Van Gaal ៖ ដឹកនាំ Man Utd ជាអាជីពចុងក្រោយហើយ

2015-03-20 15:43:44
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Louis van Gaal បាននិយាយថារូបលោកនឹងចូលនិវត្តន៍ពីពិភពបាល់ទាត់ បន្ទាប់ពីដឹកនាំក្រុម Manchester United ដោយសំអាងលើហេតុផលចង់មានពេលវេលានៅជាមួយប្រពន្ធកូន។

កាលពីម្សិលមិញ លោក Van Gaal បានបញ្ជាក់ពីអនាគតរបស់ខ្លួនថា៖ “ខ្ញុំចាស់ណាស់ហើយ។ នេះគឺជាការងារចុងក្រោយហើយសម្រាប់ខ្ញុំ។ ខ្ញុំចង់មានពេលខ្លះនៅជាមួយកូន ប្រពន្ធ និងចៅៗរបស់ខ្ញុំផងដែរ។ ខ្ញុំមិនសប្បាយចិត្តសោះកាលពីខួបកំណើតចៅរបស់ខ្ញុំ ដោយសារមិនបានទៅចូលរួមព្រោះរវល់នៅ Old Trafford ”។

បុរសវ័យ៦៣ឆ្នាំខាងលើ នៅកុងត្រាជាមួយក្រុមបិសាចក្រហម រហូតដល់ឆ្នាំ២០១៧ ឯណោះទើបចប់ ខណៈដែលរដូវកាលដំបូងនេះរូបលោកក៏មិនទាន់បានធ្វើអ្វីឱ្យកត់សម្គាល់នៅឡើយទេ ស្របពេលដែលចំណាយប្រាក់អស់១៥០លានផោនទៅហើយក្ដី។ មួយវិញទៀត ការដែលចង់ទៅលេងនៅ Champion League រដូវកាលក្រោយក៏មិនទាន់ប្រាកដ ១០០% ដែរ ព្រោះប៉ុន្មានប្រកួតចុងក្រោយនេះ បិសាចក្រហមត្រូវប៉ះក្រុមខ្លាំងៗជាច្រើនទៀតដូចជា Liverpool និង Chelsea ជាដើម។

លោក Louis van Gaal ជាបុគ្គលជោគជ័យម្នាក់ក្នុងអាជីពជាអ្នកចាត់ការ ព្រោះអំឡុងពេលដែលរូបលោកបានដឹកនាំក្រុម Barcelona, Bayern Munich និង Ajax ជាដើមនោះ គឺសុទ្ធតែអាចជួយក្រុមទាំងនោះ លើកពាននៅលីកកំពូលប្រចាំប្រទេសបាន៕

ប្រែសម្រួល៖ មុន្នី រម្យ ប្រភព៖ bbc