Town នឹងប្ដឹងទារសំណង ៥០ ម៉ឺនដុល្លារ អ្នកលួចចម្លងចម្រៀងចូលឆ្នាំរបស់ខ្លួន

2015-03-10 16:17:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម Town នឹងប្ដឹងទារសំណងជាទឹកប្រាក់មិនក្រោម ៥០ ម៉ឺនដុល្លារទេ ចំពោះអ្នកដែលហ៊ានលួចចម្លងស្នាដៃអាល់ប៊ុមចូលឆ្នាំប្រពៃណីជាតិ ឆ្នាំ ២០១៥ របស់ខ្លួន។ ការប្រកាសនេះ ខណៈផលិតកម្មត្រៀមនឹងចេញលក់ CD, VCD, DVD លើទីផ្សារក្នុងពេលឆាប់ៗ។

ចម្រៀងចូលឆ្នាំប្រពៃណីជាតិរបស់ Town ត្រៀមចេញលក់ក្នុងពេលឆាប់ៗ

ផ្អែកតាមសេចក្ដីប្រកាសព័ត៌មានរបស់ផលិតកម្ម Town បញ្ជាក់ថា ផលិតកម្ម ត្រៀមនឹងសហការជាមួយគណៈកម្មការបង្ក្រាបបទល្មើសភាពយន្ត និង វីដេអូ រួមសហការនឹងស្ថាប័នពាក់ព័ន្ធផ្សេងទៀតដើម្បីឈានទៅចាប់ខ្លួនអ្នកហ៊ានលួចចម្លងស្នាដៃចម្រៀងចូលឆ្នាំប្រពៃណីជាតិរបស់ខ្លួន។

ការបន្តលួចចម្លងស្នាដៃ ដោយរំលោភលើកម្មសិទ្ធិបញ្ញា ធ្វើឱ្យផលិតកម្មទាំងមូលខាតបង់ទឹកប្រាក់ជាច្រើនសន្ធឹកសន្ធាប់។ អ្វីដែលពិសេសផលិតករបាក់ទឹកចិត្តក្នុងការផលិតចម្រៀង Original តទៅទៀតប្រសិនបើជនខិលខួចនៅតែរង់ចាំកេងយកផលចំណេញ។

អ្នកហ៊ានលួចចម្លងស្នាដៃចម្រៀងចូលឆ្នាំប្រពៃណីជាតិឆ្នាំ ២០១៥ ផលិតកម្ម Town ត្រៀមនឹងប្ដឹងទារសំណងមិនក្រោម ៥០ម៉ឺនដុល្លារទេ។ ក្នុងនោះផលិតកម្មក៏លើកទឹកចិត្តចំពោះអ្នកហ៊ានផ្ដល់ព័ត៌មានពីទីតាំងលួចចម្លង ដោយទាក់ទងទៅកាន់លេខទូរសព្ទ 010 237 777។

នៅក្នុងឆ្នាំ ២០១៥ ផលិតកម្ម Town បានផលិតចម្រៀងជាលក្ខណៈប្រពៃណីជាតិគ្រប់ចង្វាក់ប្រមាណជា ២០ ដោយមានអ្នកចម្រៀងជិត ២០ នាក់ចូលរួម ក្នុងនោះផលិតកម្មប្រើ មេឡូឌីថ្មីសុទ្ធជាង ៨០ ភាគរយ។ នេះជាការបញ្ជាក់ពីអ្នកចាត់ការទូទៅ មាស សុខរតនៈ កាលពីពេលថ្មីៗ៕