន ៤ ឆ្នាំប៉ុណ្ណោះ ប៉ុន្តែរូបនាងអាចមានសមត្ថភាពប្រកួតប្រជែងលើឆាកអន្តរជាតិជាច្រើន និងបានលើកកម្ពស់កិត្យានុភាពជាតិទាំងមូល។

តើអ្នកបានដឹងអ្វីខ្លះពីកីឡាការិនី រូបនេះ?

សៀវម៉ី ទទួលគ្រឿងឥស្សរយយសថ្នាក់មហាសិរិវឌ្ឍន៍ ពីនាយករដ្ឋមន្រ្តី

ជីវប្រវត្តិ

កីឡាការិនី ស៊ន សៀវម៉ី កើតនៅថ្ងៃទី ១៤ កញ្ញា ១៩៩៥ ក្នុងរាជធានីភ្នំពេញ ដែលមានម្ដាយឈ្មោះ សួន ចាន់ធី អាយុ៥៩ឆ្នាំ និង ឪពុកឈ្មោះស៊ន ម៉េហ៊ាង (ស្លាប់)។ នាងមានបងប្អូនបង្កើតចំនួន៦នាក់ ស្រី៣នាក់ ប្រុស៣នាក់ ហើយនាងគឺជាកូនស្រីពៅក្នុងគ្រួសារ។ សៀវម៉ី មានបងប្អូន ២ រូបល្បីឈ្មោះក្នុងពិភពកីឡាតេក្វាន់ដូ រួមមាន ស៊ន ដាវីន និង ស៊ន អេលីត។

ប្រវត្តិនៃការសិក្សា

សៀវម៉ី ធ្លាប់បានឆ្លងកាត់ការសិក្សានៅសាលាបឋមសិក្សាឫស្សីកែវ នៅឆ្នាំ ២០០០ រហូតដល់ឆ្នាំ ២០០៧។ បន្ទាប់មកចូលសិក្សា នៅវិទ្យាល័យឫស្សីកែវ និង ជាបេក្ខជនប្រឡងមធ្យមសិក្សាទុតិយភូមិនៅឆ្នាំសិក្សា ២០១៣ – ២០១៤ នេះ ប៉ុន្ដែបានធ្លាក់ក្នុងការប្រឡងលើកទី១។

សៀវម៉ី ទទួលសម្ភារៈឧបត្ថម្ភពីនាយករដ្ឋមន្រ្តី

ដើមចមជាអ្នកកីឡា

ដោយសារមានបងប្រុស ស៊ន អេលីត ជាកីឡាករតេក្វាន់ដូ ទើបជាស្ពានឱ្យ សៀវម៉ី បានចូលប្រឡូកក្នុងវិស័យកីឡា។ ដំបូងឡើយ ស៊ន ដាវីន ដែលជាបងស្រីមានឈ្មោះសិក្សានៅវិទ្យាល័យបាក់ទូក។ ដោយឃើញប្អូនស្រីត្រូវជិះកង់ឆ្ងាយពី បាក់ទូក ទៅដល់ ឫស្សីកែវ ទើប អេលីត ដែលជាបងប្រុសបានសុំគ្រូឱ្យប្អូនបានចូលហាត់តេក្វាន់ដូ ជាមួយខ្លួន ដើម្បីមានកន្លែងស្នាក់នៅក្នុងស្ដាត ជិតសាលាផង បានហាត់កីឡាផង។

ម្ដាយសៀវម៉ី ទំនេរពីធ្វើការរោងចក្រ តែងតែជិះកង់ឌុបកូនស្រី សៀវម៉ី មកលេងបងៗ នៅស្ដាត។ គ្រាមួយពេលមកលេងដូចរាល់ដងក៏ជួបលោកគ្រូបង្វឹកជនជាតិកូរ៉េខាងត្បូង ឆយ យ៉ុងសុក។ ដោយឃើញពីកាយសម្បទារឹងមាំ លោកគ្រូបង្វឹករូបនេះក៏សុំម្ដាយឱ្យកូនស្រីចូលហាត់ជាមួយបងៗ។ ម្ដាយសៀវម៉ី ក៏សម្រេចឱ្យកូនចូលហ្វឹកហាត់ជាមួយបងៗដែរ នៅក្នុងឆ្នាំ ២០១០។

ដំបូងឡើយ សៀវម៉ី ប្រកែកខ្លាចហាត់កីឡាទៅអាចប៉ះពាក់ដល់រាងកាយ ដូចជាឡើងសាច់ដុំ ប៉ុន្ដែបានចូលហ្វឹកហាត់មួយរយៈក៏លែងរអ៊ូទៅ។

ស៊ន សៀវម៉ី (ស្ដាំ) ឈ្នះមេដាយស៊ីហ្គេមឆ្នាំ ២០១៣

ស្នាដៃក្នុងកីឡាតេក្វាន់ដូ

ទើបតែហ្វឹកហាត់កីឡាតេក្វាន់ដូ បាន ៤ ឆ្នាំប៉ុណ្ណោះ ប៉ុន្ដែ សៀវម៉ី ដណ្ដើមបានមេដាយ ៦ គ្រឿង ទៅហើយលើឆាកអន្តរជាតិសំខាន់ៗ ដោយក្នុងនោះមានមេដាយមាស ២ គ្រឿង ប្រាក់ ១ និង សំរឹទ្ធី ៣ គ្រឿង។

ឆ្នាំដំបូងចូលរួមប្រកួតជាលក្ខណៈអន្តរជាតិ សៀវម៉ី ដណ្ដើមបានមេដាយ ប្រាក់ ក្នុងព្រឹត្តិការណ៍កីឡាតេក្វាន់ដូកម្រិតអាស៊ាន ហើយនៅឆ្នាំដដែលដណ្ដើមបានមេដាយសំរឹទ្ធ ពីកីឡាស៊ីហ្គេម ឆ្នាំ ២០១១ នៅឥណ្ឌូណេស៊ី។

ចូលដល់ឆ្នាំ ២០១២ សៀវម៉ី ដណ្ដើមបានមេដាយសំរឹទ្ធក្នុងពានរង្វាន់កីឡាតេក្វាន់ដូជើងឯកអាស៊ី ដែលរៀបចំនៅប្រទេសវៀតណាម និង មេដាយសំរឹទ្ធមួយគ្រឿងទៀតក្នុងពានរង្វាន់ University Games ដែលរៀបចំនៅប្រទេសឡាវ។

ចំណែកមេដាយមាសលើកដំបូង ដណ្ដើមបានក្នុងឆ្នាំ ២០១៣ នៅព្រឹត្តិការណ៍កីឡាកម្រិតអាស៊ីអាគ្នេយ៍ ស៊ីហ្គេម ដែលរៀបចំនៅប្រទេសមីយ៉ាន់ម៉ា។ កាលនោះបានប្រកួតឈ្នះកីឡាការិនី Selviana Angelia Jehabut របស់ឥណ្ឌូណេស៊ី នៅវគ្គផ្ដាច់ព្រ័ត្រ លើប្រភេទទម្ងន់ ៦៧ – ៧៣ គីឡូក្រាម។

មេដាយមាសទី២ ដណ្ដើមបាននៅក្នុងព្រឹត្តិការណ៍កីឡាកម្រិតទ្វីបអាស៊ី Asian Games 2014 ដែលរៀបចំនៅប្រទេសកូរ៉េខាងត្បូង ក្រោយយកឈ្នះកីឡាការិនីជនជាតិ អ៊ីរ៉ង់ Fatemeh Rouhani ដោយពិន្ទុ ៧ ទល់ ៤ នៅវគ្គផ្ដាច់ព្រ័ត្រ។

កត្តាដែលជួយឱ្យដណ្ដើមបានមេដាយមាស នៅកីឡាអាស៊ី

ឈ្នះមេដាយមាសនៅកីឡាស៊ីហ្គេម កាលពីឆ្នាំ ២០១៣ ជាទុនផ្ដល់កម្លាំងចិត្តមួយជួយឱ្យសៀវម៉ី ឈានជើងឡើងទីលានប្រកួតនៅ Asian Games។ អ្វីដែលជារឿងសំខាន់មួយនេះគឺគ្រួសាររបស់នាង និង ជនរួមជាតិទាំងអស់។

មុនពេលសៀវម៉ី ចូលប្រកួតម្ដាយរបស់នាងបានទូរសព្ទ ពីស្រុកខ្មែរទៅដើម្បីលើកទឹកចិត្តកូន។ «កូនត្រូវខំប្រឹងប្រកួត កុំចុះចាញ់ គេមានដៃ មានជើងដូចតែយើងនោះទេ»។ ម្ដាយសៀវម៉ី បញ្ជាក់។ អ្វីដែលពិសេសមួយទៀតគឺ ស៊ន ដាវីន ដែលជាបងស្រី នៅចាំលើកទឹកចិត្តផ្ទាល់ក្នុងពេលប្រកួត។ ក្រៅពីនោះក៏មានថ្នាក់ដឹកនាំជាច្រើនបានរង់ចាំលើកទឹកចិត្តផ្ទាល់ផងដែរ។

សៀវម៉ី និង ម្ដាយ ថតរូបជាមួយថ្នាក់ដឹកនាំប្រទេស

គោលបំណងទៅអនាគត

សៀវម៉ី ស្គាល់រសជាតិមេដាយ កម្រិតតំបន់អាស៊ានរួចរាល់ហើយ និងថែមទាំងឈ្នះមេដាយថ្នាក់ទ្វីបអាស៊ីទៀត អស់ហើយ។ ឥឡូវនេះនាងមានបំណងទៅដណ្ដើមមេដាយនៅកម្រិតកីឡាខ្ពស់មួយទៀតគឺកម្រិតអូឡាំពិក៕

អត្ថបទពាក់ព័ន្ធ៖ វីដេអូ ទទួលស្វាគមន៍វីរនារីកម្ពុជា សៀវម៉ី រំភើបរហូតទប់ទឹកភ្នែកមិនបានយប់មិញ

អត្ថបទ៖ ម៉ឺន រស្មី