មហាសេដ្ឋី​​ជា​បុគ្គល​ជោគជ័យ​បំផុត​ក្នុង​មុខ​ជំនួញ ដែល​ធ្វើ​ឲ្យ​ពួក​គេ​មាន​វាសនា​កាន់​ប្រាក់​រាប់​ពាន់​លាន​ដុល្លារ។ បើ​តាម​ទស្សនាវដ្ដី Forbes របស់​សហរដ្ឋ​អាមេរិក​បង្ហាញ​ថា ពី​មួយ​ឆ្នាំ​ទៅ​មួយ​ឆ្នាំ​មហាសេដ្ឋី​មានការ​កើន​ឡើង​ជា​លំដាប់។ ទោះ​យ៉ាង​ណា មាន​រឿង​រ៉ាវ​មួយ​ចំនួន​ដែល​អ្នក​អាច​មិន​ធ្លាប់​ដឹង​ទាក់​ទង​នឹង​មហា​សេដ្ឋី​លើ​លោក​នេះ។​

លោក Bill Gates មហា​សេដ្ឋី​លំដាប់​កំពូល​ពិភពលោក​ដ៏​ល្បីល្បាញ

១. បច្ចុប្បន្ន​នេះ មាន​មហាសេដ្ឋី​ទឹកប្រាក់​ពាន់​លាន​សរុប ១៦៤៥នាក់ ​នៅ​លើ​ពិភពលោក

២. ទឹក​ប្រាក់​របស់​មហាសេដ្ឋី​ទាំង​អស់​បូក​បញ្ចូល​គ្នា​គឺ ៦៤០០ពាន់​លាន​ដុល្លារ ស្មើ​នឹង​ផលិតផល​​ក្នុង​ស្រុក​​សរុប (GDP) របស់​កម្ពុជា​ជិត​ ៤២០ ដង (GDP កម្ពុជា ១៥,២៥ពាន់​លាន​ដុល្លារ)

​​៣. សហរដ្ឋអាមេរិក​មាន​មហាសេដ្ឋី​ច្រើន​ជាង​គេ (៤៩២ នាក់)

៤. ចិន រុស្ស៊ី អាល្លឺម៉ង់ និង​ប្រេស៊ីល គឺ​ជា​ប្រទេស​ដែល​មាន​មហាសេដ្ឋី​ច្រើន​បន្ទាប់​ពី​សហរដ្ឋអាមេរិក

​

៥. នៅ​ក្នុង​តំបន់​អាស៊ាន​មាន​ប្រទេស ៦ ប៉ុណ្ណោះ​ដែល​មាន​មហាសេដ្ឋី​ទឹក​ប្រាក់​ពាន់​លាន​គឺ វៀតណាម ហ្វីលីពីន​ ម៉ាឡេស៊ី សិង្ហបុរី ថៃ និង​ប្រទេស​ឥណ្ឌូណេស៊ី (១១៧ នាក់)។

៦. ក្នុង​ចំណោម​មហា​សេដ្ឋី​ទាំង​អស់ មាន​​៩០ភាគរយ​​​ជា​មនុស្ស​ប្រុស, ៦៥ ភាគ​រយ​គឺ​ជា​ជនជាតិ​ស្បែក​ស​ និង ៦០ ភាគរយ​មាន​អាយុ​ចាប់ពី ៦០ឆ្នាំ​ឡើង​ទៅ

៧. ​មហា​សេដ្ឋី​ភេទ​ទី ៣ មាន​ចំនួន ៧ រូប ក្នុង​ចំណោម​មហាសេដ្ឋី​ទាំង​ជាង ១ ពាន់​នាក់

៨. ប្រសិន​បើ​មហាសេដ្ឋី​កំពូល​គេ Bill Gates ជា​ប្រទេស​មួយ​វិញ ទ្រព្យ​សម្បត្តិ​របស់​លោក​នឹង​ធ្វើ​ឲ្យ​ប្រទេស​នោះ​មាន​ជាង​គេ​លំដាប់​ទី ៦៥ ក្នុង​ចំណោម​ប្រទេស​ទាំង​អស់

៩. មហាសេដ្ឋី​នី​ដែល​មាន​ជាង​គេ​បំផុត​ក្នុង​លោក គឺ​លោក​ស្រី Christy Walton ជា​សាច់ញាតិ​នៃ​គ្រួសារ Wal-Mart ដែល​មាន​ទីផ្សារ​លក់​ទំនិញ​អនឡាញ​ដ៏​ធំ​មួយ​ក្នុង​លោក

១០. ៤២ ភាគរយ​នៃ​មហាសេដ្ឋី​ដែល​ត្រូវ​ប៉ាន់​កាន់​ទ្រព្យ​សម្បត្តិ​រាប់​ពាន់​លាន​ដុល្លារ​មុន​អាយុ ៤០ ឆ្នាំ គឺ​ធ្វើ​ជំនួញ​ក្នុង​វិស័យ​បច្ចេកវិទ្យា​​​៕

លោក Warren Buffett មហា​សេដ្ឋី​លំដាប់​ទី​៣​ពិភពលោក​បច្ចុប្បន្ន

ដោយ៖ គង់ វិសាល

ប្រភព៖ business insider