ចប់បរិញ្ញាបត្រ IT មិនអស់ចិត្តសម្រេចបំណងបន្តជំនាញនៅកូរ៉េទទួលប្រាក់ពាន់ដុល្លារក្នុង ១ ខែ

2015-02-24 18:05:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ញឹម ចន្ទបុរី ជានិស្សិតពូកែ IT មួយរូបក្នុងចំណោមនិស្សិត ១១ នាក់ផ្សេងទៀត ដែលមានឱកាសទៅបន្តការសិក្សាផ្នែកព័ត៌មានវិទ្យានៅប្រទេសកូរ៉េជាមួយការទទួលប្រាក់ឧបត្ថម្ភខ្ទង់ពាន់ដុល្លារក្នុង ១ ខែ។

យុវជន ញឹម ចន្ទបុរី ដែលទើបតែបានបញ្ចប់ការសិក្សានៅមជ្ឈមណ្ឌល Korea Software HRD Center បានឲ្យដឹងថា លោកជាបេក្ខជនមួយរូបដែលបានប្រលងជាប់ ដើម្បីទៅបន្តការសិក្សាជំនាញព័ត៌មានវិទ្យារយៈពេល ១ ឆ្នាំនៅឯប្រទេសកូរ៉េខាងត្បូង។

យុវជនដែលមានស្រុកកំណើតនៅភ្នំពេញនេះ បានសិក្សាជំនាញផ្នែក Web Design នៅមជ្ឈមណ្ឌល Korea Software HRD Center រយៈពេល ៩ ខែដោយបានបញ្ចប់វគ្គ Basic និង Advance មុនមានឱកាសទៅបន្តការសិក្សាជំនាញព័ត៌មានវិទ្យាបន្ថែមនៅប្រទេសកូរ៉េ។

បុរី ថា គេស្ថិតនៅក្នុងជំនាន់ទី ២ ដែលទទួលបានឱកាសសិក្សានៅមជ្ឈមណ្ឌល Korea Software HRD Center។ ក្នុងជំនាន់ទី ២ នេះ សាលាបានប្រលងចម្រាញ់យកតែ ៦៩ ក្នុងចំណោមសិស្សសុំសិទ្ធិប្រលង ៦០០ នាក់មកពីបណ្ដាសាកលវិទ្យាល័យផ្សេងៗក្នុងប្រទេសកម្ពុជា ដែលកំពុងសិក្សាឆ្នាំទី ៣ ឬបញ្ចប់បរិញ្ញាបត្រផ្នែកព័ត៌មានវិទ្យា។

យុវជននេះថា ដើមឡើយលោកបានបញ្ចប់បរិញ្ញាបត្រមួយរួចទៅហើយនៅសាកលវិទ្យាល័យឯកជនមួយ ប៉ុន្តែដោយមើលឃើញថាសមត្ថភាពខ្លួននៅមានកម្រិត ក៏សម្រេចចិត្តរកសាលាបន្តដើម្បីពង្រឹងសមត្ថភាពជំនាញ។ គាប់ជួនពេលនោះលោកក៏ទទួលបានឱកាសសិក្សានៅមជ្ឍមណ្ឌល Korea Software HRD Center ដើម្បីពង្រឹងសមត្ថភាពលើជំនាញ IT ។

សម្រាប់ការបន្តការសិក្សានៅប្រទេសកូរ៉េខាងមុខនេះ បុរីថានឹងខិតខំពុះពារការលំបាកគ្រប់បែបយ៉ាង ដើម្បីលទ្ធផលដ៏ល្អក្រោយបញ្ចប់ការសិក្សា។

http://youtu.be/1wnSm6K9_AA

បុរី ស្ថិតក្នុងចំណោមនិស្សិត ១១ នាក់ដែលបានទៅសិក្សាបន្តនៅឯប្រទេសកូរ៉េខាងត្បូងរយៈពេល ១ ឆ្នាំ។ បើតាម Korea Software HRD Center និស្សិតទាំង ១១ នាក់នេះនឹងទទួលបានការផ្ដល់ដូចជាការស្នាក់នៅ ការហូបចុក ដែលផ្ដល់ដោយ Webcash និង ប្រាក់ឧបត្ថម្ភក្នុងម្នាក់ពី ២០០០ ដុល្លារ ទៅ ២៥០០ ដុល្លារប្រចាំខែសម្រាប់ចាយវាយផ្ទាល់ខ្លួន។

អត្ថបទ៖ ដារ៉ាឆានី